ខេត្តក្រចេះជាខេត្តមួយនៅភាគឦសានមានភូមិសាស្ត្រជាប់ដងទន្លេមេគង្គ ដែលពីមុនដោយសារការខ្វះខាតហេដ្ឋារចនាសម្ព័ន្ធតភ្ជាប់ ហាក់ធ្វើឲ្យខេត្តមួយនេះនៅឆ្ងាយដាច់ស្រយាល។តាមរយៈគម្រោងរដ្ឋាភិបាលដែលចាយទឹកប្រាក់រយលានដុល្លារអភិវឌ្ឍហេដ្ឋារចនាសម្ព័ន្ធ ដែលប៉ុន្មានឆ្នាំទៀតនេះនឹងនាំការអភិវឌ្ឍ ផ្លាស់ប្ដូរមុខមាត់ថ្មីខេត្តដែលធ្លាប់ដាច់ស្រយាលមានប្រជាជនរស់នៅតែជាង ៤០ ម៉ឺននាក់នេះ ជាមួយបណ្ដាញផ្លូវគមនានាគម៍តភ្ជាប់យ៉ាងប្រទាក់ក្រឡា ដែលនឹងនាំដល់ប្រែប្រួលរីកចម្រើនសេដ្ឋកិច្ចសង្គម ធ្វើឲ្យជីវភាពពលរដ្ឋកាន់តែប្រសើរឡើង។ ស្ពានឆ្លងទន្លេមេគង្គខេត្តក្រចេះជាស្ពានឆ្លងកាត់ទន្លេទីមួយក្នុងខេត្តក្រចេះ ដែលចាយថវិកាសាងសង់ជាង ១០០ លានដុល្លារ ដែលគ្រោងបញ្ចប់ដាក់ឲ្យប្រើប្រាស់នៅឆ្នាំក្រោយ។ស្ពាននេះមានប្រវែងជាង ១ ៧០០ ម៉ែត្រ ភ្ជាប់ពីត្រើយម្ខាងនៃតំបន់ប្រជុំជនស្រុកចិត្របុរី មកត្រើយម្ខាងនៃស្រុកព្រែកប្រសព្វដោយកន្លងមកពលរដ្ឋជួបការលំបាកដោយត្រូវឆ្លងដចម្លងជាប្រចាំ ប្រឈមគ្រោះថ្នាក់ និងចំណាយថវិកាអស់យ៉ាងច្រើន។ សមិទ្ធផលស្ពានថ្មីដែលលេចឡើងនាពេលឆាប់ៗខាងមុខនេះ នឹងជួយធ្វើឲ្យខេត្តជាប់ដងទន្លេល្បីត្រីផ្សោតជានិមិត្តរូប នឹងមានការអភិវឌ្ឍតាមរយៈការនាំលំហូរវិនិយោគនិងទេសចរណ៍ ដែលនឹងជួយលើកស្ទួយជីវភាពប្រជាពលរដ្ឋឲ្យកាន់តែប្រសើរថែមទៀត។ ផ្លូវជាតិ ៦០ បេ នេះជាកំណាត់ផ្លូវប្រវត្តិសាស្ត្រថ្មីមួយទៀតរបស់ខេត្តក្រចេះ។ ផ្លូវនេះកំពុងដំណើរការសាងសង់ដែលមានប្រវែងជាង ៦០ គីឡូម៉ែត្រចេញពីប្រទល់ខេត្តកំពង់ធំកាត់ស្ពានទន្លេមេគង្គខេត្តក្រចេះ ទៅដល់រង្វង់មូលខ្លាស្ទុះភ្ជាប់ទៅផ្លូវជាតិលេខ ៧ ទៅខេត្តស្ទឹងត្រែង រតនគិរី និងមណ្ឌលគិរី។ផ្លូវជាតិថ្មីនេះ គឺជាការតភ្ជាប់បណ្តាញគមនាគមន៍ដ៏សំខាន់ សម្រាប់តំបន់ភូមិភាគកណ្ដាលមកតំបន់ភាគឦសាន ដែលនឹងបង្ខិតចម្ងាយផ្លូវធ្វើដំណើរ ជាពិសេសតភ្ជាប់លំហូរទេសចរណ៍ពីខេត្តកំពង់ធំ ខេត្តសៀមរាប មកខេត្តក្រចេះកាន់តែងាយស្រួល ខណៈដែលខេត្តក្រចេះមានសក្ដានុពលទេសចរជាច្រើនទាំងធម្មជាតិ និងប្រវត្តិសាស្ត្រដូចជាតំបន់ទេសចរណ៍ធម្មជាតិព្រែកកាំពី និងទេសចរណ៍ប្រវត្តិសាស្រ្តវិហារសសរ១០០ ជាដើម ដែលជាគោលដៅទេសចរណ៍ដ៏សំខាន់និងទាក់ទាញបំផុតសម្រាប់ខេត្តជាប់ដងទន្លេមួយនេះ។ ផ្លូវខេត្តលេខ ៣៧៧ ផ្លូវនេះបានបើកការដ្ឋានសាងសង់ជាងមួយឆ្នាំ ដោយចំណុចចាប់ផ្តើមចេញពីរង្វង់មូលព្រាបស ក្រុងក្រចេះ សសៀរតាមមាត់ទន្លេទៅដល់ប្រជុំជនស្រុកសំបូរ។ កំណាត់ផ្លូវនេះកន្លងទៅមានសភាពតួចចង្អៀតពិបាកធ្វើដំណើរ។តាមរយៈការស្តារពង្រីកឡើងវិញ នឹងផ្តល់អត្ថប្រយោជន៍យ៉ាងធំធេងដល់សេដ្ឋកិច្ចនិងជីវភាពពលរដ្ឋក្នុងមូលដ្ឋាន តាមរយៈការសម្រួលការដឹកជញ្ជូន និងការធ្វើណើររបស់ភ្ញៀវទេសចរទៅកម្សាន្តនៅតំបន់ទេសចរណ៍ធម្មជាតិព្រែកកាំពី និងតំបន់ទេសចរណ៍ប្រវត្តិសាស្រ្តវិហារសសរ១០០ ជាដើម វឌ្ឍនភាពនៃការសាងសង់ផ្លូវខេត្តលេខ ៣៧៧ ដែលមានប្រវែង ៤៨,៥៩ គីឡូម៉ែត្រ បច្ចុប្បន្នសម្រេចបានជិត ៧០% ហើយគ្រោងបញ្ចប់នៅចុងឆ្នាំនេះ៕