វគ្គបណ្តុះបណ្តាលស្តីពី "ការប្រើប្រាស់ប្រព័ន្ធគ្រប់គ្រងទិន្នន័យមន្ត្រីរាជការស៊ីវិល HRMIS" ទីស្តីការក្រសួង៖ នារសៀលថ្ងៃព្រហស្បតិ៍ ទី១៥ ខែសីហា ឆ្នាំ២០២៤ លោកជំទាវ ហួត លីដា អនុរដ្ឋលេខាធិការ និងជាប្រធានលេខាធិការដ្ឋាន នៃក្រុមការងារដឹកនាំ និងសម្របសម្រួលការពិនិត្យឡើងវិញ និងការវិភាគមុខងារ និងរចនាសម្ព័ន្ធរបស់ក្រសួងសាធារណការ និងដឹកជញ្ជូន តំណាង ឯកឧត្តម ស៊ុយ សាន រដ្ឋលេខាធិការ និងជាប្រធានក្រុមការងារកែទម្រង់រដ្ឋបាលសាធារណៈ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងវគ្គបណ្តុះបណ្តាលស្តីពី "ការប្រើប្រាស់ប្រព័ន្ធគ្រប់គ្រងទិន្នន័យមន្ត្រីរាជការស៊ីវិល HRMIS" ដោយមានការចូលរួមពីថ្នាក់ដឹកនាំក្រសួង និងមន្ត្រី នៃមន្ទីរសាធារណការ និងដឹកជញ្ជូន រាជធានី-ខេត្ត ជាច្រើនរូប។ វគ្គបណ្តុះបណ្តាលនេះគឺជាមូលដ្ឋានសំខាន់សម្រាប់ពន្លឿនការធ្វើបច្ចុប្បន្នភាពទិន្នន័យជីវប្រវត្តិមន្ត្រីរាជការដាក់បញ្ចូលតាមប្រព័ន្ធអនឡាញដោយសាមីក្រសួងឱ្យបានទាន់ពេលវេលា ។ វគ្គបណ្តុះបណ្តាលនេះត្រូវបានសហការរៀបចំដោយនាយកដ្ឋានបុគ្គលិក រួមជាមួយក្រុមការងារគាំទ្របច្ចេកទេស នៃក្រសួងមុខងារសាធារណៈ ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាល ។ តាមរយៈវគ្គបណ្តុះបណ្តាលនេះ លោកជំទាវអនុរដ្ឋលេខាធិកា រំពឹងថាសិក្ខាកាមដែលបានចូលរួមនឹងទទួលបានចំណេះដឹង បទពិសោធន៍ល្អៗ ពីវិធីសាស្ត្រសម្រាប់រៀបចំពន្លឿនការធ្វើបច្ចុប្បន្នភាពទិន្នន័យជីវប្រវត្តិមន្ត្រីរាជការដាក់បញ្ចូលតាមប្រព័ន្ធអនឡាញដោយសាមីក្រសួង ស្ថាប័ន រាជធានី ខេត្ត ឱ្យបានទាន់ពេលវេលា។ សូមបញ្ជាក់ថា ប្រព័ន្ធគ្រប់គ្រងទិន្នន័យរួមមន្ត្រីរាជការជាប្រព័ន្ធដែលអនុញ្ញាតឱ្យក្រសួង ស្ថាប័ន រាជធានី ខេត្ត អាចគ្រប់គ្រងមន្ត្រីរាជការស៊ីវិលរបស់សាមីអង្គភាពតាមប្រព័ន្ធអនឡាញ ដើម្បីពន្លឿនការធ្វើបច្ចុប្បន្នភាពទិន្នន័យជីវប្រវត្តិមន្ត្រីរាជការដាក់បញ្ចូលតាមប្រព័ន្ធអនឡាញដោយសាមីក្រសួង ស្ថាប័ន រាជធានី ខេត្ត ឱ្យបានទាន់ពេលវេលា និងក្នុងគោលបំណងជួយកាត់បន្ថយការរក្សាទុកឯកសារមន្ត្រីដោយក្រដាសស្នាម ការបំពេញជីវប្រវត្តិមន្ត្រីរាជការ និងការធ្វើបច្ចុប្បន្នភាពទិន្នន័យជីវប្រវត្តិមន្ត្រីរាជការក្នុង ប្រព័ន្ធគ្រប់គ្រងទិន្នន័យរួមមន្ត្រីរាជការ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube