កាលពីថ្ងៃទី២៧ ខែមិថុនា ឆ្នាំ២០២៤ លោក TSUKASA SAKURADAN អគ្គនាយកក្រុមហ៊ុន AMIDA POWER Inc បានជួបសម្តែងការគួរសម និងពិភាក្សាការងារជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។ក្នុងជំនួបនេះ លោកអគ្គនាយកក្រុមហ៊ុន AMIDA POWER Inc បានបញ្ជាក់ថា ក្រុមហ៊ុនរបស់លោកមានបំណង ពិនិត្យនិងសិក្សាលទ្ធភាពវិនិយោគសាងសង់ផ្លូវល្បឿនលឿននៅកម្ពុជា។ គួររំលឹកផងដែរថា យោងតាមផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ បានបង្ហាញឱ្យឃើញថា ចន្លោះពីឆ្នាំ២០២៣-២០៣៣ រាជរដ្ឋាភិបាលមានគម្រោងសាងសង់ផ្លូវល្បឿនលឿន ៩ខ្សែ ដោយត្រូវការទុនសរុប ៧ពាន់លានដុល្លារ។ក្នុងបញ្ជីគម្រោងដឹកជញ្ជូនអន្តរមធ្យោបាយដដែលនេះ បានបង្ហាញ គម្រោងផ្លូវល្បឿនលឿន៩ខ្សែនេះ បែងចែកជា២ដំណាក់កាល ដោយរយៈពេលខ្លី ឆ្នាំ២០២៣-២០២៧ គឺមានចំនួន៤ខ្សែ ត្រូវការទុន ៤១៨៤,៨១លានដុល្លារ និងរយៈពេលវែងឆ្នាំ២០២៨-២០៣៣ នឹងមានផ្លូវល្បឿនលឿនចំនួន ៥ខ្សែបន្ថែម ដោយត្រូវការទុន ២៩៨៨,៨៨លានដុល្លារ។ នាពេលបច្ចុប្បន្ន កម្ពុជាមានផ្លូវល្បឿនលឿនដែលសុទ្ធតែវិនិយោគសាងសង់ដោយក្រុមហ៊ុនសាជីវកម្មស្ពានថ្នល់ចិន CRBC រួមមាន ផ្លូវល្បឿនលឿនពីភ្នំពេញទៅខេត្តព្រះសីហនុដែលកំពុងដំណើរការ ផ្លូវល្បឿនលឿនទី២ភ្ជាប់ពីភ្នំពេញទៅបាវិតដែលបានបើកការដ្ឋានសាងសង់នៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ និងចុងក្រោយ ផ្លូវល្បឿនលឿនទី៣ ភ្ជាប់ពីភ្នំពេញទៅសៀមរាប និងក្រុងប៉ោយប៉ែត ដែលកំពុងធ្វើការសិក្សានិងគ្រោងបើកការដ្ឋានសាងសង់នាពេលខាងមុខ៕