កំណាត់ផ្លូវថ្មីមានប្រវែង៦១គីឡូម៉ែត្រដែលតភ្ជាប់ពីផ្លូវជាតិលេខ៤មកឧទ្យានជាតិភ្នំបូកគោ គ្រោងចំណាយថវិកាសាងសង់៣លានដុល្លារក្នុង១គីឡូម៉ែត្រ។ ការដែលផ្លូវថ្មីនេះសាងសង់ចំណាយថវិកាច្រើន ត្រូវបានលោក ស្វាយ វុឌ្ឍី នាយកនីតិកម្ម និងទំនាក់ទំនងសាធារណៈនៃក្រុមហ៊ុន សុខាហូថែល បានបញ្ជាក់ថា ដោយសារស្ថានភាពផ្លូវនេះថ្មីទាំងស្រុង ដូច្នេះការសាងសង់មានជួបការលំបាកច្រើន ហើយស្ថានភាពផ្លូវឡើងចុះ នាំឱ្យការចំណាយលើការសាងសង់មានចំនួនខ្ពស់ ដែលនេះជាការសិក្សារបស់ក្រសួងសាធារណការ និងដឹកជញ្ជូន។ សំឡេងលោក ស្វាយ វុឌ្ឍី៖ ក្នុងដំណើរទស្សនកិច្ចរបស់ក្រុមអ្នកសារព័ត៌មានដើម្បីផ្សព្វផ្សាយពីសក្តានុពលទេសចរណ៍នៅតំបន់ឧទ្យាជាតិភ្នំបូកគោ ដឹកនាំដោយក្លិបអ្នកកាសែតកម្ពុជា នាថ្ងៃទី២៨ ខែឧសភា ឆ្នាំ២០២៤ លោក ស្វាយ វុឌ្ឍី បានឱ្យដឹងថា ផ្លូវថ្មីនេះ តភ្ជាប់ពីផ្លូវជាតិលេខ៤ត្រង់ចំណុចចំការដូងប្រេងរបស់ឧកញ៉ា ម៉ុង ឬទ្ធី ចន្លោះគីឡូម៉ែត្រលេខ ១៥៨+២៩១។ ផ្លូវថ្មីទាំង៦១គីឡូម៉ែត្រនេះ បានឈូសចេញជាទម្រង់ផ្លូវសម្រេចបាន១០០ភាគរយហើយ ខណៈផ្លូវនេះត្រូវបានចាក់បេតុងដេញពីលើចុះទៅក្រោមវិញមកដល់ពេលនេះសម្រេចបាន២គីឡូ៣៥០ម៉ែត្រ។ នាយកនីតិកម្ម និងទំនាក់ទំនងសាធារណៈនៃក្រុមហ៊ុន សុខាហូថែល បានឱ្យដឹងទៀតថា តាមផែនការដែលគ្រោងបញ្ចប់នៃគម្រោងសាងសង់នេះ គឺមិនទាន់អាចកំណត់ពេលវេលាណាមួយឱ្យពិតប្រាកដបាននោះទេ ដោយសារស្ថានភាពសេដ្ឋកិច្ចបច្ចុប្បន្ន មានបញ្ហាវិបត្តិសេដ្ឋកិច្ចសកលផង និងបានជះឥទ្ធិពលដល់ការវិនិយោគនៅលើភ្នំបូកគោផង។ ដូច្នេះការសាងសង់គឺធ្វើឡើងទៅតាមស្ថានភាពសេដ្ឋកិច្ចជាក់ស្តែង ប្រសិនបើសេដ្ឋកិច្ចមានភាពល្អប្រសើរឡើងវិញ នោះការសាងសង់ក៏នឹងជំរុញឱ្យបានលឿនជាងនេះ ហើយបើស្ថានភាពសេដ្ឋកិច្ចដូចបច្ចុប្បន្ននេះ ការសាងសង់ក៏ធ្វើជាជំហានៗ។ លោក ស្វាយ វុឌ្ឍី បានគូសបញ្ជាក់ថា នៅពេលផ្លូវថ្មីនេះសាងសង់រួច ក្រុមហ៊ុនមិនមានគម្រោងយកលុយពីប្រជាពលរដ្ឋនិងភ្ញៀវទេសចរជាតិ-អន្តរជាតិនោះទេ ហើយផ្លូវថ្មីនេះ ធ្វើឡើងសម្រាប់ប្រជាពលរដ្ឋ និងភ្ញៀវទេសចរទាំងអស់ដែលមានបំណង់មកទស្សននៅលើភ្នំនេះ ក៏ដូចជាអ្នកដែលស្នាក់នៅលើភ្នំនេះធ្វើចរាចរចេញចូលបានដោយសេរី ហើយក៏អាចជួយសម្រួលដល់ការដឹកជញ្ជូននៅក្នុងតំបន់នេះមួយចំនួនទៀតផង។ ទន្ទឹមនឹងនេះ លោក វុឌ្ឍី បានឱ្យដឹងបន្ថែមថា កន្លងមកឧទ្យានជាតិភ្នំបូកគោ មានតែផ្លូវមួយប៉ុណ្ណោះពីផ្លូវជាតិលេខ៣។ ដូច្នេះដោយមានការអនុញ្ញាតពីរាជរដ្ឋាភិបាល ទើបក្រុមហ៊ុនសម្រេចសាងសង់ផ្លូវមួយខ្សែដែលតភ្ជាប់ពីផ្លូវជាតិលេខ៤នេះឡើង ដើម្បីសម្រួលដល់អ្នកដែលរស់នៅខាងខេត្តកោះកុង និងខេត្តព្រះសីហនុ គាត់ចង់ឡើងមកលើភ្នំបូកគោគឺមានភាពងាយស្រួលក្នុងការធ្វើដំណើរ៕ ដោយ៖ ង៉ែត ពិសាន្ត