បច្ចុប្បន្នរាជរដ្ឋាភិបាលបានកំពុងយកចិត្ដទុកដាក់នៅក្នុងការសាងសង់ស្ពានជាច្រើនកន្លែង ដោយក្នុងនោះមានស្ពានខ្លះកំពុងដំណើរការសាងសង់ និងខ្លះទៀតកំពុងស្ថិតនៅក្នុងផែនការសម្រាប់ការសាងសង់នៅពេលខាងមុខ។ ហើយថ្ងៃនេះយើងសូមនាំប្រិយមិត្ដមកស្គាល់ស្ពានសំខាន់ចំនួន ២ ដែលកំពុងសម្រុកសាងសង់ឲ្យទាន់ផែនការបានកំណត់។ ១. ស្ពានឆ្លងកាត់ទន្លេមេគង្គលើ គម្រោងស្ពានឆ្លងកាត់ទន្លេមេគង្គដែលមានទីតាំងស្ថិតនៅក្នុងខេត្ដក្រចេះ ត្រូវបានបើកការដ្ឋានសាងសង់ កាលពីថ្ងៃទី២ ខែមករា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម វ៉ាង វិនធៀន (Wang Wentian) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។ ស្ពានមួយនេះមានប្រវែងសរុប ១ ៧៦១ ម៉ែត្រ សាងសង់ដោយ ក្រុមហ៊ុនសំណង់សៀងហៃ (SCG) និងត្រួតពិនិត្យដោយ ក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ខណៈបច្ចុប្បន្នសម្រេចបានប្រមាណ ៥០ ភាគរយ និងគ្រោងបញ្ចប់នៅក្នុងខែសីហា ឆ្នាំ២០២៦។ នៅពេលសាងសង់រួចនឹងផ្តល់អត្ថប្រយោជន៍យ៉ាងធំធេងដល់សេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការសម្រួលដល់ការធ្វើដំណើររបស់បងប្អូនប្រជាពលរដ្ឋ ភ្ញៀវទេសចរ និងការដឹកជញ្ជូនទំនិញ ឬកសិផលគ្រប់ប្រភេទ។ ២. គម្រោងស្ពានឆ្លងកាត់ទន្លេបាសាក់ស្ពានឆ្លងកាត់ទន្លេបាសាក់ ដែលតភ្ជាប់តំបន់ព្រែកប្រា និងតំបន់ចាក់អង្រែក្រោម ស្ថិតនៅក្នុងភូមិសាស្ដ្ររាជធានីភ្នំពេញ បានបើកការដ្ឋានសាងសង់កាលពីថ្ងៃទី១៩ ខែកុម្ភៈ ឆ្នាំ២០២៤។ ស្ពានខាងលើនេះជាប្រភេទបេតុងភ្លោះ មានប្រវែងសរុប ១៦៥០ម៉ែត្រ ទទឹង ២៧ម៉ែត្រ ដែលមានសម្រាប់រថយន្តចំនួន ២គន្លងទៅមក សម្រាប់ទោចក្រយានយន្តចំនួន ១គន្លងទៅមក និងសម្រាប់ថ្មើរជើង ១គន្លងទៅមក ។ គម្រោងស្ពានថ្មីនេះ ត្រូវបានទទួលការសាងសង់ដោយក្រុមហ៊ុន សំណង់សៀងហៃ និងទីប្រឹក្សាគម្រោង ដោយក្រុមហ៊ុនក្វាងចូវវ៉ានអាន។ តាមការគ្រោងទុកគម្រោងនេះនឹងបញ្ចប់ការសាងសង់នៅក្នុងឆ្នាំ២០២៧ និងចំណាយថវិកាចំនួន ៦០.២ លានដុល្លារ ដែលជាឥណទានសម្បទានពីប្រទេសចិន៕