កិច្ចប្រជុំពិគ្រោះយោបល់លើកម្រងសំណួរបន្ថែមរបស់ អង្គការពាណិជ្ជកម្មពិភពលោក(គ.គ.ព.) ស្តីពីការត្រួតពិនិត្យឡើងវិញគោលនយោបាយពាណិជ្ជកម្មកម្ពុជាលើកទី៣ ទីស្ដីការក្រសួង៖ នាព្រឹកថ្ងៃព្រហស្បតិ៍ ទី១៦ ខែឧសភា ឆ្នាំ២០២៤ ឯកឧត្តម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិគ្រោះយោបល់លើកម្រងសំណួរបន្ថែមរបស់ អង្គការពាណិជ្ជកម្មពិភពលោកស្តីពីការត្រួតពិនិត្យឡើងវិញគោលនយោបាយពាណិជ្ជកម្មកម្ពុជាលើកទី៣ ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។ កិច្ចប្រជុំនេះធ្វើឡើងក្នុងគោលបំណងដើម្បីប្រមូលធាតុចូលបន្ថែមបន្ទាប់ពីកិច្ចប្រជុំជាមួយនឹងអ្នកជំនាញការរបស់អង្គការពាណិជ្ជកម្មពិភពលោក កាលពីថ្ងៃទី០៣ ខែឧសភា ឆ្នាំ២០២៤ នៅទីស្ដីការក្រសួងពាណិជ្ជកម្ម។ ក្រុមអ្នកជំនាញការរបស់អង្គការពាណិជ្ជកម្មពិភពលោក បានសាកសួរបន្ថែមទៀតលើអ្វីដែលក្រសួងបានផ្ដល់ជូន ក្នុងនោះមានសំនួរមួយចំនួនដូចជា៖ (១) ការផ្ដល់សេវាពាក់ព័ន្ធនឹងវិស័យសាធារណការ និងដឹកជញ្ជូន រួមមានផ្លូវគោក ផ្លូវដែក និងផ្លូវទឹក (២) វឌ្ឍនភាព និងការរីកចម្រើននៃហេដ្ឋារចនាសម្ព័ន្ធនៅក្នុងប្រទេសកម្ពុជា (៣) ការអនុវត្តគោលនយោបាយជាតិ និង(៤) ការគាំពាររបស់រាជរដ្ឋាភិបាលនៅក្នុងដំណាក់កាលនៃការរីករាលដាលជំងឺកូវីដ-១៩ ជាដើម។ ថ្លែងទៅកាន់អង្គប្រជុំ ឯកឧត្ដមរដ្ឋលេខាធិការ បានមានមតិផ្ដាំផ្ញើទៅកាន់ អគ្គនាយកដ្ឋាន និងនាយកដ្ឋានជំនាញ ត្រូវបន្តសហការគ្នាបន្ថែមទៀតក្នុងការរៀបចំចម្លើយឱ្យសមស្របទៅនឹងការស្នើសុំរបស់អ្នកជំនាញការរបស់អង្គការពាណិជ្ជកម្មពិភពលោក និងពិនិត្យមើលឱ្យបានគ្រប់ជ្រុងជ្រោយដើម្បីធានាថាការឆ្លើយតបរបស់កម្ពុជា គឺសមស្របទៅតាមការស្នើសុំរបស់អង្គការពាណិជ្ជកម្មពិភពលោក។ សូមបញ្ជាក់ផងដែរថា៖ កិច្ចប្រជុំបន្ទាប់ជាមួយនឹងក្រុមការងាររបស់អង្គការពាណិជ្ជកម្មពិភពលោកនឹងប្រព្រឹត្តឡើងនៅអំឡុងខែតុលា ឆ្នាំ២០២៤ ខាងមុខនេះ។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube