ក្បាលរថភ្លើងមួយទឹកពីប្រទេសជប៉ុនប្រភេទ DMU (Diesel Multiple Unit) ចំនួន ១១គ្រឿងដែលបញ្ជាទិញដោយក្រុមហ៊ុនរបស់អ្នកឧកញ៉ាគិត ម៉េងកំពុងត្រៀមដាក់ឱ្យប្រើប្រាស់ជាផ្លូវការក្នុងឆ្នាំ២០២៤នេះ។ ក្រសួងសាធារណការតាមរយៈអ្នកនាំពាក្យលោក ផន រឹម អះអាងថា ក្បាលរថភ្លើងមួយទឹកពីស្រុកក្រៅទាំងនេះអាចដំណើរការលើផ្លូវដែកកម្ពុជាបាន ល្គឹកណាវាមិនបង្កគ្រោះថ្នាក់ដល់អ្នកប្រើប្រាស់។កម្ពុជាមានក្បាលរថភ្លើងបន្ថែមចំនួន ១១គ្រឿងដែលគ្រោងដាក់ឱ្យប្រើប្រាស់ជាផ្លូវការ ក្នុងឆ្នាំ២០២៤នេះ។ ជាក្បាលរថភ្លើងជជុះដែលក្រុមហ៊ុន Royal Railway Cambodia របស់អ្នកឧកញ៉ាគិត ម៉េងបានបញ្ជាទិញពីប្រទេសជប៉ុនកាលពីខែមេសាកន្លងទៅ។ តាម Rail Travel Station ដែលជាគេហទំព័រសរសេរពីបច្ចេកទេសរថភ្លើង ក្បាលរថភ្លើងមួយទឹកនៅជប៉ុននេះជាប្រភេទល្បឿនលឿន ម៉ាក KiHa ១៨៣ ដែលអាចរត់បានល្បឿន ១១០គីឡូម៉ែត្រក្នុងមួយម៉ោង។ គួរជម្រាបថា បច្ចុប្បន្ននេះ ផ្លូវដែកនៅកម្ពុជាត្រូវបានកំណត់ល្បឿនជាមធ្យមចន្លោះពី ៣០ ទៅ ៥០km/h សម្រាប់ផ្លូវរថភ្លើង ភ្នំពេញ-ប៉ោយប៉ែត និង៨០km/h សម្រាប់ផ្លូវរថភ្លើង ភ្នំពេញ-ព្រះសីហនុ។ បរិបទផ្លូវដែកដូច្នេះបានញ៉ាំងឱ្យពលរដ្ឋមួយចំនួនបារម្ភពីសុវត្ថិភាព បើក្បាលរថភ្លើងជជុះពីជប៉ុនទាំងនោះដាក់ឱ្យដំណើរការនៅកម្ពុជា។ តែក្រសួងសាធារណៈការ និងដឹកជញ្ជូនតាមរយៈអ្នកនាំពាក្យលោកផល រឹម បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១៣ឧសភានេះថា ក្បាលរថភ្លើងជជុះពីជប៉ុនទាំង ១១គ្រឿងនឹងដាក់ឱ្យប្រើប្រាស់ស្របតាមស្ថានភាពផ្លូវដែកកម្ពុជា ពោលគឺមិនឱ្យលើសពីល្បឿនដែលបានកំណត់។ តាមលោកផល រឹម ក្រុមការងារបច្ចេកទេសផ្លូវដែករបស់ក្រសួងសាធារណៈការបានចុះពិនិត្យក្បាលរថភ្លើងជជុះពីជប៉ុនទាំង ១១គ្រឿងយ៉ាងម៉ត់ចត់ និងថា ក្រសួងបានតម្រូវឱ្យក្រុមហ៊ុន Royal Railway Cambodia កែសម្រួលផ្នែកបច្ចេកទេសមួយចំនួនឱ្យស្របតាមបរិបទផ្លូវដែកកម្ពុជាមុននឹងដាក់ឱ្យដំណើរការជាផ្លូវការ។ សូមជ្រាបថា ក្បាលរថភ្លើងជជុះពីជប៉ុនចំនួន១១គ្រឿងនេះត្រៀមរត់លើផ្លូវដែកកម្ពុជាក្រោមក្តីរំពឹងជួយវិស័យដឹកជញ្ជូនផ្លូវដែកឱ្យប្រសើរឡើងទាំងកម្រិតសុវត្ថិភាព ល្បឿន និងប្រសិទ្ធភាព រួមទាំងការប្រកួតប្រជែងលើវិស័យឡូជីស្ទិក។ ការធ្វើទំនើបកម្មផ្លូវដែកនេះត្រូវបានអ្នកតាមដានសង្គមលោកយង់ គឹមអេងសាទរ និងរំពឹងថា វានឹងធ្វើឱ្យវិស័យដឹកជញ្ជូនផ្លូវដែកនៅស្រុកខ្មែរកាន់តែពេញនិយមឡើង។ ទោះជាយ៉ាងណា អ្នកតាមដានសង្គមរូបនេះដដែលនៅតែបារម្ភពីស្ថានភាពផ្លូវដែកនៅកម្ពុជាដោយលោកបានសង្កេតឃើញថាជារឿយៗ ប្រតិបត្តិការនៅលើផ្លូវដែកកម្ពុជាតែងជួបបញ្ហាក្បាលរថភ្លើងខូច ធ្លាក់គន្លងផ្លូវ និងគ្រោះថ្នាក់បុកគ្នាជាមួយយានយន្តជាដើម៕