ខេត្តបាត់ដំបងៈលោកអនុសេនីយ៍ឯកម៉ី ណាន់,នាយប៉ុស្តិ៍នគរបាលវរៈការពារព្រំដែន គោក៨២៥ច្រកទ្វារតំបន់៤០០បានឲ្យដឹងថា ផ្លូវប្រវែងជាង១,២០០ម៉ែត្រក្រា លគ្រួសក្រហមនេះ នៅចន្លោះព្រំដែន ច្រកទ្វារតំបន់៤០០កម្ពុជា/ថៃ ជាទឹកដីរបស់កម្ពុជា មិនមែនជាតំបន់សរ ត្រូវហាមឃាត់ទេ ប៉ុន្តែខាងភាគីថៃគេចាក់បេ តុងមកដល់ប៉ុស្តិ៍គេ នៅតែខាងកម្ពុជា មិនទាន់បានធ្វើទៅភ្ជាប់និងផ្លូវបេតុងថៃ។ លោកបន្តថា៖ បច្ចុប្បន្នផ្លូវនេះខូចខាតជាអន្លើរៗជាង៦០០ម៉ែត្រ ដោយសាររដូវនេះជារដូវវស្សាភ្លៀងធ្លាក់ពីលើភ្នំមក ហូរច្រោះផ្លូវបង្កឲ្យខូចខាតលំបាកធ្វើ ដំណើរឆ្លងដែនទៅមករវាងប្រទេសកម្ពុជានិងថៃឡើងភ្នំចុះភ្នំយ៉ាងខ្លាំង។ លោកបន្តថា ផ្លូវពីស្រុកសំឡូតមកដល់ច្រកទ្វារតំបន់៤០០នេះក្រុមហ៊ុនចិនមិនបានធ្វើដល់ព្រំប្រទល់ដីថៃទេទុកនៅចន្លោះជាង១,២០០ម៉ែត្រ។ ដោយសារឃើញផ្លូវនេះលំបាកឆ្លងកាត់ ក្នុងនាមលោកទទួលខុសត្រូវតំបន់នេះផង លោកបានដឹកនាំកម្លាំងធ្វើជួសជុលកែលំអរជាបណ្តោះអាសន្នឲ្យបានស្អាតឡើងវិញសម្រួលដល់ការធ្វើដំណើរឆ្លងកាត់ទៅមករបស់ប្រជាពលរដ្ឋប្រទេសទាំងពីរ។ លោកបានបញ្ជាក់ទៀតថា៖ ផ្លូវនេះលោកបានស្នើសុំទៅអាជ្ញាធរខេត្តនិងមន្ទីសាធារណៈការនិងដឹកជញ្ជូនខេត្តបាត់ដំបងដែរ ដើម្បីធ្វើបង្ហើយភ្ជាប់ទៅផ្លូវបេតុងថៃតែថ្នាក់លើមិនទាន់បានឆ្លើយតបទេ។ កន្លងមកផ្លូវនេះលោកបានចំណាយថវិកាផ្ទាល់ខ្លួនរួមនិងថវិការសប្បុរសជនចាក់ថ្មម៉ិចពីលើផ្លូវក្រាលគ្រួសក្រហមអស់ជាច្រើនឡាន នាំគ្នាធ្វើជារៀងរាល់ឆ្នាំមិនថាតែធ្វើឆ្នាំនេះទេ។ លោកបន្តថា៖ ច្រកទ្វារតំបន់៤០០ស្រុកសំឡូតចាប់តាំងពីបើកច្រកទ្វារមិនធ្លាប់មានបញ្ហាអ្វីកើតឡើងរវាងប្រទេសទាំង២ទេ តែងមានទំនាក់ទំនងល្អនិងគ្នានិងជាព្រំដែនមួយមានសុខសន្តិភាព បើមានអ្វីកើតឡើងអាជ្ញាធរនិងសមត្ថកិច្ចទាំងពីរបានផ្តល់ព័ត៌មានឲ្យគ្នាទៅវិញទៅមកដឹងជាមុននិងសហការគ្នាបានយ៉ាងល្អ៕