កំពង់ធំ ថ្ងៃទី០៩ ខែមេសា ឆ្នាំ២០២៤ -- លោកជំទាវ លំ គន្ធារី អភិបាលរងខេត្ត និងជាអនុប្រធានអចិន្ត្រៃយ៍គណៈកម្មាធិការ សាខាកាកបាទក្រហមកម្ពុជាខេត្តកំពង់ធំ នាព្រឹកថ្ងៃអង្គារ ១កើត ខែចេត្រ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី០៩ ខែមេសា ឆ្នាំ២០២៤ បានអញ្ជើញចូលរួមក្នុងពិធីបើកយុទ្ធនា ការ ស្តីពី "យុវជន និងសុវត្ថិភាពចរាចរណ៍ផ្លូវគោក" ដោយមានការចូលរួមពីថ្នាក់ដឹកនាំ មន្ត្រីក្រុមប្រតិបត្តិសាខា មន្រ្តីអនុសាខា មន្រ្តីមន្ទីរសាធារណការ និងដឹកជញ្ជូនខេត្តយុវជន វិទ្យាល័យកំពង់ធំ យុវជនស.ស.យ.ក និងកងកម្លាំងសមត្ថកិច្ច សរុបចំនួន៤០នាក់។ក្នុងឱកាសនោះ លោកជំទាវ លំ គន្ធារី បានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្លែងអំណរគុណយ៉ាងជ្រាលជ្រៅជាទីបំផុតចំពោះវត្តមាន ក្មួយៗយុវជនកាកបាទក្រហម កម្ពុជា ដែលបានចំណាយពេលវេលា កម្លាំងកាយ និងឆន្ទៈមោះមុតមកចូលរួមក្នុងយុទ្ធនាការ នាព្រឹកនេះ។លោកជំទាវ អនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជាខេត្ត បានបន្តថា កាកបាទក្រហមកម្ពុជាតែងតែធ្វើយុទ្ធនាការលើកកម្ពស់សុវត្ថិភាពចរាចរណ៍នេះ ជារៀងរាល់ឆ្នាំ ព្រោះកាកបាទក្រហមកម្ពុជា ជាសមាជិកថ្នាក់ជាតិរបស់គណៈកម្មាធិការជាតិ សុវត្ថិភាពចរាចរណ៍ផ្លូវគោក និងដើម្បីឆ្លើយតបទៅនឹងផែនការជាតិទសវត្សរ៍សុវត្ថិភាព ចរាចរណ៍ផ្លូវគោកឆ្នាំ២០២១-២០៣០ និងការអំពាវនាវរបស់រាជរដ្ឋាភិបាលកម្ពុជា សូមឱ្យ ស្ថាប័នពាក់ព័ន្ធរួមគ្នាចូលរួមកាត់បន្ថយអត្រាស្លាប់ របួសធ្ងន់ និងពិការដោយសារគ្រោះថ្នាក់ ចរាចរណ៍ក្នុងព្រះរាជាណាចក្រកម្ពុជាតាមតែអាចធ្វើទៅបាន។ គ្រោះថ្នាក់ចរាចរណ៍ជាបញ្ហាប្រឈមចម្បងមួយ បានសំលាប់ប្រជាពលរដ្ឋខ្មែរជាច្រើនពាន់នាក់ក្នុង១ឆ្នាំៗ។តាមរយៈរបាយការណ៍របស់អគ្គស្នងការនគរបាលចរាចរណ៍ នៅក្នុងឆ្នាំ២០២៣ កន្លង ទៅនេះបានបង្ហាញថា ករណីគ្រោះថ្នាក់ចរាចរណ៍មានការកើនឡើង ១១ភាគ បណ្តាលឱ្យ មានមនុស្សស្លាប់ជិត ១៦០០នាក់។បុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់នៅពេលខាងមុខនេះ លោកជំទាវ លំ គន្ធារី អនុប្រធានអចិន្រ្តៃយ៍គណៈកម្មាធិការសាខា បានបួងសួងដល់ ទេវតាឆ្នាំថ្មី ព្រះនាមមហោទរាទេវី ដែលជាបុត្រីទី ៧របស់កបិលមហាព្រហ្ម សូមប្រទានពរ ជ័យជូនក្មួយៗនិងបងប្អូនទាំងអស់ទៅដល់ទីណាសូមមានសុវត្ថិភាព និងពុទ្ធពរទាំងបួន ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ សូមបញ្ជាក់ថា យុទ្ធនាការនេះ ធ្វើឡើងក្នុងបរិវេណសួនច្បារដាវដែកកំពង់ស្វាយ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ និងមានសំណួរ-ចម្លើយ ដើម្បីដាស់ស្មារតី ដល់បងប្អូនប្រជាពលរដ្ឋឱ្យចូលរួមគោរពច្បាប់ចរាចរណ៍ផ្លូវគោកទាំងអស់គ្នា ដើម្បី សុវត្ថិភាពរបស់ខ្លួនផងដែរ និងមានរង្វាន់លើកទឹកចិត្តទៀងផង៕