ភ្នំពេញ ៖ នៅក្នុងគម្រោងផែនការមេរបស់រាជរដ្ឋាភិបាលកម្ពុជាក្នុងការអភិវឌ្ឍហេដ្ឋារចនាសម្ព័ន្ធទាំង១៧៤គម្រោង ដែលត្រូវការថវិកាប្រមាណជិត៤០លានដុល្លារអាមេរិក ក្នុងនោះគម្រោងអភិវឌ្ឍន៍ផ្លូវថ្នល់ត្រូវការថវិកាប្រមាណ១៣,៦ពាន់លានដុល្លារអាមេរិក ។បើតាមបញ្ជីគម្រោងដឹកជញ្ជូនមធ្យោបាយក្នុងផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរ និងភស្តុភារកម្មកម្ពុជា ឆ្នាំ ២០២៣ ដល់ឆ្នាំ ២០៣៣ ឃើញគម្រោងផ្លូវថ្នល់មានចំនួនច្រើនជាងគេរហូតដល់៩៤គម្រោងនិងត្រូវការទឹកប្រាក់វិនិយោគចំនួន១៣,៦ពាន់លានដុល្លារអាមេរិក ។ ក្នុងចំណោមគម្រោង៩៤គម្រោងនោះ ត្រូវបែងជាគម្រោងរយៈពេលខ្លីនិងមធ្យម ពោលគឺគិតចាប់ពីឆ្នាំ ២០២៣ ដល់ឆ្នាំ ២០២៧ និងគម្រោងរយៈពេលវែង គិតចាប់ពីឆ្នាំ ២០២៨ ដល់ឆ្នាំ ២០៣៣ ។ បើតាមផែនការមេឃើញ គម្រោងផ្លូវល្បឿនលឿនត្រូវប៉ាន់ស្មានថាមានទុនវិនិយោគចំនួន៧,១៧ពាន់លានដុល្លារអាមេរិក លើគម្រោងចំនួន៩គម្រោង ក្នុង ៤គម្រោងស្ថិតក្នុងគម្រោងរយៈពេលខ្លីនិងមធ្យម ដែលមានទឹកប្រាក់ចំនួន ៤,១៨ពាន់លានដុល្លារអាមេរិក និង៥គម្រោង ស្ថិតនៅក្នុងគម្រោងរយៈពេលវែង ដែលត្រូវការទឹកប្រាក់ចំនួនជិត៣ពាន់លានដុល្លារអាមេរិក ដោយឡែកសម្រាប់គម្រោងផ្លូវជាតិផ្លូវខេត្ត និងផ្លូវសំខាន់ៗទៀត ត្រូវការទឹកប្រាក់ប្រមាណ៦,៤២ពាន់លានដុល្លារអាមេរិក។ដោយមានគម្រោងសរុបចំនួន៨៥គម្រោង ក្នុងចំណោមគម្រោងទាំង៨៥គម្រោងនោះ ៣១គម្រោងជាគម្រោងរយៈពេលខ្លីនិងមធ្យម ដែលត្រូវការទឹកប្រាក់ចំនួនជិត៣ពាន់លានដុល្លារអាមេរិក និងគម្រោង៥៤គម្រោងផ្សេងទៀត ជាគម្រោងរយៈពេលវែងគិតចាប់ពីឆ្នាំ ២០២៨ ដល់ឆ្នាំ ២០៣៣ ដែលត្រូវការទឹកប្រាក់ប្រមាណ៣,៤ពាន់លានដុល្លារអាមេរិក ៕