កំពត ថ្ងៃទី១៩ ខែកុម្ភៈ ឆ្នាំ២០២៤--ដោយយោងតាមសំណូមពរ ក៏ដូចជាការផ្តល់មតិជាច្រើនពីសំណាក់មហាជន ពាក់ព័ន្ធនឹងស្លាកសញ្ញាលំណត់ល្បឿនមានទំហំតូច មើលមិនច្បាស់នោះ ខណ:នេះស្នងការដ្ឋាននគរបាលខេត្តកំពតនឹងដំឡើងស្លាកសញ្ញាកំណត់ល្បឿនដែលមានទំហំធំ សម្រាប់ ឱ្យអ្នកដំណើរងាយស្រួលមើលឃើញយ៉ាងជាក់ច្បាស់ ។ពាក់ព័ន្ធនឹងដាក់ស្លាកសញ្ញាកំណត់ល្បឿនខាងលើ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានឱ្យដឹងនៅព្រឹកថ្ងៃអាទិត្យ ៩កើត ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែកុម្ភ:ឆ្នាំ២០២៤ថា ផ្ទាំងស្លាកសញ្ញាកំណត់ល្បឿន ដែលនឹងយកទៅដាក់នោះមានទំហំ ១,៥០ម៉ែត្រ x ១,៥០ម៉ែត្រ មានចំនួន ៣ផ្ទាំង សម្រាប់ដាក់បង្ហាញចាប់ពីព្រំប្រទល់ នរាយណ៍ ស្រុកឈូក រហូតដល់ខ្លោងទ្វារចូលក្រុង នៃខេត្តកំពត ដែលមានចម្ងាយ៥០គីឡូម៉ែត្រ ។ លោកស្នងការបានបញ្ជាក់ទៀតថា ទីតាំងដាក់ស្លាកសញ្ញា ត្រូវបានដាក់បីទីតាំង គោលដៅទី១(ចន្លោះគីឡូម៉ែត្រ ៩៨-៩៩) ស្ថិតក្នុងភូមិពស់ពង ឃុំនរាយណ៍ ស្រុកឈូក ខេត្តកំពត, ។ គោលដៅទី២(ចន្លោះគីឡូម៉ែត្រលេខ១១៦-១១៧)ស្ថិតក្នុងភូមិត្រពាំងរាំង ឃុំអង្គរមាស ស្រុកដងទង់ ខេត្តកំពត និងគោលដៅទី៣(ចន្លោះគីឡូម៉ែត្រលេខ១៣២-១៣៣) ស្ថិតក្នុងភូមិព្រៃថ្នង ឃុំព្រៃថ្នង ស្រុកទឹកឈូ ខេត្តកំពត ។ លោកស្នងការបានបន្ថែមថា ចំពោះការបាញ់ល្បឿន លោកបានណែនាំដល់មន្ត្រីអនុវត្តន៍ច្បាប់ដោយមិនតម្រូវឱ្យមានការលួចឆ្មក់នៅក្នុងរថយន្ត ឬពួនលបបាញ់ល្បឿននៅតាមគម្ពោតព្រៃនោះឡើយ ហើយបើមានករណីបែបនេះ សូមមហាជន ឬអ្នកដំណើរថតដើម្បីលោកមានវិធានការអនុវត្តន៍ វិន័យកងកម្លាំងនគរបាលជាតិ ដល់បុគ្គលដែលប្រព្រឹត្តខុស ។