ពិធីចុះអនុស្សរណៈលើការយោគយល់ ស្តីពីកិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ Verify.gov.kh ការរៀបចំហេដ្ឋារចនាសម្ព័ន្ធ ការតភ្ជាប់អ៊ីនធឺណេត និងការលើកកម្ពស់សមត្ថភាពផ្នែកឌីជីថលជូនមន្ត្រីរាជការ រវាងក្រសួងសាធារណការ និងដឹកជញ្ជូន ជាមួយនឹងក្រសួងប្រៃសណីយ៍ និងទូរគមនាគមន៍ រាជធានីភ្នំពេញ៖ នាព្រឹកថ្ងៃព្រហស្បតិ៍ ទី០៨ ខែកុម្ភៈ ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាហត្ថលេខី ក្នុងពិធីចុះអនុស្សរណៈលើការយោគយល់ ស្តីពីកិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ Verify.gov.kh ការរៀបចំហេដ្ឋារចនាសម្ព័ន្ធ ការតភ្ជាប់អ៊ីនធឺណេត និងការលើកកម្ពស់សមត្ថភាពផ្នែកឌីជីថលជូនមន្ត្រីរាជការ ជាមួយក្រសួងប្រៃសណីយ៍ និងទូរគមនាគមន៍ ដែលមាន ឯកឧត្តមរដ្ឋមន្ត្រី ជា វ៉ាន់ដេត ជាហត្ថលេខី ដោយពិធីនេះបានប្រព្រឹត្តទៅនៅទីស្តីការក្រសួងប្រៃសណីយ៍ និងទូរគមនាគមន៍។ ស្របពេលជាមួយគ្នានេះ ក្រសួងកិច្ចការនារី ដឹកនាំដោយ លោកជំទាវកិត្តិបណ្ឌិតរដ្ឋមន្ត្រី អ៊ឹង កន្ថាផាវី ជាហត្ថលេខី ក៏បានអញ្ជើញចុះហត្ថលេខាលើ អនុស្សរណៈលើការយោគយល់ ជាមួយក្រសួងប្រៃសណីយ៍ និងទូរគមនាគមន៍ ផងដែរ។ ក្នុងពីធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ ព្រមទាំងលោក លោកស្រី អ្នកនាងកញ្ញា ជាមន្ត្រីរាជការនៃក្រសួងទាំងបី សរុបប្រមាណ ២០០រូប។ អនុស្សរណៈដែលក្រសួងសាមីទាំងបី បានចុះហត្ថលេខា គឺជាការប្តេជ្ញាចិត្តរបស់ក្រសួង/ស្ថាប័នចំណុះឱ្យរាជរដ្ឋាភិបាល ក្នុងការចូលរួមអនុវត្ត គោលនយោបាយរដ្ឋាភិបាលឌីជីថលកម្ពុជា ២០២២-២០៣៥ សំដៅជំរុញការធ្វើបរិវត្តកម្មរដ្ឋាភិបាលឌីជីថល និងការផ្តល់សេវាសាធារណៈជូនប្រជាពលរដ្ឋឱ្យកាន់តែមានភាពល្អប្រសើរ និងប្រសិទ្ធភាពខ្ពស់។ ថ្នាលផ្ទៀងផ្ទាត់ឯកសារនេះ រំពឹងថានឹងរួមចំណែកក្នុងការលុបបំបាត់ការក្លែងបន្លំឯកសារ ដែលចូលរួមដោះស្រាយបាននូវបញ្ហា ដែលកំពុងជួបប្រទះ ផ្តល់ភាពងាយស្រួលក្នុងការប្រើប្រាស់ ងាយស្រួលក្នុងការគ្រប់ គ្រងព័ត៌មាននានា និងផ្ទៀងផ្ទាត់ភាពត្រឹមត្រូវនៃឯកសារ ផ្តល់នូវទំនុកចិត្ត ចំណេញពេលវេលា និងកាត់បន្ថយការចំណាយក្រៅផ្លូវការនានា ព្រមទាំងជំរុញការធ្វើបរិវត្តកម្មឌីជីថល ស្របតាមឧត្តមានុវត្តជាអន្តរជាតិ។ ថ្លែងទៅកាន់អង្គពិធី ឯកឧត្តមរដ្ឋមន្ត្រី បានលើកឡើងថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ស្វាហាប់ និងឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវ យុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព ដោយផ្តោតសំខាន់លើរបៀបវារៈ ធានាប្រសិទ្ធភាព សមិទ្ធកម្ម និងបានកំណត់យកអាទិភាពគន្លឹះ ៥ គឺ ៖ មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសគឺ បច្ចេកវិទ្យាឌីជីថល សម្រាប់ឆ្លើយតបទៅនឹងបរិវត្តឧស្សាហកម្មទី៤ និងបរិវត្តកម្មឌីជីថលនៃសេដ្ឋកិច្ច និងសង្គមកម្ពុជា។ បច្ចុប្បន្ននេះ ក្រសួងសាធារណការ និងដឹកជញ្ជូន បានខិតខំប្រឹងប្រែងក្នុងការចាប់យកកាលានុវត្តភាពនៃការប្រើប្រាស់បច្ចេកវិទ្យាឌីជីថល ជាពិសេស ការផ្តល់សេវាសាធារណៈដែលជាយន្តការមួយដើម្បីគាំទ្រទៅដល់គោលដៅ និងចក្ខុវិស័យខាងលើតាមរយៈការពង្រឹង និងបង្កើនប្រសិទ្ធភាពនៃ ការផ្តល់សេវាសាធារណៈតាមប្រព័ន្ធឌីជីថល ដែលមានលក្ខណៈលឿនរហ័ស និងមានតម្លាភាព។ ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានធ្វើការវាយតម្លៃខ្ពស់ និងកោតសរសើរជូនដល់ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ អគ្គនាយកដ្ឋានដឹកជញ្ជូនផ្លូវគោក និងអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងមន្ត្រីជំនាញពាក់ព័ន្ធ នៃក្រសួងសាធារណការ និងដឹកជញ្ជូន ដែលបានខិតខំសហការបម្រើសេវាជូនប្រជាពលរដ្ឋ និងរៀបចំប្រព័ន្ធបច្ចេកវិទ្យា សម្រាប់ការផ្តល់សេវាសាធារណៈ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube