មន្រ្តីសាខាពន្ធដារ ខេត្តកោះកុង អះអាងថា ខ្លួនរកឃើញម្ចាស់យានយន្តដែលមិនបានបំពេញកាតព្វកិច្ចបង់ពន្ធលើមធ្យោបាយដឹកជញ្ជូនសម្រាប់ឆ្នាំ២០២៣ មានតិចតួចប៉ុណ្ណោះតាមដងផ្លូវសាធារណៈ។ជិត១សប្តាហ៍នៃប្រតិបត្តិការត្រួតពិនិត្យពន្ធលើមធ្យោបាយដឹកជញ្ជូនឆ្នាំ២០២៣ តាមបណ្តោយផ្លូវជាតិលេខ៤៨ ចំណុចអូរស្រីស្រណោះ ភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ មន្រ្តីពន្ធដារខេត្តកោះកុង បានឱ្យដឹងថា មានតិចតួចនោះទេដែលម្ចាស់យានយន្តទាំងនោះមិនបានបំពេញកាតព្វកិច្ចរបស់ខ្លួន។លោក ឡុង ស៊ីប៉ូ អនុប្រធានសាខាពន្ធដារខេត្តកោះកុង បានឱ្យដឹងនៅថ្ងៃទី២៣ ខែមករា ឆ្នាំ២០២៤ នេះ ថា មន្រ្តីរបស់លោក បានរកឃើញម្ចាស់យានយន្ត ៣ទៅ ៥គ្រឿង ដែលមិនបានបង់ពន្ធលើមធ្យោបាយដឹកជញ្ជូនឆ្នាំ២០២៣ កន្លងទៅ ដោយមានការផាកពិន័យជាក់ស្តែងតែម្តង។លោកអនុប្រធានសាខាពន្ធដារខេត្តកោះកុង បន្តថា ការដែលរកឃើញចំនួនយានយន្តមិនបានបង់ពន្ធមានតិចតួចយ៉ាងដូច្នេះ អាចសន្និដ្ឋានបានថា ពលរដ្ឋជាម្ចាស់យានយន្ត គឺមានការយល់ដឹងច្រើនពីការចូលរួមបង់ពន្ធជូនរដ្ឋតាមច្បាប់កំណត់។ ត្រង់ចំណុចនេះ ពុំមែនមានន័យថា ឈប់ទទួលការបង់ពន្ធនោះទេ ម្ចាស់យានយន្តដែលខកខានបង់ពន្ធនៅតែបន្តទៅពន្ធបានតាមប្រព័ន្ធអនឡាញ ឬទៅកាន់សាខាពន្ធដារផ្ទាល់ ប៉ុន្តែគ្រាន់តែមានទទួលផាកពិន័យប៉ុណ្ណោះ។នៅឆ្នាំ២០២៣ កន្លងទៅនេះ សាខាពន្ឋដារខេត្តកោះកុង ប្រមូលពន្ឋលើមធ្យោបាយដឹកជញ្ជូនបានចំនួន៦.៩៦៩គ្រឿង ស្មើនឹងថវិកាចូលរដ្ឋ ៣.៤១៥លានរៀល។ បើធៀបនឹងឆ្នាំ២០២២ គឺកើនឡើងចំនួន៣៧០គ្រឿង គិតជាថវិកាកើន ៤២លានរៀល។ក្នុងនោះដែរ ក៏មានការផាកពិន័យចំពោះម្ចាស់យានយន្តដែលខកខានមកបង់ពន្ធលើមធ្យោបាយដឹកជញ្ចូនចំនួន ៨៤គ្រឿង បើគិតជាថវិកា ៣៤លានរៀល។ យានយន្តរដ្ឋលើកលែងការបង់ពន្ធលើមធ្យោបាយដឹកជញ្ជូន រួមមាន៖ ម៉ូតូ រថយន្តសង្គ្រោះបន្ទាន់ រថយន្តយោធា នគរបាល គ្រឿងយន្តធ្វើកសិកម្ម រថយន្តស្ថានទូត និងរថយន្តដែលប្រើប្រាស់ដោយអង្គការអន្តរជាតិនានា៕