ភ្នំពេញ៖ មន្រ្ដីជាន់ខ្ពស់ក្រសួងសាធារណការ និងដឹកជញ្ជូនបានអះអាងថា គម្រោង​កែលម្អ​ផ្លូវជាតិ​លេខ​ ៤ ​ដែល​ជា​ច្រក​សេដ្ឋកិច្ច​ដ៏សំខាន់​របស់​ប្រទេស​កម្ពុជា​ ​នឹង​ចាប់ផ្តើម​នៅ​ដើម​ឆ្នាំ​២០១៩ ខាងមុខ បន្ទាប់ ពីរាជរដ្ឋាភិបាលទទួល​បាន​កម្ចី​ឥណទានសម្បទានពីធនាគារពិភពលោកចំនួន១១០លានដុល្លារ។ ឯកឧត្តម នូ វឌ្ឍនៈ អ្នកនាំពាក្យក្រសួងសាធារណការ និងដឹកជញ្ជូនបានប្រាប់ទូរទស្សន៍ រស្មី ហង្សមាស នាព្រឹកថ្ងៃទី១៧ ខែកក្កដានេះថា ការកែលម្អ​ផ្លូវជាតិលេខ៤នេះ រួម​មាន​ការរៀបចំ​កែលម្អ​ចិញ្ចើម​សង​ខាង​ផ្លូវ​ដាក់​លូ​បង្ហូរទឹក និង​ធ្វើ​ស្ពាន​ និង​ការផ្តោត​ទៅ​លើ​ការបង្កើន​គុណភាព​ស្ថានីយ​ថ្លឹង​រថយន្ត ​ដើម្បី​កាត់បន្ថយ​ហានិភ័យ​នៃ​ការដឹក​លើស​ទម្ងន់ ដំឡើង​ស្លាក​សញ្ញា​ចរាចរណ៍ ​ប្រព័ន្ធ​ភ្លើង​បំភ្លឺ​ដោយ​ប្រើ​ថាមពល​ពន្លឺ​ព្រះអាទិត្យ និង​កាមេរ៉ា​ចាប់​ល្បឿន​បើកបរ​ជាដើម​។ ឯកឧត្តមបានបញ្ជាក់ថា ផ្លូវនេះគឺជាផ្លូវសេដ្ឋកិច្ច និងជាសរសៃឈាមក្នុងការដឹកជញ្ជូន ហើយ ការកែលម្អផ្លូវជាតិលេខ៤នេះ គឺមិនប៉ះពាល់ដល់ការស្ថាបនាផ្លូវល្បឿនលឿននោះទេ ដោយសារតែផ្លូវ ល្បឿនលឿនជាការវិនិយោគរបស់ក្រុមហ៊ុនចិន ទៅលើខ្សែផ្លូវថ្មីផ្សេងមួយទៀត។ ឯកឧត្តមបានបន្ដថា គម្រោងនេះ នឹង​ចាប់ផ្តើម​ធ្វើការកែលម្អ​ឡើង​វិញ និងជួសជុលខួបតាម កន្លែងដែលមានការខូចខាតខ្លាំង​នៅ​ដើម​ឆ្នាំ២០១៩ ដែលត្រូវ​ចំណាយ​ពេល​ រយៈពេល១៨ខែ ហើយ​ពង្រឹង​ទៅ​លើ​ខឿន​ផ្លូវ​ដែល​មាន​ស្រាប់ក្នុងផ្លូវចាស់ និង​ចាក់អ៊ុត​កៅស៊ូ​បន្ថែម​នៅ​លើ​ចិញ្ចើម​ផ្លូវ​ ហើយ ផ្លូវនេះ​មិនមែន​ជា​ការពង្រីក​ផ្លូវ​បន្ថែម​នោះ​ទេ​។ ​ ឯកឧត្តមបានលើកឡើងថា ការកែលម្អផ្លូវជាតិលេខ៤នេះ នឹង​មិន​មាន​ការពង្រីក​បន្ថែម​ថ្មីទៀត ទេ ប៉ុន្ដែអាចពង្រីកអ៊ុតកៅស៊ូនៅលើចិញ្ចើមផ្លូវគ្រូសក្រហមខ្លះៗដែរ ជាពិសេសការកសាងស្ពានបន្ថែម ឬបើកមុខទឹកឱ្យបានធំជាងមុន ខណៈ​ពេលដែលបច្ចុប្បន្នមានការលិចទឹកហូរកាត់តាមដងផ្លូវនៅ កន្លែងមួយចំនួន និងបានកើតឡើងជារៀងរាល់ឆ្នាំក្នុងពេលកន្លងមក។ មន្រ្ដីជំនាញក្រសួងសាធារណការបានឱ្យដឹងដែរថា គម្រោងកែលម្អផ្លូវជាតិលេខ៤នេះ នឹងរួម ចំណែកយ៉ាងសំខាន់ដល់ការពង្រឹង សមត្ថភាពប្រកួតប្រជែង និងទ្រទ្រង់​កំណើនសេដ្ឋកិច្ចរបស់កម្ពុជា តាមរយៈការតភ្ជាប់ផ្ទៃក្នុងរបស់កម្ពុជាទៅកាន់ខេត្តព្រះសីហនុ ដែលជាប៉ូលសេដ្ឋកិច្ចដ៏សំខាន់ និងជា ខេត្តគោលដៅក្នុងការប្រែក្លាយឱ្យទៅជាតំបន់សេដ្ឋកិច្ចពិសេសគំរូពហុបំណង ដូចបានកំណត់ក្នុងយុទ្ធ សាស្រ្តស្នូលគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥ របស់រាជរដ្ឋាភិ បាល។ សូមរម្លឹកថា កាលពីដើមខែកក្កដា ឆ្នាំ២០១៨នេះ ធនាគារពិភពលោក និងរាជរដ្ឋាភិបាល កម្ពុជាបានចុះហត្ថលេខាលើកិច្ចព្រមព្រៀងផ្ដល់​កម្ចី​ឥណទានសម្បទាន សម្រាប់គម្រោងគ្រប់គ្រង សម្បត្តិផ្លូវថ្នល់ ជំហានទី២ ជាហិរញ្ញប្បទានបន្ថែមលើគម្រោងបច្ចុប្បន្ន ដែលគ្រោងចំណាយថវិកា សរុបចំនួន១១៣លានដុល្លារអាម៉េរិក ក្នុងនោះឥណទានសម្បទានពីធនាគារពិភពលោកចំនួន១១០ លានដុល្លារ និងថវិកាបដិភាគរាជរដ្ឋាភិបាលចំនួន៣លានដុល្លារ សម្រាប់វិនិយោគលើការស្តារ និង ពង្រីកផ្លូវជាតិលេខ ៤ ពីរាជធានីភ្នំពេញដល់ទីរួមខេត្តព្រះសីហនុ ក្នុងប្រវែងសរុប២០៦គីឡូម៉ែត្រ ដោយពង្រីកតួផ្លូវ បច្ចុប្បន្នពីទំហំ៧ម៉ែត្រ ឱ្យដល់១១ម៉ែត្រ និងចាក់អ៊ុតកៅស៊ូប្រភេទ Asphalt Concret – AC ៕