ឯកឧត្តម ឡេង ធនយុទ្ធា រដ្ឋលេខាធិការ ដឹកនាំគណៈប្រតិភូកម្ពុជាចូលរួម កិច្ចប្រជុំលើកទី៨ របស់គណៈកម្មការរួម សម្រាប់កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែន នៃបណ្ដាប្រទេសមហាអនុតំបន់មេគង្គ សាធារណរដ្ឋប្រជាមានិតចិន៖ ថ្ងៃទី១២-១៣ ខែធ្នូ ឆ្នាំ២០២៣ ឯកឧត្តម ឡេង ធនយុទ្ធា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជា រួមមានឧត្តមមន្ត្រី និងមន្ត្រីជំនាញរបស់ក្រសួងសាធារណការ និងដឹកជញ្ជូន និងតំណាងអន្តរក្រសួង-ស្ថាប័ន អញ្ជើញមកពីក្រសួងមហាផ្ទៃ ទីស្ដីការគណៈរដ្ឋមន្ត្រី ក្រុមប្រឹក្សាអភិវឌ្ឍន៍កម្ពុជា ក្រសួងពាណិជ្ជកម្ម អគ្គនាយកដ្ឋានគយ និងរដ្ឋាករកម្ពុជា ចូលរួមប្រជុំកិច្ចប្រជុំលើកទី៨ របស់គណៈកម្មការរួម សម្រាប់កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែន នៃបណ្ដាប្រទេសមហាអនុតំបន់មេគង្គ (8th Joint Committee Meeting for the Greater Mekong Subregion (GMS) Cross-Border Transport Facilitation Agreement (CBTA)។ កិច្ចប្រជុំនេះ ដឹកនាំជាសហប្រធានដោយ ឯកឧត្តម LI Yang អនុរដ្ឋមន្ត្រីក្រសួងដឹកជញ្ជូន នៃសាធារណរដ្ឋប្រជាមានិតចិន និងលោក Zhou Aiming នាយករងបេសកកម្មទទួលបន្ទុក នៃធនាគារអភិវឌ្ឍន៍អាស៊ី។ កិច្ចប្រជុំគណៈកម្មការរួមលើកទី៨ បានអនុម័តសម្រេចនូវឯកសារមួយចំនួន ដូចជា៖ ១).របាយការណ៍របស់ឧត្តមមន្ត្រី នៃគណៈកម្មាធិការជាតិសម្រួលការដឹកជញ្ជូនឆ្លងកាត់ព្រំដែន (NTFC-SOM) ដែលបានជំរុញលទ្ធផលការងារឱ្យដំណើរការទៅមុខ បន្ទាប់ពីខកខានដោយសារការរីករាលដាលនៃជម្ងឺកូវីដ-១៩ ក្រោយពីមានកិច្ចប្រជុំលើកទី៧ ដែលកម្ពុជា ជាម្ចាស់ផ្ទះ កាលពីឆ្នាំ២០១៩ ២).ផែនការ និងកាលវិភាគការងារ សម្រាប់ឆ្នាំ២០២៤-២០២៨ (CBTA Work Plan 2024-2028) ដើម្បីបន្តនិរន្តរភាពការងារ CBTA និង ៣).សេចក្ដីថ្លែងការណ៍ នៃកិច្ចប្រជុំលើកទី៨ របស់គណៈកម្មការរួមសម្រាប់កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube