[ENN] - ក្រសួងសាធារណការរៀបចំផែនការកសាងប្រព័ន្ធរំដោះទឹក សម្រាប់បញ្ចៀសការជន់លិចនៅទីក្រុងភ្នំពេញ
2023-10-06
Go to the website published ENN
ក្រោយការលើកឡើងរបស់ឯកឧត្តម ឃួង ស្រេង អភិបាលរាជធានីភ្នំពេញកាលពីថ្ងៃទី ៤តុលា កន្លងទៅ ក្រុមការងារក្រសួងសាធារណៈការនាពេលនេះបានរៀបចំនូវកិច្ចប្រជុំមួយដើម្បីពិភាក្សាពីផែនការក្នុងការកសាងប្រព័ន្ធរំដោះទឹក សម្រាប់បញ្ចៀសការជន់លិចភូមិសាស្ត្ររាជធានីភ្នំពេញ។
គោលបំណងសំខាន់នៃកិច្ចប្រជុំនេះ គឺការប្រមូលមតិយោបល់ ក៏ដូចជាធាតុចូលក្នុងការរៀបចំផែនការមេរំដោះទឹកនៅក្នុងរាជធានីភ្នំពេញ ដោយរំពឹងថានៅរយៈពេល៥ឆ្នាំក្រោយនឹងមិនឱ្យមានការជន់លិចបន្តទៀត ស្របតាមអនុសាសន៍ណែនាំរបស់សម្ដេចនាយករដ្ឋមន្ត្រី។
ម្យ៉ាងទៀត នេះក៏ជាការត្រៀមរៀបចំផែនការវិនិយោគហេដ្ឋារចនាសម្ព័ន្ធលូ និងប្រព័ន្ធរំដោះទឹក ដើម្បីបន្តកិច្ចប្រជុំនៅក្រសួងសេដ្ឋកិច្ច និងហិរញ្ញវត្ថុ នាពេលបន្ទាប់ផងដែរ។
គួររំលឹកថា រដ្ឋបាលរាជធានីភ្នំពេញបាននិងកំពុងរៀបចំជាគម្រោងធំមួយ ដើម្បីដោះស្រាយការលិចលង់ដោយជំនន់ទឹកភ្លៀងនៅភ្នំពេញ ឱ្យបានយូរអង្វែងចាប់ពី ២០ ទៅ ៣០ ឆ្នាំ និងត្រៀមលក្ខណៈពង្រីកលូប្រឡាយបង្ហូរទឹកពីតូចទៅធំ ព្រមទាំងដំឡើងស្ថានីយបូមទឹកថ្មីបន្ថែមទៀតដើម្បីបញ្ចៀសការជន់លិចនេះ។គម្រោងនេះ ត្រូវបានឯកឧត្តម ឃួង ស្រេង លើកឡើងក្នុងអំឡុងពេលដឹកនាំកិច្ចប្រជុំរៀបចំផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចនៅភូមិសាស្ត្ររាជធានីភ្នំពេញ ជាមួយអភិបាលខណ្ឌទាំង ១៤ និងមន្ទីរពាក់ព័ន្ធកាលពីថ្ងៃទី៤ ខែតុលា ឆ្នាំ ២០២៣។
គម្រោងនេះនឹងរៀបចំប្រព័ន្ធលូ ប្រឡាយឱ្យបានគ្រប់ជ្រុងជ្រោយ ដើម្បីឈានទៅរំដោះទឹកនៅក្នុងរាជធានីភ្នំពេញឱ្យបានកាន់តែល្អប្រសើរ និងប្រើប្រាស់បានយូរអង្វែង ពិសេសការបង្វែរផ្លូវទឹកពីខេត្តកំពង់ស្ពឺ កុំចូលមករាជធានីភ្នំពេញ។
បើតាមឯកឧត្តម ឃួង ស្រេង តាមគោលការណ៍ណែនាំរបស់សម្ដេចនាយករដ្ឋមន្ត្រី ហ៊ុន ម៉ាណែត រាជធានីភ្នំពេញក្នុងរយៈពេល ៤ ឆ្នាំ ត្រូវអភិវឌ្ឍហេដ្ឋារចនាសម្ព័ន្ធក្រោមដី ឱ្យបានល្អដោយធ្វើយ៉ាងណាកុំឱ្យមានការគំរាមកំហែងពីជំនន់ទឹកភ្លៀង។
យ៉ាងណាមិញ ការងារនេះរដ្ឋបាលរាជធានីភ្នំពេញនឹងប្រជុំជាមួយក្រសួងសេដ្ឋកិច្ច និងហិរញ្ញវត្ថុមន្ទីរសាធារណការនិងដឹកជញ្ជូន និងមន្ទីរធនធានទឹកនិងឧតុនិយមរាជធានីភ្នំពេញរៀបចំជាផែនការដាក់ទៅអន្តរក្រសួងដើម្បីអនុវត្តលើការងារនេះបន្តទៀត។
ក្នុងនោះ ក៏មានការគិតគូរចំពោះប្រព័ន្ធលូប្រឡាយដែលត្រូវកែលម្អឡើងវិញពិសេសគឺការពង្រីកប្រឡាយបង្ហូរទឹកពីតូចទៅធំការដំឡើងស្ថានីយបូមទឹកឱ្យកាន់តែធំជាងមុននិងការដំឡើងស្ថានីយបូមទឹកថ្មីថែមទៀតផងដែរ៕
