[Koh Santepheap] - ផ្លូវ១ខ្សែប្រវែងជិត១០គីឡូម៉ែត្រ ស្របមាត់ស្ទឹងរហាត់ទឹក រងការខូចខាតដោយសារទឹកជំនន់រយៈពេល២ឆ្នាំមកហើយ ប្រជាពលរដ្ឋជួបការលំបាកក្នុងការធ្វើដំណើរ
2023-09-19
Go to the website published Koh Santepheap
ខេត្តបន្ទាយមានជ័យ ៖ ផ្លូវ១ខ្សែ ដែលមានប្រវែងជិត១០គីឡូម៉ែត្រ ស្របតាមមាត់ស្ទឹងរហាត់ទឹក និងបត់ត្រង់ រងការខូចខាតដោយសារទឹកជំនន់រយៈពេល២ឆ្នាំមកហើយ ធ្វើឱ្យប្រជាពលរដ្ឋជួបការលំបាកក្នុងការធ្វើដំណើរទៅមក ស្ថិតនៅក្នុងឃុំរហាត់ទឹក ឃុំបត់ត្រង់ ស្រុកមង្គលបូរី។
បើតាមប្រជាពលរដ្ឋ បានប្រាប់ឱ្យដឹងថា ផ្លូវ១ខ្សែស្របតាមមាត់ស្ទឹងត្រើយខាងកើត ដែលត.ភ្ជាប់ពីផ្លូវជាតិលេខ៥ ឃុំបត់ត្រង់ ទៅឃុំរហាត់ទឹកនោះ ត្រូវបានរងការខូចខាតរយៈពេល២ឆ្នាំមកហើយ ក្រោយរងគ្រោះដោយសារទឹកជំនន់បានបំផ្លាញ ធ្វើឱ្យប្រជាពលរដ្ឋពិតជាជួបការលំបាកក្នុងការធ្វើដំណើរទៅមកនារដូវវស្សា ជាពិសេសសិស្សានុសិស្សទៅសាលារៀន ដូច្នេះពលរដ្ឋសុំឱ្យអភិបាលស្រុក និងខេត្ត មន្ទីរស្ថាប័នពាក់ព័ន្ធ មេត្តាជួយមើល និងដោះស្រាយជូនប្រជាពលរដ្ឋផង បើមិនទាន់កសាង ត្រូវជួសជុល ឬសម្រួលឱ្យប្រជាពលរដ្ឋធ្វើដំណើរទៅមកបានស្រួលផង។
លោក ពិន សេងហាប់ អភិបាលរងស្រុកមង្គលបូរី បានប្រាប់ឱ្យដឹងដែរថា ផ្លូវ១ខ្សែស្របមាត់ស្ទឹងឃុំរហាត់ទឹក ភ្ជាប់ទៅឃុំបត់ត្រង់ ជាង៨គីឡូម៉ែត្រ រងការខូចខាតដោយសារទឹកជំនន់កាលពីឆ្នាំមុននោះ គឺឃើញអភិបាលខេត្តបន្ទាយមានជ័យ បានដឹកនាំមន្ទីរជំនាញចុះមកត្រួតពិនិត្យហើយ និងអាចជួសជុល ឬកសាងនៅពេលខាងមុខនេះផងដែរ ប៉ុន្តែមិនទាន់ដឹងថា តើនៅពេលណាឱ្យបានច្បាស់នៅឡើយទេ0x017d7 ព្រោះផ្លូវ១ខ្សែនេះ គ្រប់គ្រងដោយមន្ទីរអភិវឌ្ឍន៍ជនបទខេត្តបន្ទាយមានជ័យ។
លោក ជា យុទ្ធារុណ ប្រធានមន្ទីរអភិវឌ្ឍន៍ និងជនបទខេត្តបន្ទាយមានជ័យ ក៏បានបញ្ជាក់ដែរថា ផ្លូវ១ខ្សែ ប្រវែងជិ១០គីឡូម៉ែត្រ ត.ភ្ជាប់ពីឃុំរហាត់ទឹក មកឃុំបត់ត្រង់ ស្របមាត់ស្ទឹងខាងកើត ដែលរងការខូចខាតដោយសារទឹកជំនន់២ឆ្នាំកន្លងទៅជាប់គ្នានោះ មន្ទីរជំនាញបានធ្វើរបាយការណ៍ស្នើទៅក្រសួង និងបានចុះសិក្សាគម្រោងកសាងឡើងវិញនៅអំឡុងឆ្នាំ២០២៣.២០២៧ ក្នុងចំណោមផ្លូវចំនួន១៩ខ្សែ ដែលប្រវែងជិត៣០០គីឡូម៉ែត្រនៅទូទាំងខេត្តបន្ទាយមានជ័យ៕
