លោកជំទាវ កុយ សុដានី រដ្ឋលេខាធិការប្រចាំការ និងជាតំណាងរដ្ឋមន្រ្តី បានទទួលជួបពិភាក្សាការងារ ជាមួយគណៈប្រតិភូក្រុមហ៊ុន Management Venture Asia (MVA) ដើម្បីផ្លាស់ប្តូរព័ត៌មាន និងបង្ហាញនូវបទពិសោធន៍លើការងារសិក្សា ការគូសប្លង់រចនា និងការវិនិយោគបណ្តាញដែក សំណង់ស្ថានីយ និងអគារ និងហេដ្ឋារចនាសម្ព័ន្ធពាក់ព័ន្ធផ្សេងៗទៀត ទីស្តីការក្រសួង៖ នៅព្រឹកថ្ងៃសុក្រ ទី១៥ ខែកញ្ញា ឆ្នាំ២០២៣ លោកជំទាវ កុយ សុដានី រដ្ឋលេខាធិការប្រចាំការ និងជាតំណាងរដ្ឋមន្រ្តី និងថ្នាក់ដឹកនាំក្រសួង បានទទួលជួបពិភាក្សាការងារជាមួយ គណៈប្រតិភូក្រុមហ៊ុន Management Venture Asia (MVA) ដឹកនាំដោយ លោក SALAH ESSA។ ក្នុងឱកាសនោះដែរ ក៏មានការអញ្ជើញចូលរួមពីតំណាងក្រុមហ៊ុនដៃគូផ្សេងទៀត ដូចជាក្រុមហ៊ុន K.L Consult Associates Sdn. Bhd ក្រុមហ៊ុន PANNA GROUP ក្រុមហ៊ុន CAPITAM M SOLUTTION PLT ។ ជំនួបពិភាក្សានេះធ្វើឡើងក្នុងគោលបំណងដើម្បីបង្កើតកិច្ចសហការជាមួយ ក្នុងការគាំទ្របច្ចេកទេស ការចែករំលែកចំណេះដឹង និងការបណ្តុះបណ្តាលលើការងារសិក្សា ការគូសប្លង់រចនា និងការវិនិយោគ បណ្តាញដែក សំណង់ស្ថានីយ និងអគារ និងហេដ្ឋារចនាសម្ព័ន្ធពាក់ព័ន្ធផ្សេងៗទៀត។ ក្រោយពីបានស្តាប់នូវបទបង្ហាញស្តីពីស្ថានភាព និងបទពិសោន៍របស់ក្រុមហ៊ុន អង្គប្រជុំក៏បានផ្លាស់ប្តូយោបល់ និងពិគ្រោះពិភាក្សាគ្នាអំពីស្ថានភាពបច្ចុប្បន្ន បទពិសោធន៍នៃការអភិវឌ្ឍវិស័យដែក ក្នុងតំបន់ និងប្រទេសជិតខាង ពិសេស អំពីជំហរ គោលនយាបាយ និងផែនការវិនិយោគរបស់រដ្ឋាភិបាលប្រទេសក្នុងតំបន់ និងប្រទេសជិតខាង ដូចជាម៉ាឡេស៊ី ថៃ វៀតណាម ឡាវ និងមីយ៉ាន់ម៉ា ក្នុងការអភិវឌ្ឍខ្សែដែកធម្មតា(ទទឹងចង្អៀត ១ម៉ែត្រ) និងខ្សែដែកល្បឿនលឿន(ទទឹងស្តង់ដា ១,៤៣ម៉ែត្រ) ការអភិវឌ្ឍស្ថានីយសម្រាប់អ្នកដំណើរ ការអភិវឌ្ឍស្ថានីយទំនិញ និងកុងតឺន័រ () ការធ្វើកុងតឺន័ររូបនីយកម្មសម្រាប់បណ្តាញដែក ការអភិវឌ្ឍបណ្តាញដែកក្នុងក្រុង ដែកតភ្ជាប់ទៅ និងអាកាសយានដ្ឋាន និងការតភ្ជាប់ដែកតំបន់ (ខ្សែដែកសិង្ហបុរី-គុនមីង) ជាដើម៕