ភ្នំពេញ ៖ អ្នកសេដ្ឋកិច្ចកម្ពុជាបានឱ្យដឹងថា គំនិតផ្តួចផ្តើមខ្សែក្រវាត់ និងផ្លូវ (BRI) របស់ចិនបានដើរតួនាទីយ៉ាងសំខាន់ក្នុងការជួយអភិវឌ្ឍហេដ្ឋារចនាសម្ព័ន្ធ និងការតភ្ជាប់របស់កម្ពុជា ដែលជាធាតុផ្សំសំខាន់សម្រាប់គាំទ្រពាណិជ្ជកម្ម និងទាក់ទាញការវិនិយោគ។ លោកបណ្ឌិត គិន ភា អ្នកជំនាញសេដ្ឋកិច្ច និងប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា មានថ្លែងប្រាប់សារព័ត៌មាន Xinhua ថា ក្រោមគំនិតផ្តួចផ្តើម BRI ប្រទេសចិនបានគាំទ្រគម្រោងធំមួយចំនួននៅកម្ពុជា ដូចជាផ្លូវជាតិ ស្ពានឆ្លងកាត់ទន្លេ ផ្លូវល្បឿនលឿន រោងចក្រវារីអគ្គិសនី តំបន់សេដ្ឋកិច្ចពិសេស អាកាសយានដ្ឋាន កំពង់ផែ និងពហុកីឡដ្ឋានសំខាន់មួយ។ លោកបានប្រាប់ថា៖ «គម្រោងខ្នាតធំទាំងនេះបានចូលរួមចំណែកយ៉ាងធំធេងក្នុងការលើកកម្ពស់ការតភ្ជាប់ ការធានានូវប្រភពផ្គត់ផ្គង់អគ្គិសនីប្រកបដោយនិរន្តរភាព ការលើកកម្ពស់ការប្រកួតប្រជែងផ្នែកសេដ្ឋកិច្ច ការធ្វើពិពិធកម្មប្រភពនៃកំណើន និងកាត់បន្ថយការចំណាយលើភស្តុភារក្នុងប្រទេសកម្ពុជា»។ លោកបណ្ឌិត គិន ភា បាននិយាយថា តំបន់សេដ្ឋកិច្ចពិសេសក្រុងព្រះសីហនុ (SSEZ) ដែលជាគម្រោងលេចធ្លោមួយនៅកម្ពុជាក្រោម BRI បានបង្កើតការងាររាប់ម៉ឺនកន្លែងសម្រាប់អ្នកក្នុងស្រុក និងបានរួមចំណែកក្នុងការជំរុញកំណើនការនាំចេញរបស់កម្ពុជា។ លោកបានបន្តថា ៖«ចាប់តាំងពីគម្រោងកិច្ចសហប្រតិបត្តិការក្រោម BRI ត្រូវបានដាក់ដំណើរការកាលពីមួយទសវត្សរ៍មុន ទំនាក់ទំនងពាណិជ្ជកម្ម និងការវិនិយោគរវាងកម្ពុជា និងចិនបានឈានដល់កម្រិតថ្មីមួយទៀត»។ លោកបន្តថា BRI រួមជាមួយនឹងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (FTA) នឹងជួយកម្ពុជាសម្រេចបាននូវចក្ខុវិស័យក្នុងការក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ2030 និងជាប្រទេសដែលមានចំណូលខ្ពស់នៅឆ្នាំ2050។ គំនិតផ្តួចផ្តើម BRI ដែលរយោងតាមគំនិតផ្តួចផ្តោមខ្សែក្រវាត់សេដ្ឋកិច្ចផ្លូវសូត្រ និងផ្លូវសូត្រសមុទ្រសតវត្សរ៍ទី 21 ត្រូវបានផ្តួចផ្តើមដោយប្រទេសចិនក្នុងឆ្នាំ 2013 ដើម្បីកសាងបណ្តាញពាណិជ្ជកម្ម និងហេដ្ឋារចនាសម្ព័ន្ធតភ្ជាប់អាស៊ីជាមួយអឺរ៉ុប និងអាហ្រ្វិក និងលើសពីផ្លូវពាណិជ្ជកម្មផ្លូវសូត្របុរាណ។ អ្នកនាំពាក្យក្រសួងការបរទេសចិនមួយរូប បាននិយាយកាលពីថ្ងៃទី 4 ខែសីហាថា ក្នុងរយៈពេលមួយទសវត្សរ៍កន្លងមកនេះ ប្រទេសជាង 150 និងអង្គការអន្តរជាតិជាង 30 បានចុះហត្ថលេខាលើឯកសារក្រោមក្របខ័ណ្ឌ BRI ។ លោកបណ្ឌិត គិន ភា បាននិយាយថា BRI បាននាំមកនូវអត្ថប្រយោជន៍យ៉ាងច្រើនដល់ប្រទេស ដែលចូលរួមទាំងអស់ ហើយបានក្លាយជាយុទ្ធសាស្ត្ររយៈពេលវែងមួយ ដើម្បីលើកកម្ពស់ការតភ្ជាប់ និងកិច្ចសហប្រតិបត្តិការក្នុងតំបន់ និងអន្តរតំបន់លើគ្រប់វិស័យ ដូចជា ហេដ្ឋារចនាសម្ព័ន្ធ ការតភ្ជាប់ សេដ្ឋកិច្ច ការវិនិយោគ ហិរញ្ញវត្ថុ និងការផ្លាស់ប្តូរប្រជាជន និងប្រជាជន។ លោកបណ្ឌិត បានបន្ថែមថា BRI ត្រូវបានគេមើលឃើញថាជាគំនិតផ្តួចផ្តើមសកលដែលនឹងកសាងផ្លូវសូត្រនៃសន្តិភាពឆ្ពោះទៅរកសកលភាវូបនីយកម្មសេដ្ឋកិច្ច ដែលមានភាពរស់រវើក បើកចំហរ ស្ថិរភាព និងនិរន្តរភាព៕