ភ្នំពេញ៖ មិត្តចិនតែងតែផ្ដល់ជំនួយដ៏ច្រើនសន្ធឹកសន្ធាប់ មកឱ្យកម្ពុជា នៅក្នុងការអភិវឌ្ឍន៍ ប្រទេសជាតិ លើគ្រប់វិស័យ នៅគ្រប់កាល​ទេសៈ រហូតមកទល់ បច្ចុប្បន្ន ជាពិសេសការអភិវឌ្ឍន៍ វិស័យហេដ្ឋារចនាសម្ព័ន្ធ រួមមានការកសាងផ្លូវថ្នល់ ប្រមាណជាង ៣.០០០ គីឡូម៉ែត្រ និងស្ពានធំៗ ចំនួន១០។ នេះជាការលើកឡើងរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណ ការ និងដឹកជញ្ជូននៅក្នុងជំនួបទ្វេភាគី ជាមួយ​លោក​ វ៉ាង យី សមាជិកការិយាល័យ នយោបាយ និងជាប្រធានការិយាល័យគណៈកម្មការកិច្ចការបរទេស នៃគណៈកម្មាធិ ការមជ្ឈិមបក្ស​កុម្មុយនីស្ត​ចិន និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន រវាងកម្ពុជា-ចិន កាលពីចុងសប្តាហ៍។ លោកទេសរដ្ឋមន្ត្រី ស៊ុន ចាន់ថុល ក៏បានគូសបញ្ជាក់ផងដែរថាៈ ចិនគឺជាមិត្តដែកថែប ហើយក្រោមគំនិតផ្តួចផ្តើមខ្សែក្រវាត់ និងផ្លូវរបស់ លោកប្រធានាធិបតីចិន ស៊ី ជីនពីង មិត្តចិន បានជួយកសាងហេដ្ឋារចនាសម្ព័ន្ធ ដ៏ច្រើននៅកម្ពុជា ជាពិសេសថ្មីៗនេះ មានដូចជា ផ្លូវល្បឿន​លឿនភ្នំពេញ-ក្រុងព្រះសីហនុ ផ្លូវល្បឿនលឿនភ្នំពេញ-ក្រុងបាវិត ការសិក្សាផ្លូវល្បឿនលឿន ភ្នំពេញ-សៀមរាប ការសិក្សាគម្រោងផ្លូវដែក​នៅកម្ពុជា និងគម្រោងព្រែកជីកហ្វូណនតេជោជាដើម។ លោកទេសរដ្ឋមន្ត្រី ស៊ុន ចាន់ថុល ក៏បានថ្លែងអំណរគុណយ៉ាងជ្រាលជ្រៅចំពោះជំនួយ របស់ភាគីចិន ដែលមានទឹកប្រាក់ ប្រមាណ ៣០០ ​លានយ័ន សម្រាប់គាំទ្រដល់ ការអភិវឌ្ឍន៍ និងស្ដារឡើងវិញវិស័យផ្លូវដែក នៅកម្ពុជាផងដែរ ជាពិសេសការជំរុញ ការកសាង ផ្លូវដែកល្បឿនលឿន​ភ្ជាប់ភ្នំពេញ-ប៉ោយប៉ែត ទៅប្រទេសថៃ ឡាវ និងចិន។ លោក វ៉ាង យី បានបង្ហាញអំពីការសង្ឃឹមជឿជាក់របស់លោកថា រាជរដ្ឋាភិបាលកម្ពុជា ថ្មី នឹងបន្តពង្រឹងទំនាក់ទំនងល្អ និងកិច្ចសហប្រតិបត្តិ​ការទ្វេភាគី កម្ពុជា-ចិន ឱ្យកាន់តែប្រសើរឡើងថែមទៀ ​ដែលក្នុងនោះភាគីចិន បានបង្ហាញជំហប្ដេជ្ញា បន្តផ្ដល់ការគាំទ្រដល់កម្ពុជា លើវិស័យសំខាន់ៗ ​ដូចជា ផលិតកម្ម កសិកម្ម ឧស្សាហកម្ម អគ្គិសនី អប់រំ និងសុខាភិបាល រួមទាំងវិស័យហេដ្ឋារចនាសម្ព័ន្ធ ដែលរួមមានដូចជា ការ​សាងសង់ផ្លូវល្បឿនលឿន បន្ថែមទៅបណ្ដាខេត្តសំខាន់ៗ ការអភិវឌ្ឍន៍វិស័យទឹកកខ្វក់ នៅខេត្តព្រះសីហនុ និងការអភិវឌ្ឍន៍ ផ្លូវដែកតភ្ជាប់ទៅ​ច្រ ​របៀងសេដ្ឋកិច្ចភាគខាងជើង និងតភ្ជាប់ទៅផ្លូវដែកថៃ-ឡាវជាដើម ជាពិសេសបន្ត ការជំរុញកិច្ចសហប្រតិបត្តិការ ក្រោមក្របខ័ណ្ឌ នៃគណៈកម្មាធិការអន្តររដ្ឋាភិបាល កម្ពុជា-ចិន ឱ្យកាន់តែមានភាពរលូន និងនាំមកនូវគម្រោង សម្រាប់អភិវឌ្ឍវិស័យ សំខាន់ៗ នៅកម្ពុជាបន្ថែមទៀត៕