ក្រចេះ៖ គិតត្រឹមចុងខែកក្កដា ឆ្នាំ២០២៣ ស្ពានឆ្លងកាត់ទន្លេមេគង្គទី១ នៅខេត្តក្រចេះ ដែលមានប្រវែង ១.៧៦១ម៉ែត្រ សម្រេចការសាងសង់បាន១៥%។ នេះបើយោងតាមប្រភព ពីមន្ទីរសាធារណការ និងដឹកជញ្ជូនខេត្តក្រចេះ បានឲ្យដឹង។ ស្ពាននេះ បានបើកការដ្ឋានសាងសង់ កាលពីថ្ងៃ២ ខែមករា ឆ្នាំ២០២៣ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រី ហើយគ្រោងនឹងបញ្ចប់ការសាងសង់ នៅខែមិថុនា ឆ្នាំ២០២៦ខាងមុខ។ ស្ពានឆ្លងកាត់ទន្លេមេគង្គទី១ នឹងតភ្ជាប់គ្នាចំនួនពីរស្រុកគឺស្រុកចិត្របុរី និងស្រុកព្រែកប្រសព្វ។ ស្ពានមួយនេះ សាងសង់ដោយក្រុមហ៊ុនសំណង់សៀងហៃ (SCG) និងត្រួតពិនិត្យដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន។ ស្ពានឆ្លងទន្លេមេគង្គ និងផ្លូវតភ្ជាប់នេះ ជាផ្នែកមួយនៃផ្លូវជាតិលេខ៦០B តភ្ជាប់ពីខេត្តក្រចេះ ទៅខេត្តកំពង់ធំ ព្រមទាំងដើរតួជាប្រព័ន្ធដឹកជញ្ជូនដ៏សំខាន់ រវាងផ្លូវជាតិលេខ៦ លេខ៧ លេខ៧១ និងលេខ៧៣ ដែលបន្ទាប់ពីសាងសង់រួច នឹងផ្តល់អត្ថប្រយោជន៍យ៉ាងធំធេង ដល់សេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការសម្រួលដល់ការធ្វើដំណើររបស់ប្រជាពលរដ្ឋ ភ្ញៀវទេសចរ និងការដឹកជញ្ជូនទំនិញ ឬកសិផលគ្រប់ប្រភេទបានកាន់តែលឿនទៅកាន់ទីផ្សារ៕