គម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ អនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្មទឹក កខ្វក់ក្រុងកំពង់ចាម ចំណាយថវិកាសាងសង់អស់ប្រមាណជាង២២លានដុល្លារសហរដ្ឋអាមេរិក សម្រាប់ការអភិវឌ្ឍលើវិស័យអនាម័យក្នុងខេត្តកំពង់ចាម នៅព្រឹកថ្ងៃទី១៦ ខែមិថុនា ឆ្នាំ២០២៣ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន និងដោយមានការអញ្ជើញចូលរួមពីឯកឧត្តម អ៊ុន ចាន់ដាអភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីក្នុងពិធីបើកការដ្ឋាន គម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ អនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្ម ទឹកកខ្វក់ក្រុងកំពង់ចាម ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី ស្ថិតនៅភូមិតាណេង សង្កាត់សំបួរមាស ក្រុងកំពង់ចាម ខេត្តកំពង់ចាម។ ពិធីនេះក៏មានវត្តមានចូលរួម ពីឯកឧត្តម លោក លោកស្រី ជាថ្នាក់ដឹកនាំក្រោមឱវាទក្រសួង តំណាងធនាគារអភិវឌ្ឍន៍អាស៊ីប្រចាំព្រះរាជាណាចក្រកម្ពុជា ឯកឧត្តម លោកជំទាវ លោក លោកស្រី ជាថ្នាក់ដឹកនាំ មន្ត្រីរាជការ មកពីក្រសួង ស្ថាប័ន អង្គភាព មន្ទីរ ពាក់ព័ន្ធនានា ជុំវិញខេត្ត និងបងប្អូនប្រជាពលរដ្ឋ ជាច្រើនរូប។ គម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ អនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្ម ទឹកកខ្វក់ក្រុងកំពង់ចាម ក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ី បានចាប់ផ្តើមអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងកំពង់ចាម អង្គភាពគ្រប់គ្រងគម្រោងក្រសួងសាធារណការ និងដឹកជញ្ជូន ត្រួតពិនិត្យបច្ចេកទេសដោយក្រុមហ៊ុន RAMBOLL DANMARK A/S សហការជាមួយក្រុមហ៊ុន Oriental Consultant Global Co., Ltd. ក្រុមហ៊ុន SCE និងក្រុមហ៊ុន Tancons (Cambodia) Co., Ltd. និងម៉ៅការសាងសង់ដោយក្រុម Beijing Urban Construction Group Co., Ltd (BUCG) ថវិកាសាងសង់ ២២ ០៤២ ៧៨០ ដុល្លារអាមេរិក ដែលចាប់ផ្តើមការងារសាងសង់នៅខែធ្នូ ឆ្នាំ២០២២ និងបញ្ចប់ការងារសាងសង់នៅខែធ្នូ ឆ្នាំ២០២៥។ ទីតាំងគម្រោងស្ថិតនៅក្នុងក្រុងកំពង់ចាម ខេត្តកំពង់ចាម។ ការងារសាងសង់ហេដ្ឋារចនាសម្ព័ន្ធរួមមាន៖ ការតភ្ជាប់ បណ្តាញទឹកកខ្វក់តាមផ្ទះ និងអគារការិយាល័យផ្សេងៗចំនួន ៣ ៩៦៥កន្លែង ប្រព័ន្ធបណ្តាញទុយោប្រមូល មេនិងរង ប្រវែង ៥១គ.ម ស្ថានីយបូមមេនិងរងចំនួន ៣កន្លែង ស្ថានីយប្រព្រឹត្តកម្មទឹកកខ្វក់ចំនួន ១កន្លែង មានសមត្ថភាព ៥ ០០០ម៉ែត្រគូប ក្នុងមួយថ្ងៃ និងប្រព័ន្ធលូរំដោះទឹកភ្លៀងរួមមាន៖ លូបង្ហូររៀបថ្មរាងអក្សរ V ប្រវែង ២ ៩២៩ម៉ែត្រ លូបេតុងប្រអប់ ប្រវែង ៩០៣ម៉ែត្រ លូបេតុងបូល ប្រវែង ២៤៤ម៉ែត្រ លូបេតុងរាង អក្សរ U ប្រវែង ៨៩,៩ម៉ែត្រ កន្លែងបង្ហូរចេញចំនួន ១កន្លែង និងស្ថានីយបូមចំនួន ១កន្លែង។ល។ ក្រោមការដឹកនាំប្រកបដោយភាពវៃឆ្លាត និងទស្សនវិស័យវែងឆ្ងាយ នៃរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ក្នុងការលើកកម្ពស់វិស័យអនាម័យ ដើម្បីធានាប្រយោជន៍សុខភាពសាធារណៈជាអតិបរមាពីការវិនិយោគអនាម័យនៅក្នុងទីក្រុង។ យើងសង្កេតឃើញថា គោលនយោបាយ និងយុទ្ធសាស្ត្រសំខាន់ៗជាច្រើនត្រូវបានដាក់ចេញ ដើម្បីពន្លឿនការអភិវឌ្ឍប្រកបដោយចីរភាព។ វិស័យទឹកកខ្វក់ត្រូវបានរាជរដ្ឋាភិបាលនៃព្រះរាជាណាចក្រកម្ពុជា ចាត់ទុកជាអាទិភាពខ្ពស់ ដូចដែលបានរៀបរាប់ក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ជាពិសេសក្នុងចតុកោណទី៤ (ការអភិវឌ្ឍប្រកបដោយចីរភាព និងនិរន្តរភាព) មុំទី៣ (ពង្រឹងផែនការ និងការគ្រប់គ្រងទីក្រុង) ចំណុចទី៣ (រៀបចំផែនការមេហេដ្ឋារចនាសម្ព័ន្ធសម្រាប់ទីក្រុង ដើម្បីគាំទ្រដល់ការអភិវឌ្ឍផ្លូវថ្នល់ ផ្លូវដែក និងផ្លូវទឹក ព្រមទាំងបណ្តាញអគ្គិសនី បណ្តាញទឹកស្អាត ជាពិសេសប្រព័ន្ធលូ និងប្រព័ន្ធចម្រោះទឹកកខ្វក់)៕