ភ្នំពេញ៖ ស្ពានបេតុងខ្សែកាបឆ្លងកាត់ទន្លេសាប និងស្ពានអាកាសឫស្សីកែវ ត្រូវបានសម្ពោធឱ្យប្រើប្រាស់ជាផ្លូវការដោយសម្តេច ហ៊ុន សែន នៅថ្ងៃទី៣១ ខែឧសភា ឆ្នាំ២០២៣។ ស្ពានទាំងពីរនេះគឺជាស្ពានដែលដើរតួនាទីយ៉ាងសំខាន់ សម្រាប់ការធ្វើដំណើររបស់ប្រជាពលរដ្ឋរវាងផ្លូវជាតិលេខ៥ និងលេខ៦ ក៏ដូចជាប្រជាពលរដ្ឋរស់នៅសងខាងនៃទន្លេសាប។ ស្ពានបេតុងខ្សែកាបឆ្លងទន្លេសាបនេះ បានបើកការដ្ឋានសាងសង់ កាលពីថ្ងៃទី២៣ ខែតុលា ឆ្នាំ២០១៧ក្រោមការអញ្ជើញចូលរួមរបស់សម្ដេច ហ៊ុន សែន។ ស្ពានបេតុងខ្សែកាបឆ្លងទន្លេសាប មានប្រវែង ៩២២ម៉ែត្រ ទទឹង២០,៥ម៉ែត្រ ចិញ្ចើមស្ពានសម្រាប់ថ្មើរជើងមានទទឹង ១,២៥ម៉ែត្រសងខាង, កម្ពស់សរសរស្ពាន សម្រាប់ព្យួរខ្សែកាបធៀបនឹង កម្រាលស្ពាន៣៤ម៉ែត្រ។ ស្ពាននេះ សាងសង់ដោយក្រុមហ៊ុន OCIC ដោយប្រើរយៈពេលសាងសង់ជាង ៦៨ខែ ដោយចំណាយថវិកាអស់ចំនួន ៣៥លានដុល្លារអាមេរិកដែលជាកញ្ចប់ថវិកា បានមកពីមូលនិធិតំបន់អភិវឌ្ឍន៍ជ្រោយចង្វារបស់ក្រុមហ៊ុនវិនិយោគទុនអាណិកជនកម្ពុជា (OCIC)។