កិច្ចប្រជុំពិនិត្យលើការងាររៀបចំគម្រោងស្ថាបនាហេដ្ឋារចនាសម្ព័ន្ធផ្លូវថ្នល់-ស្ពាន ក្នុងផែនការវិនិយោគបីឆ្នាំរំកិល ឆ្នាំ២០២៤-២០២៦ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ ថ្ងៃព្រហស្បតិ៍ ៦កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៥ ខែឧសភា ឆ្នាំ២០២៣ ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ និង ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន បានអញ្ជើញជាសហប្រធានដឹកនាំកិច្ចប្រជុំពិនិត្យ និងពិភាក្សាលើការងាររៀបចំគម្រោងស្ថាបនាហេដ្ឋារចនាសម្ព័ន្ធផ្លូវថ្នល់-ស្ពាន ក្នុងផែនការវិនិយោគបីឆ្នាំរំកិល ឆ្នាំ២០២៤-២០២៦ របស់ក្រសួង ដោយមានការចូលរួមពីអគ្គនាយករង នៃអគ្គនាយកដ្ឋានទាំងពីរ ប្រធាន-អនុប្រធាននាយកដ្ឋាន ប្រធាន-អនុប្រធានមន្ទីរ ព្រមទាំងមន្ត្រីបច្ចេកទេសពាក់ព័ន្ធជាច្រើនរូបផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យ និងពិភាក្សាជាមួយនឹងនាយកដ្ឋាន-មន្ទីរជំនាញ ដែលជាសេនាធិការលើពង្រាងបេក្ខភាពគម្រោងអាទិភាព ដើម្បីរៀបចំគម្រោងស្ថាបនា ស្ដារ និងជួសជុលហេដ្ឋារចនាសម្ព័ន្ធផ្លូវថ្នល់-ស្ពាន សម្រាប់ផែនការវិនិយោគបីឆ្នាំរំកិលឆ្នាំ២០២៤-២០២៦ របស់ក្រសួង ដោយបែងចែកតាមរាជធានី-ខេត្ត ថវិកាជំពូក២១ និងជំពូក៦១។ អង្គប្រជុំបានពិភាក្សាលើបេក្ខភាពគម្រោងអាទិភាពរបស់នាយកដ្ឋាន-មន្ទីរជំនាញ និងជំរុញឱ្យគោរពតាមគោលការណ៍ ដោយជ្រើសរើសគម្រោងអាទិភាពដែលសំខាន់ៗតាមបណ្ដាខេត្តនីមួយៗសម្រាប់រៀបចំពង្រាងគម្រោងផែនការវិនិយោគបីឆ្នាំរំកិល ឆ្នាំ២០២៤-២០២៦ ដើម្បីគោរពរាយការណ៍ជូនថ្នាក់ដឹកនាំពិនិត្យ និងសម្រេច។ សូមជម្រាបជូនថា៖ ការជ្រើសរើសបេក្ខភាពគម្រោងអាទិភាពនេះ គឺជួយជំរុញឱ្យបណ្ដានាយកដ្ឋាន-មន្ទីរជំនាញ ធ្វើការគ្រប់គ្រង និងអនុវត្តគម្រោងត្រឹមត្រូវតាមផែនការដែលបានដាក់ចេញ និងចំគោលដៅ ប្រកបដោយគុណភាព ប្រសិទ្ធភាពសេដ្ឋកិច្ច និងសមស្របតាមតម្រូវការក្នុងស្ថានភាពបច្ចុប្បន្ន៕