ភ្នំពេញ៖​ ប្រជាពលរដ្ឋដែលប្រកបអាជីវកម្មនៅតាមបណ្តោយផ្លូវវាងក្រុងកំពត មានស្ថានភាពរកស៊ីមិនសូវល្អប៉ុន្មានទេ ចាប់តាំងពីមានជំងឺកូវីដ-១៩ មកដល់បច្ចុប្បន្ន ដោយសារតែវិបត្តិសេដ្ឋកិច្ចផង និងផ្លូវពិបាកធ្វើដំណើរផង។ ប្រជាពលរដ្ឋ​ បានរំពឹងថា ក្រោយគម្រោងផ្លូវ DBST មួយខ្សែនេះសាងសង់រួច អាជីវកម្មផ្សេងៗនឹងប្រសើរឡើងវិញ ខណៈដែលមន្ត្រីជំនាញ​ បានអះអាងថា​ ការស្ថាបនាផ្លូវនេះនឹងបញ្ចប់នៅមុនខែធ្នូ ឆ្នាំ២០២៣។ កញ្ញា ហាក់ ស្រីមុំ តំណាងម្ចាស់សណ្ឋាគារ តាមបណ្តោយផ្លូវវាងក្រុង ស្ថិតនៅភូមិក្រាំង ឃុំត្រពាំងធំ ស្រុកទឹកឈូ ខេត្តកំពត​ បានលើកឡើងថា ស្ថានភាពអាជីវកម្មសណ្ឋាគាររបស់កាត់មិនសូវល្អទេ ចាប់តាំងពីមានជំងឺកូវីដ-១៩ មក ដោយសារតែវិបត្តិសេដ្ឋកិច្ចផង និងផ្លូវពិបាកធ្វើដំណើរផង។ ផ្លូវវាងក្រុងនេះ ពេលខែវស្សាទឹកលិចផ្លូវ និងមានជង្ហក់ភក់ជ្រៅៗ ដែលធ្វើឱ្យរថយន្តធំពិបាកធ្វើដំណើរ រថយន្តតូចមិនអាចធ្វើដំណើរបាន។ លុះដល់ខែប្រាំងដីហុយខ្លាំង ធ្វើឱ្យអាជីវកម្មមួយចំនួនដូចជា​ អាហារដ្ឋាន និងតូបលក់អ៊ីវ៉ាន់តាមផ្ទះត្រូវបិទទ្វារ។ ចំណែក​ លោក សម សុផល ជាម្ចាស់ហាងលក់គ្រឿងបន្លាស់រថយន្ត បានឱ្យដឹងដែរថា ការលក់ដូរមួយរយៈកាលកន្លងមកជួបការលំបាកច្រើន មិនសូវមានអ្នកចូលជួសជុល ឬទិញគ្រឿងបន្លាស់រថយន្តនោះទេ ដោយសារតែកត្តាផ្លូវថ្នល់មានការពិបាកក្នុងការធ្វើដំណើរ តែទោះជាយ៉ាងណាក៏ដោយ មកដល់បច្ចុប្បន្នទោះផ្លូវសាងសង់មិនទាន់រួចរាល់១០០% ប៉ុន្តែលោកសង្កេតឃើញថា ផ្លូវវាងក្រុងកំពតចាប់ផ្តើមមានសកម្មភាពចរាចរណ៍ច្រើនឡើងវិញហើយ។ បន្ទាប់ពីផ្លូវនេះបានសាងសង់រួចរាល់ ពួកគាត់សង្ឃឹមថា​ ការធ្វើដំណើរស្រួល នឹងអាចធ្វើឱ្យអាជីវកម្ម ការលក់ដូររបស់គាត់នឹងមានសភាពប្រសើរឡើង។ វិស្វករប្រចាំការដ្ឋានសាងសង់ផ្លូវវាងក្រុង ឬផ្លូវលេខ ១៣៩A ខេត្តកំពត លោក នាក់ ចិន បានឱ្យដឹងថា ផ្លូវវាងក្រុងកំពតនេះ មានប្រវែង ៣,៦៧០ម៉ែត្រ ស្ថាបនាជាផ្លូវ DBST ដែលបានចាប់ផ្តើមបើកការដ្ឋានសាងសង់នៅខែមេសា ឆ្នាំ២០២២ គ្រោងនឹងបញ្ចប់នៅខែធ្នូ ឆ្នាំ២០២៣។ ការសាងសង់ផ្លូវនេះ គោរពតាមលក្ខណៈបច្ចេកទេសដែលមានការត្រួតពិនិត្យត្រឹមត្រូវ និងធានាភាពជាប់ធន់យូរជាងការសាងសង់ពីមុនៗ។ ផ្លូវវាងក្រុងខេត្តកំពត ឬផ្លូវលេខ ១៣៩A ជាផ្លូវសម្រាប់បញ្ចៀសរថយន្តធុនធំមិនឱ្យបើកបរចូលក្នុងក្រុង ហើយផ្លូវនេះតភ្ជាប់ពីផ្លូវជាតិលេខ៣ ត្រង់ចំណុចក្លោងទ្វារខេត្ត មកផ្លូវជាតិលេខ៣៣ ទៅកាន់ខេត្តកែប។ នៅតាមដងផ្លូវនេះប្រជាពលរដ្ឋជាច្រើនបានប្រកបអាជីវកម្មដូចជា បើកយានដ្ឋានជួសជុល លក់គ្រឿងបន្លាស់រថយន្ត អាហារដ្ឋាន និងកន្លែងកម្សាន្តពេលរាត្រីផងដែរ។ មកដល់បច្ចុប្បន្ន កន្លែងមួយចំនួននៅបន្តបិទទ្វានៅឡើយដោយសារវិបត្តិសេដ្ឋកិច្ច និងផ្លូវធ្វើដំណើរមិនទាន់ស្អាត និងធ្វើរួចរាល់១០០%៕