គណៈប្រតិភូក្រសួងដឹកនាំដោយ ឯកឧត្ដមទេសរដ្ឋមន្ត្រី ចូលរួមគោរពវិញ្ញាណក្ខន្ធសពឳពុកបង្កើតរបស់លោកប្រធាននាយកដ្ឋានហេដ្ឋារចនាសម្ព័ន្ធសាធារណៈ នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ភ្នំពេញ៖ ថ្ងៃព្រហស្បតិ៍ ១៤រោច ខែពិសាខ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៣ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមដាក់កម្រងផ្កា ជាកិច្ចគោរពវិញ្ញាណក្ខន្ធសព មហាឧបាសកពុទ្ធសាសនូបត្ថម្ភក៍ តាន់ ហៃសៀន ត្រូវជាឳពុកបង្កើតរបស់ លោក តាន់ ធីរ៉ា ប្រធាននាយកដ្ឋាន ហេដ្ឋារចនាសម្ព័ន្ធសាធារណៈ នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ដែលកំពុងប្រារព្ធពិធីបុណ្យទក្ខិណានុប្បទាននៅ គេហដ្ឋានលេខ៦១ ផ្លូវលេខ៣១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ មហាឧបាសកពុទ្ធសាសនូបត្ថម្ភក៍ តាន់ ហៃសៀន បានទទួលមរណភាពនៅថ្ងៃអង្គារ ១២រោច ខែពិសាខ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៣ វេលាម៉ោង០១:១៥នាទីព្រឹក ក្នុងជន្មាយុ៨៩ឆ្នាំ ដោយរោគាពាធ។ មរណភាពរបស់មហាឧបាសក តាន់ ហៃសៀន គឺជាការបាត់បង់នូវ ស្វាមី ឳពុកបង្កើត ឳពុកក្មេក និងជីតា ជាទីគោរពស្រឡាញ់ដ៏ជ្រាលជ្រៅរបស់លោកប្រធាននាយកដ្ឋាន ព្រមទាំងក្រុមគ្រួសារ ដែលកន្លងមកឧបាសក តែងតែបានខិតខំអស់ពីកម្លាំងកាយចិត្ត និងប្រាជ្ញាស្មារតី ដើម្បីចិញ្ចឹមបីបាច់ថែរក្សា និងអប់រំទូន្មានបុត្រធីតា និងចៅៗ ឱ្យប្រកបដោយគន្លងធម៌រហូតក្លាយជាបញ្ញវន្ត និងជាថ្នាក់ដឹកនាំនៅតាម ក្រសួងស្ថាប័នជាតិផងដែរ។ ឯកឧត្តមទេសរដ្ឋមន្ត្រី ព្រមទាំងគណៈប្រតិភូ តំណាងឱ្យថ្នាក់ដឹកនាំ មន្ត្រីរាជការ បុគ្គលិក និងកម្មករនៃ ក្រសួងសាធារណការ និងដឹកជញ្ជូន បានសម្តែងនូវការចូលរួមរំលែកនូវមរណទុក្ខដ៏ក្រៀមក្រំជាទីបំផុត ជាមួយលោកប្រធាននាយកដ្ឋាន ព្រមទាំងក្រុមគ្រួសារ ដោយសេចក្ដីសង្វេគជាទីបំផុត និងបានលំឱនកាយវាចាចិត្ត ឧទ្ទិសបួងសួងដល់ដួងវិញ្ញាណក្ខន្ធរបស់ មហាឧបាសកពុទ្ធសាសនូបត្ថម្ភក៍ តាន់ ហៃសៀន សូមបានសោយសុខក្នុងសុគតិភពកុំបីឃ្លៀងឃ្លាតឡើយ៕