“យើងត្រូវស្វែងយល់ឱ្យច្បាស់ពីវិស័យភស្តុភារកម្ម ព្រោះជាចំណែកមួយដ៏សំខាន់ជួយបង្កើនការអភិវឌ្ឍ និងភាពរីកចម្រើនដល់កម្ពុជា ក្រោមដំបូលសន្តិភាព” មតិលើកឡើងក្នុងសិក្ខាសាលាបណ្តុះបណ្តាលស្តីពីការចងក្រងទិន្នន័យភូមិសាស្រ្តសម្រាប់ប្រព័ន្ធភស្តុភារកម្មនៅកម្ពុជា ព្រះសីហនុ៖ ថ្ងៃទី២១ និង ២២ ខែមេសា ឆ្នាំ២០២៣ លោកស្រី សន សុភាវត្តី អគ្គនាយករង តំណាង ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម តាមរយៈគម្រោងសហប្រតិបត្តិការបច្ចេកទេសនៃមូលនិធិសហប្រតិបត្តិការមេគង្គ-សាធារណរដ្ឋកូរ៉េ(MKCF) បានរៀបចំសិក្ខាសាលាបណ្តុះបណ្តាលស្តីពី “ការចងក្រងទិន្នន័យភូមិសាស្រ្តសម្រាប់ប្រព័ន្ធភស្តុភារកម្មនៅកម្ពុជា៖ ការចែករំលែកចំណេះដឹង និងការចុះទស្សនកិច្ចសិក្សា” ដោយមានសិក្ខាកាមមកពីគ្រប់អង្គភាពពាក់ព័ន្ធចូលរួមផងដែរ។ សិក្ខាសាលានេះធ្វើឡើងដើម្បីជាការចែករំលែក និងផ្តល់នូវបទពិសោធន៍ថ្មីៗ ដែលជាចំសារៈសំខាន់សម្រាប់សិក្ខាកាមដែលបានចូលរួម ក្នុងនោះរួមមាន ៖ (១) បង្ហាញអំពីបទពិសោធន៍ និងមេរៀនល្អៗ នៃប្រព័ន្ធភស្តុភារកម្មនៅក្រៅប្រទេសយកមកចែករំលែកក្នុងអង្គសិក្ខាសាលា (២) ផ្តល់ចំណេះដឹងមូលដ្ឋាននៃការរៀបចំចងក្រងទិន្នន័យភូមិសាស្រ្តសម្រាប់ប្រព័ន្ធភស្តុភារកម្មនៅកម្ពុជា (៣) បង្ហាញអំពីប្រតិបត្តិការ និងអនុវត្តការរៀបចំប្រមូលទិន្នន័យភូមិសាស្រ្តនៃប្រព័ន្ធភស្តុភារកម្ម (៤) បង្ហាញអំពីការបញ្ជូល និងប្រើប្រាស់ទិន្នន័យភូមិសាស្រ្តនៃប្រព័ន្ធភស្តុភារកម្មនៅកម្ពុជាតាមរយៈប្រព័ន្ធព័ត៌មានវិទ្យាតាមវេបសាយ (៥) ស្វែងយល់អំពីបច្ចុប្បន្នភាព និងផែនការអភិវឌ្ឍន៍កំពង់ផែស្វយ័តក្រុងព្រះសីហនុ និងហេដ្ឋារចនាសម្ព័ន្ធពាក់ព័ន្ធនឹងវិស័យភស្តុភារកម្មសម្រាប់ប្រទេសកម្ពុជា និង (៦) ការចុះទស្សនកិច្ចសិក្សាផ្ទាល់ ក្នុងកំពង់ផែស្វយ័តក្រុងព្រះសីហនុ។ ជាមួយគ្នានោះការរៀបចំសិក្ខាសាលានេះ ដើម្បីពង្រឹងសមត្ថភាពមន្រ្តី និងស្ថាប័នពាក់ព័ន្ធទាំងវិស័យរដ្ឋ និងឯកជន អំពីការរៀបចំចងក្រង និងប្រមូលទិន្នន័យស្ថិតិមូលដ្ឋាន ព្រមទាំងការពង្រឹងសមត្ថភាពការរៀបចំក្របខណ្ឌត្រួតពិនិត្យ និងវាយតម្លៃវិស័យភស្តុភារកម្ម និងទិន្នន័យភស្តុភារកម្មក្នុងប្រទេសកម្ពុជា។ ការវិភាគអំពីទំនាក់ទំនងរវាងវិស័យភស្តុភារកម្ម និងកំណើនផលិតផលក្នុងស្រុកសរុប(GDP) និងករណីសិក្សាពាក់ព័ន្ធមួយចំនួនក្នុងបណ្តាប្រទេសនៃតំបន់អាស៊ី។ ថ្លែងក្នុងពិធីបើកសិក្ខាសាលានាពេលនោះ លោកស្រីអគ្គនាយករង បានសង្កត់ធ្ងន់អំពីសារៈសំខាន់នៃសិក្ខាសាលានេះ ដែលបានផ្តល់ជាចំណេះដឹងផ្នែកគ្រប់គ្រង និងរៀបចំទិន្នន័យស្ថិតិវិស័យភស្តុភារកម្ម ទាំងនៅក្នុងប្រទេស និងការគ្រប់គ្រងវិស័យនេះពីប្រទេសជិតខាង ក៏ដូចជាលើពិភពលោកផងដែរ។ លោកស្រីអគ្គនាយករង បានជម្រាប់ជូនអង្គសិក្ខាសាលាពីសារៈសំខាន់វិស័យភស្តុភារកម្មនៅកម្ពុជាយ៉ាងដូច្នេះថា យើងត្រូវស្វែងយល់ឱ្យបានច្បាស់ពីវិស័យភស្តុភាកម្ម ព្រោះវាជាចំណែកមួយដ៏មានសារៈសំខាន់ជួយបង្កើនការអភិវឌ្ឍ និងភាពរីកចម្រើនដល់កម្ពុជាកាន់តែមានសំបូសប្បាយ ក្រោមដំបូលសន្តិភាព។ ជាលទ្ធផលនៃកម្មវិធីសិក្ខាសាលាដែលមានរយៈពេល២ថ្ងៃនេះ គឺទទួលបាននូវធាតុចូលល្អៗពីសិក្ខាកាម ចូលរួមជាមតិយោបល់យ៉ាងផុសផុលក្នុងការជជែកពិភាក្សា ចែករំលែកអំពីបទពិសោធន៍ និងចំណេះដឹងលើការងារប្រមូល ចងក្រង ការគ្រប់គ្រងទិន្នន័យដឹកជញ្ជូន នៃវិស័យភស្តុភារកម្ម ព្រមទាំងបានបន្តចុះធ្វើកម្មសិក្សាផ្ទាល់នៅកំពុងផែស្វយ័តក្រុងព្រះសីហនុ ដើម្បីស្វែងយល់ពីដំណើរការអនុវត្តផ្ទាល់ ខ្លះៗផងដែរ ៕