ក្រុមជម្រើសជាតិបាល់ទឹកសិង្ហបុរី និងក្រុមជម្រើសជាតិបាល់ទឹកកម្ពុជា ប្រកួតជាមិត្តភាពដើម្បីវាស់ស្ទង់កម្រិតបច្ចេកទេស និងសមត្ថភាពរបស់ខ្លួន បន្ទាប់ពីបានហ្វឹកហាត់ជាមួយគ្នាអស់ រយៈពេលជាយូរមកហើយ ភ្នំពេញ៖ ថ្ងៃសុក្រ ១០កើត ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹង ថ្ងៃទី៣១ ខែមីនា ឆ្នាំ២០២៣ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានអញ្ជើញជាអធិបតីក្នុងកម្មវិធីប្រកួតកីឡាបាល់ទឹកមិត្តភាពអន្តរជាតិ រវាងក្រុមជម្រើសជាតិបាល់ទឹកកម្ពុជា និងក្រុមជម្រើសជាតិបាល់ទឹកសិង្ហបុរី ដោយមានការចូលរួមពីឯកឧត្ដម លោកជំទាវគណៈប្រតិភូក្រសួងសាធារណការ និងដឹកជញ្ជូន គ្រូបង្វឹក កីឡាករ-កីឡាការិនី សិស្សនិស្សិត នៅពហុកីឡដ្ឋានជាតិអូឡាំពិក។ ការប្រកួតនេះរៀបចំឡើងដោយសហព័ន្ធខ្មែរកីឡាហែលទឹក ក្នុងគោលបំណងដើម្បីឱ្យកីឡាករបាល់ទឹកកម្ពុជាអាចដកស្រង់បទពិសោធន៍ ក៏ដូចជាផ្ដល់លទ្ធភាពឱ្យពួកគាត់បានសាកល្បងបច្ចេកទេស និងវាស់ស្ទង់កម្រិតសមត្ថភាពរបស់ខ្លួន បន្ទាប់ពីបានហ្វឹកហាត់ជាមួយគ្នារយៈពេលជាយូរមកហើយ និងជាឱកាសមួយសម្រាប់កម្ពុជាអាចពង្រឹងសមត្ថភាព កីឡាករ និងគ្រូបង្វឹករបស់ខ្លួនដើម្បីត្រៀមចូលរួមការប្រកួតកីឡាស៊ីហ្គេមឆ្នាំ២០២៣នេះ។ ជាលទ្ធផលនៃការប្រកួត ក្រុមជម្រើសជាតិបាល់ទឹកសិង្ហបុរី បាននាំមុខក្រុមជម្រើសជាតិបាល់ទឹកកម្ពុជា១៥ទល់នឹង៩។ សូមជម្រាបជូនថា៖ ក្រុមជម្រើសជាតិបាល់ទឹកកម្ពុជាបានហ្វឹកហាត់ជាមួយក្រុមជម្រើសជាតិបាល់ទឹកសិង្ហបុរី អស់រយៈពេលជាយូរមកហើយ ប៉ុន្តែមិនទាន់មានឱកាសក្នុងការវាស់ស្ទង់ សមត្ថភាពបច្ចេកទេសនៅឡើយ។ ការចូលរួមប្រកួតរវាងក្រុមជម្រើសជាតិទាំងពីរថ្ងៃនេះ គឺជាដកស្រង់បទពិសោធន៍ និងបំពេញបន្ថែមលក្ខណៈបច្ចេកទេសផ្សេងៗ ក៏ដូចជាផ្ដល់ឱកាសឱ្យកីឡាករកម្ពុជាបានវាស់ស្ទង់ សមត្ថភាពជាក់ស្តែងរបស់ខ្លួនផងដែរ៕