“សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងកំពង់ផែ” ត្រូវបានលើកយកមកប្រជុំពិនិត្យកែសម្រួលបន្ត សំដៅដល់ការសម្រេចឱ្យបានច្បាប់ថ្មីមួយ ដែលមានភាពកាន់តែល្អប្រសើរ និងលើកកម្ពស់សមត្ថភាពប្រកួតប្រជែងខាងវិស័យដឹកជញ្ជូនផ្លូវទឹក និងកំពង់ផែ ទីស្តីការក្រសួង៖ ថ្ងៃពុធ ៨កើត ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៩ ខែមីនា ឆ្នាំ២០២៣ ឯកឧត្តម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារ ដើម្បីបន្តពិនិត្យពិភាក្សា និងកែសម្រួលលើសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងកំពង់ផែ ដោយមានការចូលរួមពីថ្នាក់ដឹកនាំក្រសួង និងមន្រ្តីជំនាញពាក់ព័ន្ធផងដែរ។ កិច្ចប្រជុំនេះ ត្រូវបានរៀបចំឡើងក្នុងគោលបំណងបន្តពិនិត្យពិភាក្សាលើសំណើសុំផ្តល់ធាតុចូល និងចូលរួមផ្តល់យោបល់ខ្លឹមសារលើមាត្រាមួយចំនួននៃសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងកំពង់ផែ របស់កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ ដើម្បីឱ្យមានអត្ថន័យគ្រប់ជ្រុងជ្រោយ ធានាដល់ការអភិវឌ្ឍ និងការគ្រប់គ្រងកំពង់ផែកាន់តែប្រសើរឡើង។ បន្ថែមពីនេះ អង្គប្រជុំក៏បានពិនិត្យផ្ទៀងផ្ទាត់ និងកែសម្រួលឡើងវិញ ពាក្យពេចន៍ ឃ្លាឃ្លោង និងការកំណត់និយមន័យនៃវាក្យស័ព្ទមួយចំនួនឱ្យស្របនឹង “គោលនយោបាយជាតិកំពង់ផែ និងប្រព័ន្ធគ្រប់គ្រងកំពង់ផែ” ដែលរាជរដ្ឋាភិបាលកម្ពុជាបានដាក់ចេញកន្លងមក។ សូមជម្រាបបញ្ជាក់ដែរថា៖ ក្រោយពីទទួលបានអនុសាសន៍ណែនាំដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្រុមការងារបច្ចេកទេសតាក់តែងសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក និងកំពង់ផែ បានរៀបចំកិច្ចប្រជុំនេះឡើងជាបន្តបន្ទាប់ ដើម្បីពិនិត្យពិភាក្សា និងកែសម្រួលលើមាត្រាសំខាន់ៗមួយចំនួន ធ្វើយ៉ាងណាឱ្យច្បាប់នេះមានអត្ថន័យគ្រប់ជ្រុងជ្រោយ ធានាដល់ការអភិវឌ្ឍ និងបម្រើឱ្យវិស័យដឹកជញ្ជូនតាមផ្លូវទឹក និងការគ្រប់គ្រងកំពង់ផែបានកាន់តែល្អប្រសើរឡើង ព្រមទាំងអាចផ្ដល់សេវាដល់ការធ្វើនាវាចរ មានលក្ខណៈងាយស្រួល ប្រកបដោយទំនុកចិត្ត មានសន្តិសុខ សុវត្ថិភាព និងលើកកម្ពស់សមត្ថភាពប្រកួតប្រជែងជាមួយកំពង់ផែនានានៅក្នុងតំបន់ និងអន្តរជាតិ៕