សន្និបាតបូកសរុបសមិទ្ធផលការងារ ៥ឆ្នាំ (២០១៨-២០២២ ) និងលើកទិសដៅការងារបន្ត របស់ក្រសួងមុខងារសាធារណៈ ភ្នំពេញ៖ ថ្ងៃអង្គារ ១៥រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែមីនា ឆ្នាំ២០២៣ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញចូលរួមពិធីបើកសន្និបាតបូកសរុបសមិទ្ធផលការងារ ៥ឆ្នាំ (២០១៨-២០២២ ) និងលើកទិសដៅការងារបន្ត របស់ក្រសួងមុខងារសាធារណៈ ក្រោមអធិបតីភាព ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ។ លើកឡើងក្នុងពិធីនេះ ឯកឧត្តមរដ្ឋមន្រ្តី ព្រុំ សុខា បានគូសបញ្ជាក់ថា ក្នុងរយៈពេល៥ឆ្នាំកន្លងទៅ ជាមួយបេសកកម្ម និងភារកិច្ចទទួលខុសត្រូវដ៏ធ្ងន់ប្រកបដោយកិត្តិយសរបស់ខ្លួន ដែលជានិច្ចកាលស្ថិតក្រោមការដឹកនាំដ៏ខ្ពង់ខ្ពស់ និងដោយផ្ទាល់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងមុខងារសាធារណៈ ខិតខំពុះពារសម្រេចបាននូវសមិទ្ធផលសំខាន់ៗរួមមាន៖ ១). ការការគ្រប់គ្រងវិស័យមុខងារសាធារណៈ តាមរយៈការត្រួតពិនិត្យចំណុចដែលនៅសេសសល់ក្នុងនីតិវិធីនៃការអនុវត្តច្បាប់ និងលិខិតបទដ្ឋាននានា ២). ការកែសម្រួលរចនាសម្ព័ន្ធ និងការកំណត់ឡើងវិញមុខងាររបស់អង្គភាព និងស្ថាប័ននៅថ្នាក់ជាតិ និងថ្នាក់ក្រោមជាតិ ៣). ការប្រើប្រាស់បច្ចេកវិទ្យាទំនើបឌីជីថលតាមរយៈម៉ាស៊ីនហាតវែរថ្មី សម្រាប់អភិវឌ្ឍប្រព័ន្ធគ្រប់គ្រងមន្រ្តីរាជការតាមព័ត៌មានវិទ្យា (HRMIS) ៤). ការបើកផ្តល់ជាទៀងទាត់ប្រាក់បៀវត្ស និងប្រាក់ឧបត្ថម្ភផ្សេងៗរបស់មន្រ្តីរាជការ ក្នុងអំឡុងពេលនៃការរាតត្បាតជំងឺកូវីដ-១៩ និង ៥). ការកសាង និងអភិវឌ្ឍន៍សមត្ថភាពមន្រ្តីរាជការ និងសមត្ថភាពស្ថាប័ននៅថ្នាក់ជាតិ និងថ្នាក់ក្រោមជាតិ តាមរយៈការបើកវគ្គបណ្តុះបណ្តាល សិក្ខាសាលា កិច្ចប្រជុំផ្សេងៗក្នុងប្រទេស និងបញ្ជូនមន្រ្តីរាជការទៅទទួលការបណ្តុះបណ្តាលនៅក្រៅប្រទេសផងដែរ៕