[VAYO FM] - អ្នកសេដ្ឋកិច្ច៖តំណភ្ជាប់ផ្លូវពីខេត្តកំពង់ធំនិងកំពង់ឆ្នាំងនឹងចំណេញច្រើនដល់ការដឹកជញ្ជូន និងទេសចរណ៍
2023-03-16
Go to the website published VAYO FM
លោកនាយករដ្ឋមន្ត្រី ហ៊ុន សែន កាលពីថ្ងៃទី០៩ ខែមីនា ឆ្នាំ២០២៣បានប្រកាសថា នៅឆ្នាំ២០២៤ខាងមុខ រដ្ឋាភិបាលនឹងបើកការដ្ឋានសាងសង់ស្ថាបនាផ្លូវលេខ៥០សេ ដែលជាផ្លូវតភ្ជាប់រវាងខេត្តកំពង់ធំមកខេត្តកំពង់ឆ្នាំង។ តាមការប៉ាន់ស្មាន ផ្លូវនេះនឹងអាចចំណាយថវិកាសាងសង់ប្រមាណ២៥០លានដុល្លារអាមេរិក ក្នុងនោះផ្លូវអាចចំណាយប្រមាណ១៥០លានដុល្លារអាមេរិក និងស្ពានតភ្ជាប់ប្រមាណ១០០លានដុល្លារអាមេរិក។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា យល់ថា គម្រោងសាងសង់ផ្លូវ៥០សេនឹងផ្ដល់ប្រយោជន៍ច្រើនដល់ចរន្តសេដ្ឋកិច្ចតាមរយៈការដឹកជញ្ជូនទំនិញគ្រប់ប្រភេទ និងអំណោយផលដល់ការវិនិយោគអចលទ្រព្យដែលនៅជាប់នឹងផ្លូវនេះ។ មិនតែប៉ុណ្ណោះ លោកបណ្ឌិតថា ការស្ថាបនាផ្លូវនេះ ក៏នឹងផ្ដល់សារៈសំខាន់ចំពោះវិស័យទេសចរណ៍ផងដែរ ដោយអាចឱ្យភ្ញៀវទេសចរចំណេញពេលវេលាក្នុងការធ្វើដំណើរ។
សូមបញ្ជាក់ថា ផ្លូវ៥០សេដែលជាផ្លូវតភ្ជាប់រវាងខេត្តកំពង់ធំ និងខេត្តកំពង់ឆ្នាំងមានប្រវែងសរុប៥៨គីឡូម៉ែត្រ ក្នុងនោះមានស្ពានឆ្លងកាត់ទន្លេប្រវែង៣,៣គីឡូម៉ែត្រ ដែលជាស្ពានវែងជាងគេបង្អស់នៅកម្ពុជា។ ផ្លូវនេះនឹងផ្ដល់អំណោយផលល្អចំពោះការដឹកជញ្ជូនទំនិញបានលឿនពីខេត្តព្រះ វិហារ ខេត្តកំពង់ធំកាត់មកកាន់ខេត្តកំពង់ឆ្នាំង៕
