កិច្ចប្រជុំពិភាក្សាដើម្បីបិទបញ្ចប់បេសកកម្មសិក្សាវាយតម្លៃបឋម លើគម្រោងកែលម្អការគ្រប់គ្រងសំណល់រឹង និងផ្លាស្ទិក ក្រោមឥណទានសម្បទានរបស់ធនាគារពិភពលោក ភ្នំពេញ៖ ថ្ងៃសុក្រ ៥កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំពិភាក្សាការងារដើម្បីបិទបញ្ចប់ (wrap-up meeting) បេសកកម្មសិក្សាវាយតម្លៃបឋម លើគម្រោងកែលម្អការគ្រប់គ្រងសំណល់រឹង និងផ្លាស្ទិក នៅខេត្តសៀមរាប ខេត្តកណ្តាល និងខេត្តកំពង់ស្ពឺ និងពង្រឹងបន្ថែមលើការគ្រប់គ្រងសំណល់រឹងនៅខេត្តព្រះសីហនុ និងខេត្តបាត់ដំបង ក្រោមឥណទានសម្បទានរបស់ធនាគារពិភពលោក។ កិច្ចប្រជុំនេះអញ្ជើញជាអធិបតីភាពដោយដឹកនាំដោយ ឯកឧត្តម ហែម វណ្ណឌី រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួមផងដែរពីតំណាងក្រសួង-ស្ថាប័នពាក់ព័ន្ធមួយចំនួន នៅសាលប្រជុំនៃទីស្ដីការក្រសួងមហាផ្ទៃ។ អង្គប្រជុំបានផ្លាស់ប្ដូរមតិយោបល់លើចំណុចសំខាន់ៗមួយចំនួននៃគម្រោងកែលម្អការគ្រប់គ្រងសំណល់រឹង និងផ្លាស្ទិក ក្រោមឥណទានសម្បទានរបស់ធនាគារពិភពលោកនេះ និងជាលទ្ធផលក្រុមការងារបានឯកភាពជាស្មារតីរួមលើចំណុចសំខាន់ៗរួមមាន៖ ១) ពង្រាងផែនការលទ្ធកម្ម ១៨ខែដំបូងសម្រាប់គម្រោងនេះ ២) ពង្រាងថវិកាសរុបរបស់គម្រោងទាំងមូល ៣) រៀបចំរចនាសម្ព័ន្ធអង្គភាពអនុវត្តគម្រោងទាំងថ្នាក់ជាតិ និងថ្នាក់ក្រោមជាតិ និង ៤) ពង្រាងផែនការសកម្មភាពសម្រាប់កិច្ចចរចាហិរញ្ញប្បទានសម្រាប់គម្រោងការកែលម្អការគ្រប់គ្រងសំណល់រឹង និងផ្លាស្ទិកនេះ៕