នាពេលថ្មីៗកន្លងទៅនេះ រាជរដ្ឋាភិបាលបានលើកឡើងពីគម្រោងសាងសង់ផ្លូវល្បឿនលឿនទី៣ ដែលតភ្ជាប់ពីភ្នំពេញទៅក្រុងសៀមរាប។ ហើយបច្ចុប្បន្នគម្រោងនេះបានកំពុងធ្វើការ និងត្រៀមដើម្បីចុះហត្ថលេខាលើកិច្ចព្រមព្រៀងក្របខណ្ឌការ​ងា​រ (Frame​work Agreement) នៅខែកញ្ញា ឆ្នាំ២០២៣ ខាងមុខនេះផងដែរ។ បើតាមការបញ្ជាក់ពីក្រសួងសាធារណការ និងដឹកជញ្ជូន បានឲ្យដឹងថាគម្រោងផ្លូវល្បឿនលឿនទី៣ នេះនឹងត្រូវសាងសង់ពីភ្នំពេញឆ្លងកាត់ខេត្ដកំពង់ធំឆ្ពោះទៅក្រុងសៀមរាបតែម្ដង។ ហើយការសាងសង់ផ្លូវនេះក៏នឹងផ្ដល់នូវអត្ថប្រយោជន៍ និងប្រសិទ្ធភាពសេដ្ឋកិច្ច-សង្គមយ៉ាងច្រើនផងដែរ។ គម្រោងផ្លូវល្បឿនទី៣ ពីភ្នំពេញទៅក្រុងសៀមរាបនេះ បើតាមការសិក្សាបឋមពីក្រុមហ៊ុន CRBC គឺមានប្រវែងសរុបប្រមាណ ៣៨២ គីឡូម៉ែត្រ ត្រូវការទុនវិនិយោគប្រមាណជាង ៤ពាន់លានដុល្លារអាមេរិក ដោយរួមបញ្ចូលទាំងក្បាល និងទូរថភ្លើងសម្រាប់ដំណើរការ និងប្រើប្រាស់រយៈពេលសាងសង់ប្រមាណ ៤ឆ្នាំ។សូមជម្រាបផងដែរថា គិតមកដល់ពេលនេះកម្ពុជាបានសាងសង់ផ្លូវល្បឿនលឿននេះរួចរាល់មួយខ្សែហើយ ដែលតភ្ជាប់ពីភ្នំពេញទៅក្រុងព្រះសីនុ ដែលទើបដាក់ឲ្យដំណើរការផ្លូវការកាលពីចុងឆ្នាំ២០២២កន្លងទៅ។ ហើយបច្ចុប្បន្ននេះ រាជរដ្ឋាបាលបាននឹងកំពុងសិក្សាសម្រាប់ការសាងសង់ផ្លូវល្បឿនលឿននេះ ២ ខ្សែទៀតផងដែរ ដែលក្នុងនោះមានពីភ្នំពេញទៅក្រុងបាវិត ដែលអាចនឹងបើកការដ្ឋាននៅពាក់កណ្ដាលឆ្នាំនេះ និងមួយទៀតគឺគម្រោងតភ្ជាប់ពីភ្នំពេញទៅក្រុងសៀមរាបនេះតែម្ដង៕