កិច្ចប្រជុំពិភាក្សាការងារពាក់ព័ន្ធនឹងវិស័យប្រព័ន្ធចម្រោះទឹកកខ្វក់ ការគ្រប់គ្រងសំណល់រឹង ក្នុងខេត្តបាត់ដំបង និងការងារដោះស្រាយផលប៉ះពាល់គម្រោងស្តារប្រឡាយមេរំដោះទឹកចេញពីក្រុងបាត់ដំបងប៉ែកខាងលិចក្រុង(ប្រឡាយកំពង់សីមា) នាថ្ងៃអង្គារ ថ្ងៃទី០៧ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំប្រតិភូក្រសួង ចូលរួមកិច្ចប្រជុំជាមួយថ្នាក់ដឹកនាំ និងមន្ត្រីរាជការ នៃមន្ទីរសាធារណការ និងដឹកជញ្ជូនខេត្តបាត់ដំបង។ កិច្ចប្រជុំនេះដែរ ត្រូវបានរៀបចំឡើងក្នុងគោលបំណងដើម្បីពិភាក្សាលើការងារពាក់ព័ន្ធនឹងវិស័យប្រព័ន្ធលូ ការបង្ហូរទឹកកខ្វក់ និងការគ្រប់គ្រងសំណល់រឹងក្នុងខេត្តបាត់ដំបង។ ឯកឧត្តមរដ្ឋលេខាធិការ ក៏បានផ្តល់នូវអនុសាសន៍ណែនាំមួយចំនួន ជូនដល់មន្ទីរសាធារណការ និងដឹកជញ្ជូន ខេត្តបាត់ដំបង ដើម្បីឱ្យការអនុវត្តការងារខាងលើប្រព្រឹត្តទៅបានប្រកបដោយប្រសិទ្ធភាពការងារខ្ពស់ និងសម្រេចបានតាមផែនការ។ ដោយឡែក ថ្ងៃទី០៨ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានបន្តអញ្ជើញដឹកនាំប្រតិភូក្រសួង ចូលរួមកិច្ចប្រជុំពិភាក្សាដោះស្រាយផលប៉ះពាល់គម្រោងស្តារប្រឡាយមេរំដោះទឹកចេញពីក្រុងបាត់ដំបងប៉ែកខាងលិចក្រុង(ប្រឡាយកំពង់សីមា) ស្ថិតនៅក្នុងសង្កាត់ចំនួន៤ សង្កាត់វត្គគរ សង្កាត់ទួលតាឯក សង្កាត់អូរចារ និងសង្កាត់ចំការសំរោង។ កិច្ចប្រជុំនារសៀលថ្ងៃពុធនេះ មានការអញ្ចើញចូលរួមពី ឯកឧត្តមអភិបាលរងនៃគណៈអភិបាលខេត្តបាត់ដំបង តំណាងដ៏ខ្ពង់ខ្ពស់ ឯកឧត្តមអភិបាលនៃគណៈអភិបាល ឯកឧត្តមអនុរដ្ឋលេខាធិការ លោកអភិបាលក្រុងបាត់ដំបង លោកនាយកទីចាត់ការផែនការ និងវិនិយោគ លោកនាយកទីចាត់ការអន្តរវិស័យ លោកប្រធាន-អនុប្រធាននាយកដ្ឋានសាងសង់ និងថែទាំប្រព័ន្ធចម្រោះទឹកកខ្វក់ នៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ព្រមទាំងមន្ត្រីជំនាញពាក់ព័ន្ធ និងទីប្រឹក្សាគម្រោងផងដែរ នៅសាលប្រជុំសាលាខេត្តបាត់ដំបង។ នៅក្នុងកិច្ចប្រជុំនេះ ក៏បានធ្វើបទបង្ហាញអំពីស្ថានភាពរបស់គម្រោង និងបង្ហាញពីរូបភាពនៃផលប៉ះពាល់ជាក់ស្តែងដែលជាបញ្ហារាំងស្ទះដល់ដំណើរការរបស់គម្រោង និងសំណូមពរផ្សេងៗរបស់ឯកឧត្តមរដ្ឋលេខាធិការរួចមក ឯកឧត្តមអភិបាលរង ក៏បានរីករាយសាទរនូវសមិទ្ធផលគម្រោងថ្មីៗជាច្រើនដែលខេត្តបាត់ដំបងទទួលបានដូចជាការអភិវឌ្ឍផ្លូវក្នុងខេត្ត ទីលានទុកដាក់សំណល់រឹងជាដើម ហើយនេះ ជាសមិទ្ធផលថ្មីមួយទៀតនឹងលេចរូបរាងនាពេលឆាប់ៗខាងមុខនេះ។ ទន្ទឹមនឹងនេះ ឯកឧត្តមអភិបាលរងក៏បានដាក់ចេញនូវបទបញ្ជាជាបន្ទាន់ដល់មន្ត្រីក្រោមឱវាទ និងមន្ត្រីពាក់ព័ន្ធទាំងឡាយ ធ្វើយ៉ាងណាត្រូវសហការឲ្យបានជិតស្និទ្ធ ជាមួយមន្ត្រីគម្រោងរបស់ក្រសួងសាធារណការ និងដឹកជញ្ជូន ដើម្បីជំរុញសិក្សា និងដោះស្រាយផលប៉ះពាល់នេះឲ្យបានឆាប់រហ័ស និងជាអាទិភាពមុនគេ ដែលត្រូវធ្វើជាបន្ទាន់ និងបានបញ្ជាក់ថាក្រុងបាត់ដំបងនឹងប្រែក្លាយមុខមាត់ថ្មី ជាទីក្រុងឆ្លាតវៃនាថ្ងៃអនាគត៕