[Technology Cambodia] - រីកដូចផ្សិត! ស្ថានីយសាកថ្មឡានអគ្គិសនីថ្មីមាននៅខេត្តមណ្ឌលគិរីហើយ ខណ:តម្លៃ 1Kwh តែ ១២០០រៀលទេ
ស្របពេលប្រេងសាំងកំពុងឡើងថ្លៃសារជាថ្មី ក្រុមហ៊ុនឯកជនមួយទើបតែបានបំពាក់នូវទូសាកថ្មឡានអគ្គិសនីល្បឿនលឿនចំនួន២ គ្រឿងនៅខេត្តមណ្ឌលគិរី ខណ:ដែលតម្លៃបញ្ចូលភ្លើងបច្ចុប្បន្ន 1Kwh តែ ១២០០រៀលទេ។
យោងតាមប្រភពពី BYD Cambodia បានឲ្យដឹងថា ស្ថានីយសាកថ្មឡានអគ្គិសនីថ្មី ដែលទើបតែបង្កើតនៅខេត្តមណ្ឌលគិរី គឺជាស្ថានីយបញ្ចូលភ្លើងល្បឿនលឿន (Fast Charge) ដូចទៅនឹងស្ថានីយសាកថ្មឡានអគ្គិសនីផ្សេងៗ របស់ក្រសួងសាធារណការ និងដឹកជញ្ជូន។
រីឯស្ថានីយសាកថ្មនៅឯខេត្តមណ្ឌលគិរីនេះ គឹមានទូ ឬម៉ាស៊ីនសាកថ្ម ចំនួន ២គ្រឿងដែលអនុញ្ញាត ឲ្យឡានចូលសាកថ្មក្នុងពេលតែមួយបានម្តង ៤គ្រឿងផងដែរ ដោយមានទីតាំងនៅ ក្នុងក្រុងសែនមនោរម្យនៃខេត្តមណ្ឌលគិរី។ សម្រាប់ការបំពាក់កន្លែងសាកថ្មឡានអគ្គិសនីនេះ គឺជួលសម្រួលដល់បងប្អូនដែលមានឡានអគ្គិសនីមិនហ៊ានជិះទៅផ្លូវឆ្ងាយៗ ឬក៏មិនទាន់សម្រេចក្នុងការទិញឡានអគ្គិសនីមកប្រើប្រាស់ បច្ចុប្បន្ននេះ ស្ថានីយសាកថ្មកំពុងតែរីករាល់ដាលយ៉ាងច្រើនខ្លាំងមែនទែន សឹងតែពេញស្រុកខ្មែរ។
កាលពីកន្លងទៅក្រុមហ៊ុន BYD Auto Industry ក៏បានស្នើសុំដល់ក្រសួងសាធារណការ និងដឹកជញ្ជូន បំពាក់ស្ថានីយសាកថ្មីឡានអគ្គិសនីចំនួន ២០០គ្រឿង ទាំង ២៥ខេត្តក្រុងនៃប្រទេសកម្ពុជា និងគ្រោងសាងសង់កន្លែងសាកថ្មនទាំងអស់នោះឲ្យបានលឿនតាមទៅអាចធ្វើបាន ហើយក៏ជួយជម្រុញឲ្យប្រទេសកម្ពុជាឈានជើងឆ្ពោះទៅរកទីក្រុងគ្មានផ្សេងពុលឧស្ម័នកាបូន នៅឆ្នាំ២០៥០។
គួរបញ្ជាក់ផងដែរថា នៅឆ្នាំ២០៥០ បណ្តាលប្រទេសលើពិភពលោកទាំងអស់ នឹងត្រូវបានផ្លាស់ប្តូរប្រទេសឲ្យទៅក្លាយជាទីក្រុងគ្មានជាតិពុលដោយឧស្ម័នកាបូន លប់បំបាត់យានយន្តដែលប្រើប្រាស់ថាមពលចំហេះក្នុងដូចជាប្រេងសាំងជាដើម៕
