[VAYO FM] - ការកសាងហេដ្ឋារចនាសម្ព័ន្ធសំខាន់ៗជាបន្តបន្ទាប់អាចឆ្លុះបញ្ចាំងពីទិដ្ឋភាពអ្វីខ្លះរបស់កម្ពុជា?
2023-02-01
Go to the website published VAYO FM
នារយៈពេលចុងក្រោយនេះ រាជរដ្ឋាភិបាលកម្ពុជាបាននិងកំពុងបន្ដយ៉ាងសកម្មនូវការងារកសាងនិងស្ថាបនានូវហេដ្ឋារចនាសម្ព័ន្ធសំខាន់ៗ។ ជាអាទិ៍សមិទ្ធផលថ្មីបំផុតមួយដែលទើបលេចរូបរាងឡើង គឺផ្លូវល្បឿនលឿនពីរាជធានីភ្នំពេញទៅក្រុងព្រះសីហនុ រួមនឹងគម្រោងការកសាងស្ពានឆ្លងកាត់ទន្លេមួយចំនួនទាំងនៅក្នុងរាជធានីភ្នំពេញ និងតាមបណ្ដាខេត្តនានា។ ជាមួយគ្នា រដ្ឋាភិបាលក៏គ្រោងនឹងបង្កើតផ្លូវរថភ្លើងល្បឿនលឿនពីរាជធានីភ្នំពេញដែលជាស្នូលសេដ្ឋកិច្ចទៅកាន់ក្រុងប៉ោយប៉ែត ខេត្តបន្ទាយមានជ័យដែលជាខេត្តជាប់ព្រំប្រទល់ប្រទេសថៃថែមទៀត សិក្សាគម្រោងកសាងផ្លូវល្បឿនលឿនភ្នំពេញ-បាវិត ភ្នំពេញ-សៀមរាប ហើយក៏គ្រោងនិងស្ថាបនានូវព្រែកជីកដែលគ្រោងជីកតភ្ជាប់ពីទន្លេបាសាក់ទៅកាន់សមុទ្រផងដែរ។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លើកឡើងថា ការកសាងហេដ្ឋារចនាសម្ព័ន្ធសំខាន់ៗជាបន្តបន្ទាប់របស់រដ្ឋាភិបាល ពិតជាអាចឆ្លុះបញ្ចាំងពីភាពរីកចម្រើនរបស់កម្ពុជា ព្រោះបើគ្មានលទ្ធភាពទេ កម្ពុជានឹងមិនអាចគ្រោងក្នុងការកសាងស្ថាបនាហេដ្ឋារចនាសម្ព័ន្ធទាំងតូចទាំងធំនោះបានឡើយ។ លោកបណ្ឌិតលើកឡើងដូច្នេះ...
លោកយង់ គឹមអេង ប្រធានមជ្ឍមណ្ឌលប្រជាពលរដ្ឋដើម្បីអភិវឌ្ឍន៍ យល់ថា ការអភិវឌ្ឍវិស័យហេដ្ឋារចនាសម្ព័ន្ធជាបន្ដបន្ទាប់នេះ ពិតជាបានបង្ហាញពីភាពរីកចម្រើនមួយរបស់កម្ពុជា ប៉ុន្តែមិនអាចនិយាយថា ការកសាងនូវរចនាសម្ព័ន្ធទាំងនោះបង្ហាញពីការរីកចម្រើនសេដ្ឋកិច្ចបាននោះទេ ព្រោះទាល់តែមើលទៅលើGDP ឬផលិតផលក្នុងស្រុកសរុប។ ម្យ៉ាងលោកថា ក្នុងចំណោមហេដ្ឋារចនាសម្ព័ន្ធដែលរដ្ឋាភិបាលគ្រោងស្ថាបនាទាំងនោះ មិនដឹងថាតើអាចពាក់ព័ន្ធទៅនឹងការប្រើប្រាស់ថវិកាជាតិ ឬថវិកាកម្ចីពីបរទេសនោះទេ? ប៉ុន្តែយ៉ាងណាក៏ដោយលោកគាំទ្រចំពោះការកសាងហេដ្ឋារចនាសម្ព័ន្ធទាំងនេះ។
យ៉ាងណាមិញលោក ផៃ ស៊ីផាន អ្នកនាំពាក្យរាជរដ្ឋាភិបាល បានឱ្យដឹងថា ការកសាងហេដ្ឋារចនាសម្ព័ន្ធគឺជាយុទ្ធសាស្ត្ររបស់រាជរដ្ឋាភិបាលក្នុងការបង្កើត និងពង្រឹងសេដ្ឋកិច្ចជាតិ ជាពិសេសនៅបន្ទាប់ពីកម្ពុជាងើបចេញពីវិបត្តិជំងឺកូវីដ-១៩។ មិនតែប៉ុណ្ណោះលោកថា រដ្ឋាភិបាលក៏បាននិងកំពុងកសាងនូវភាពធន់ដើម្បីឆ្លើយតបជាមួយនិងការប៉ះពាល់ពីវិបត្តិសង្គ្រាមរុស្ស៊ី-អ៊ុយក្រែន និងវិបត្តិពាណិជ្ជកម្មរវាងប្រទេសមួយចំនួន។ ដូច្នេះក្រៅពីការបន្ថែមក្នុងការរកទីផ្សារថ្មីសម្រាប់ការនាំចេញផលិតផលកសិកម្ម ឬផលិតផលឧស្សាហកម្មកាត់ដេរ គឺរដ្ឋាភិបាលនឹងបង្កើនបណ្ដាញផ្ទៃក្នុងដើម្បីតភ្ជាប់ចរន្តក្នុងស្រុកទៅនឹងថ្នាក់តំបន់បន្ថែមទៀត។
អ្នកនាំពាក្យរាជរដ្ឋាភិបាលដដែលអះអាងថា កសាងហេដ្ឋារចនាសម្ព័ន្ធសំខាន់ៗជាបន្តបន្ទាប់នេះ ពិតជាអាចឆ្លុះបញ្ចាំងនិងបង្ហាញយ៉ាងច្បាស់បំផុតពីភាពរីកចម្រើនរបស់កម្ពុជា ប៉ុន្តែក្រៅពីហេដ្ឋារចនាសម្ព័ន្ធរដ្ឋាភិបាលក៏បានយកធនធានមនុស្សជាអាទិភាពក្នុងការអភិវឌ្ឍប្រទេស។ សូមស្ដាប់ការលើកឡើង...
គួរជម្រាបថា បច្ចុប្បន្នហេដ្ឋារចនាសម្ព័ន្ធធំៗដែលកម្ពុជាសម្រេចបានរួមមានដូចជា ផ្លូវល្បឿនលឿនពីរាជធានីភ្នំពេញទៅកាន់ខេត្តព្រះសីហនុ ស្ពានឆ្លងកាត់ទន្លេមេគង្គក្នុងខេត្តក្រចេះ និងស្ពានឆ្លងកាត់ទន្លេមួយចំនួនទៀតនៅក្នុងរាជធានីភ្នំពេញកំពុងសាងសង់។ ហេដ្ឋារចនាសម្ព័ន្ធទាំងនេះសុទ្ធសឹងត្រូវចំណាយថវិការហូតដល់ខ្ទង់រាប់លានដុល្លារដើម្បីសាងសង់ឡើង ហើយក្នុងនោះបានប្រើប្រាស់ទាំងថវិកាជាតិ និងថវិកាជំនួយ ក៏ដូចជាកម្ចីពីបណ្ដាប្រទេសដៃគូមួយចំនួន ជាពិសេសប្រទេសចិនដែលកម្ពុជាចាត់ទុកថាជាមហាមិត្តដែកថែប៕
