[Rasmei Kampuchea Daily News] - ជំរុញឱ្យខាងវិស្វកម្មស្ថាបនាផ្លូវនៅស្រុកកំពង់សៀមឱ្យហើយនៅមុនការបោះឆ្នោតជ្រើសរើសតំណាងរាស្ត្រ
កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម នឹងជំរុញឱ្យខាងវិស្វកម្មរបស់ក្រសួងការពារជាតិ ដែលជាអ្នកទទួលសិទ្ធិសាងសង់ផ្លូវប្រភេទឌីប៊ីអេសធី ( DBST) ប្រវែងជាង ១០ គីឡូម៉ែត្រ ដែលជាអំណោយរបស់លោក ហ៊ុន ម៉ាណែត ឱ្យបានហើយរួចរាល់បានធ្វើដំណើរ នៅមុនការបោះឆ្នោតជ្រើសរើសតំណាងរាស្ត្រ ខែកក្កដា ឆ្នាំ២០២៣នេះ។
លោកអភិបាលខេត្តកំពង់ចាមបានធ្វើការជំរុញបែបនេះ នៅឱកាសដែលលោក និងលោក ចាន់ សាវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ព្រមទាំងនៅចំពោះមុខប្រជាពលរដ្ឋអ្នកចូលរួមប្រមាណជាង ១.០០០ នាក់ ក្នុងពិធីបើកការដ្ឋានស្ថាបនាផ្លូវក្រាលកៅស៊ូ DBST មួយខ្សែប្រវែង ១២ គីឡូម៉ែត្រ និងសំណង់សិល្បការ របស់រដ្ឋបាលខេត្តចាប់ពីផ្លូវជាតិលេខ៧១ ភូមិអន្លង់ស្នូក ឃុំអូរស្វាយ ដល់ភូមិល្ពាក ឃុំស្រក ស្រុកកំពង់សៀម នៅព្រឹកថ្ងៃទី១ កុម្ភៈនេះ។
លោក អ៊ុន ចាន់ដា បានមានប្រសាសន៍ថា ផ្លូវចម្ងាយ ១២ គីឡូម៉ែត្រដែលយើងបើកការដ្ឋានសាងសង់នៅថ្ងៃនេះ គឺជាអំណោយរបស់លោក ហ៊ុន ម៉ាណែត។ ដោយការពិតផ្លូវមួយនេះស្ថិតក្នុងគម្រោងរបស់ក្រសួងអភិវឌ្ឍន៍ជនបទ គឺពាក់ព័ន្ធនឹងនីតិវិធីចំណាយរបស់ក្រសួងនេះបានដាក់ទៅតាមផែនការឆ្នាំរបស់ខ្លួន បង្កឱ្យមានការអូសបន្លាយពេលវេលាលំបាកដល់ការធ្វើដំណើររបស់ប្រជាពលរដ្ឋ ជាពិសេសនៅរដូវវស្សា។
លោកបានបន្ថែមថា អាជ្ញាធរ និងមន្ត្រីជំនាញបានចុះសិក្សាវាយតម្លៃជាលទ្ធផល គឺមានប្រជាពលរដ្ឋប្រមាណ២.០០០ គ្រួសារ ស្មើនឹងប្រហែល មួយម៉ឺន នាក់ជាអ្នកទទួលផលដោយផ្ទាល់។ កត្តានេះប្រសិនបើផ្លូវមួយខ្សែនេះសាងសង់ហើយ នឹងមានភាពមមាញឹក ប្រជាពលរដ្ឋមានការប្រើប្រាស់ច្រើនក្នុងការធ្វើដំណើរ។ លោកក៏បានរាយការណ៍ពីលទ្ធផលនៃការសិក្សា ជូនលោក ហ៊ុន ម៉ាណែត ហើយលោក(ហ៊ុន ម៉ាណែត) ក៏ឱ្យលោក (អ៊ុន ចាន់ដា) កាត់បង្វែរផ្លូវនេះចេញពីគម្រោងខាងក្រសួងអភិវឌ្ឍន៍ជនបទ មកឱ្យខាងរដ្ឋបាលខេត្តកំពង់ចាម ជាអ្នកដឹកនាំស្ថាបនាវិញ គឺរូបលោក(ហ៊ុន ម៉ាណែត) ជាអ្នកផ្តល់ធនធានថវិកា និងបានសុំការគាំទ្រពីលោក អូន ព័ន្ធមុនីរ័ត្ន ជាឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដែលនាំឱ្យមានការបើកការដ្ឋានសាងសង់ផ្លូវមួយខ្សែនាថ្ងៃនេះ។
លោកបានបន្តថា តាមផែនការ នៃការស្ថាបនារបស់ខាងវិស្វកម្ម នឹងត្រូវរយៈពេល ប្រាំពីរ ខែ ប៉ុន្តែលោកសូមជំរុញ ការសាងសង់ផ្លូវប្រវែងក្នុងឯកសារ ១១,៦០០ គីឡូម៉ែត្រ និងទទឹង ៧ ម៉ែត្រ បន្ថែមល្បឿនស្ថាបនាឱ្យរួចរាល់ នឹងបានដាក់សម្ភោធប្រើប្រាស់ផ្លូវការនៅចុងខែមិថុនាពោល គឺនៅមុនបោះឆ្នោតជ្រើសរើសតំណាងរាស្ត្រនាខែកក្កដា ឆ្នាំ២០២៣នេះ៕
