កិច្ចប្រជុំបន្តដើម្បីពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃចន្ទ ១០រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៦ ខែមករា ឆ្នាំ២០២៣ ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និង ដឹកជញ្ជូន បានអញ្ជើញដឹកនាំកិច្ចប្រជុំបន្តដើម្បីពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ ដែលគ្រោងនឹងប្រព្រឹត្តទៅនាដើម ខែកុម្ភៈ ឆ្នាំ២០២៣ ខាងមុខ ដោយមានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង និងមន្ត្រីពាក់ព័ន្ធ ដែលជាសមាជិក សមាជិកាអនុគណៈកម្មការចំណុះ។ កិច្ចប្រជុំនេះរៀបចំឡើងក្នុងគោលបំណងដើម្បីតាមដាន និងពិនិត្យមើលការងារដែលបានដាក់ជូនសមាជិកសមាជិកាគណៈកម្មការ និងអនុគណៈកម្មការសម្រាប់ត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួង ដែលរួមមានដូចជា៖ ការរៀបចំបទអន្តរាគមន៍ វឌ្ឍនភាពនៃការបូកសរុបរបាយការណ៍ការងារប្រចាំឆ្នាំ ពង្រាងសុន្ទរកថាត្រៀមសម្រាប់ថ្នាក់ដឹកនាំ និងការត្រៀមលក្ខណៈរៀបចំតុបតែងសាលប្រជុំ ព្រមទាំងការអញ្ជើញអ្នកសារព័ត៌មានជាដើម ដើម្បីដាក់ឆ្លងថ្នាក់ដឹកនាំពិនិត្យសម្រេចត្រឹមថ្ងៃទី២០ ខែមករា ឆ្នាំ២០២៣។ ឯកឧត្តមរដ្ឋលេខាធិការ បានជំរុញលើកទឹកចិត្តឱ្យគណៈកម្មការ និងអនុគណៈកម្មការទាំងអស់បន្តសហការឱ្យបានជិតស្និទ្ធបន្តទៀត និងបញ្ចប់ភារកិច្ចការងារដែលបានដាក់ជូនឱ្យបានឆាប់រហ័សតាមផែនការដែលបានកំណត់ ដើម្បីគោរពជូនឯកឧត្តមទេសរដ្ឋមន្ត្រីពិនិត្យសម្រេចលើការរៀបចំសន្និបាតនេះ៕