[VAYO FM] - “សេចក្ដីព្រាងច្បាប់ចរាចរណ៍ផ្លូវគោកថ្មី”នឹងបញ្ចប់ការប្រជុំពិនិត្យនិងសិក្សានៅចុងខែធ្នូនេះ
2022-12-22
Go to the website published VAYO FM
សេចក្តីព្រាងច្បាប់ស្ដីពីចរាចរណ៍ផ្លូវគោកថ្មី នឹងបញ្ចប់ការសិក្សា និងប្រជុំពិភាក្សាពីសំណាក់ក្រុមការងារជំនាញ នៅថ្ងៃទី២៨ ខែធ្នូ ឆ្នាំ២០២២ខាងមុខនេះ។ នេះបើតាមការបញ្ជាក់របស់លោកស្រីមឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក ថ្លែងប្រាប់វិទ្យុវាយោ នៅថ្ងៃទី២១ធ្នូ។
មន្ត្រីជាន់ខ្ពស់ក្រសួងសាធារណការ និងដឹកជញ្ជូនដដែល គូសបញ្ជាក់ថា សេចក្ដីព្រាងច្បាប់ដែលនឹងឈានដល់ការបង្កើតច្បាប់ចរាចរណ៍ផ្លូវគោកថ្មីជំនួសឱ្យច្បាប់ចាស់ដែលកំពុងអនុវត្តជាធរមាននេះ ដើម្បីឱ្យស្របតាមការអភិវឌ្ឍរបស់កម្ពុជា ជាពិសេសលើការអភិវឌ្ឍផ្លូវថ្នល់ រួមដូចជា ការពង្រីកផ្លូវ ការកសាងផ្លូវល្បឿនលឿន និងចង់បង្កើនប្រសិទ្ធភាពកាត់បន្ថយអ្នកស្លាប់ និងរបួសដោយគ្រោះថ្នាក់ចរាចរណ៍។ ជាពិសេសក្នុងគោលបំណងទប់ស្កាត់ការបើកបរមានសារធាតុញៀន។
ក្នុងចំណោមខ្លឹមសារសំខាន់ៗនៃសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មីនេះ ក៏បានចែងអំពីការកំណត់ប្រភេទបទល្មើសចរាចរណ៍ច្បាស់លាស់ ដើម្បីឱ្យការអនុវត្តវត្តច្បាប់មានភាពប្រសើរឡើងដែរ។ ជាក់ស្ដែង ក្រុមការងារតាក់តែងច្បាប់បានបើកកិច្ចប្រជុំចំនួន២២លើករួចហើយ រហូតឈានទៅបង្កើតបាននូវសេចក្ដីព្រាងច្បាប់ថ្មីនាពេលនេះ។ នេះបើតាមការបញ្ជាក់របស់លោកតូច ចាន់កុសល រដ្ឋលេខាធិការក្រសួងសាធារណការនិងដឹកជញ្ជូន និងជាប្រធានក្រុមការងារតាក់តែងច្បាប់ កាលពីថ្ងៃទី២៥ ខែវិច្ឆិកា។ជុំវិញការធ្វើសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មីនេះដែរ កន្លងទៅអ្នកតាមដានការអភិវឌ្ឍសង្គមបានបង្ហាញការគាំទ្រ ប៉ុន្តែក៏ស្នើឱ្យមានការសិក្សាវាយតម្លៃដែលជាលក្ខណៈវិទ្យាសាស្ត្រមានការចូលរួមពីភាគីពាក់ព័ន្ធ។ ពោល អ្នកតាមដានបានស្នើឱ្យរដ្ឋាភិបាលត្រូវជជែក ពិភាក្សា សិក្សាវាយតម្លៃគ្រប់ជ្រុងជ្រោយ និងប្រមូលធាតុចូលឱ្យបានច្រើនពីគ្រប់ភាគីពាក់ព័ន្ធ ដើម្បីធានាថា ការកែតម្រូវ ឬធ្វើវិសោធនកម្មច្បាប់ចរាចរណ៍ថ្មីនេះអាចឆ្លុះបញ្ចាំងពីឆន្ទៈរបស់ប្រជាពលរដ្ឋ និងដាក់ចេញគោលការណ៍ ឬវិធានការជាក់ស្ដែងអាចទទួលយកបាន និងមានប្រសិទ្ធភាព ដើម្បីដោះស្រាយបញ្ហាចរាចរណ៍។
គួរឱ្យដឹងថា ច្បាប់ចរាចរណ៍ផ្លូវគោកចាស់ ឬច្បាប់ចរាចរណ៍ផ្លូវគោកដែលកំពុងអនុវត្តជាធរមានសព្វថ្ងៃ ត្រូវបានប្រកាសដាក់ឱ្យប្រើប្រាស់ កាលពីថ្ងៃទី០៨ ខែកុម្ភៈ ឆ្នាំ២០០៧ និងធ្លាប់ត្រូវបានធ្វើវិសោធនកម្មចំនួន៣លើករួចហើយ៕
