ជំនួបសម្ដែងការគួរសមពីសំណាក់និស្សិតជ័យលាភីអាហារូបករណ៍ចំនួន១៥រូប មុនពេលចេញដំណើរទៅបន្តការសិក្សាថ្នាក់បរិញ្ញាបត្រជាន់ខ្ពស់នៅប្រទេសនូវែលសេឡង់ ទីស្ដីការក្រសួង៖ នៅព្រឹកថ្ងៃសុក្រ ៨រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៦ ខែធ្នូ ឆ្នាំ២០២២ ឯកឧត្ដម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្ដមទេសរដ្ឋមន្ត្រី បានទទួលជួបសម្តែងការគួរសមពីសំណាក់ក្រុមនិស្សិតជ័យលាភីអាហារូបករណ៍ថ្នាក់បរិញ្ញាប័ត្រជាន់ខ្ពស់ នៃរដ្ឋាភិបាលប្រទេសណូវែលហ្សេឡង់ ដោយមានការចូលរួមពីមន្ត្រីជាន់ខ្ពស់ក្រសួងផងដែរ។ ជំនួបសម្ដែងការគួរសមនេះ ធ្វើឡើងដើម្បីទទួលបាននូវអនុសាសន៍ ចំណេះដឹង និងបទពិសោធន៍ល្អៗទាក់ទងនឹងវិស័យផ្សេងៗ ជាពិសេស វិស័យសាធារណការ និងដឹកជញ្ជូន ដែលជាទុនក៏ដូចជាជាទស្សនទានដ៏មានតម្លៃសម្រាប់ការសិក្សានៅប្រទេសណូវែលហ្សេឡង់។ ក្រុមនិស្សិតជ័យលាភីអាហារូបករណ៍ទាំងនេះមានចំនួន១៥រូប ជាមន្ត្រីរាជការស្ថាប័នរដ្ឋ និងបុគ្គលិកនៃអង្គការក្រៅរដ្ឋាភិបាល បានប្រឡងជាប់ថ្នាក់បរិញ្ញាប័ត្រជាន់ខ្ពស់សិក្សារយៈពេលពីរឆ្នាំ សម្រាប់ឆ្នាំសិក្សា២០២៣-២០២៤ ដែលនឹងត្រូវចេញដំណើរទៅសិក្សានៅប្រទេសណូវែលហ្សេឡង់ នៅក្នុងពេលឆាប់ៗខាងមុខនេះ។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានលើកឡើងផងដែរអំពីសមិទ្ធផលសម្រេចបានសំខាន់ៗទាក់ទងនឹងការអភិវឌ្ឍហេដ្ឋារចនាសម្ព័ន្ធរូបវន្ត ក្រោមម្លប់សន្តិភាព និងការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំប្រទេសជាតិយើងឆ្លងកាត់មហាវិនាសសកម្មដោយសារសង្គ្រាម និងអភិវឌ្ឍឈានឡើងលើគ្រប់វិស័យ។ ជាមួយគ្នានោះដែរ ឯកឧត្តមរដ្ឋលេខាធិការ បានផ្តាំផ្ញើឱ្យក្មួយៗនិស្សិតជ័យលាភីទាំងអស់ខិតខំប្រឹងប្រែងរៀនសូត្រឱ្យពូកែ ដើម្បីត្រឡប់មកវិញបម្រើស្ថាប័នជាតិ ក៏ដូចជាវិស័យឯកជន ធ្វើអំពើល្អដើម្បីមុខមាត់មាតុភូមិ ជួយផ្សព្វផ្សាយអំពីការរីកចម្រើនរបស់ប្រទេសជាតិឱ្យគេបានដឹង ឆ្លៀតឱកាសស្វែងយល់ពីវប្បធម៌ និងការរីកចម្រើនរបស់ប្រទេសជាតិគេដើម្បីទទួលបទពិសោធន៍ល្អៗយកមកបន្តវេនដឹកនាំ អភិវឌ្ឍន៍ជាតិយើងឱ្យកាន់តែមានការរីកចម្រើនថែមទៀត និងជាពិសេសត្រូវរក្សាមិត្តភាព សាមគ្គីភាព និង ទំនាក់ទំនងល្អរវាងគ្នានឹងគ្នា ដោយប្រកាន់ភ្ជាប់នូវវិន័យ សីលធម៍ សុជីវធម៌ ថែរក្សាទំនៀមទម្លាប់ ប្រពៃណី ថែរក្សាសុខភាពឱ្យបានល្អ និងគោរពច្បាប់ប្រទេសគេឱ្យបានខ្ជាប់ខ្ជួនផងដែរ។ សូមជម្រាបជូនផងដែរថា៖ និស្សិតអាហារូបករណ៍ចំនួន១៥រូប ដែលនឹងត្រូវបន្ដការសិក្សាថ្នាក់បរិញ្ញាបត្រជាន់ខ្ពស់នៅប្រទេសនូវែលសេឡង់រួមមាន៖ សិក្សាលើមុខជំនាញអាជីវកម្ម គណនេយ្យ គោលនយោ បាយសាធារណៈ ហិរញ្ញវត្ថុ និងកសិកម្ម៕