កិច្ចប្រជុំប្រចាំខែរបស់ក្រុមការងារយុវជនគណបក្សក្រសួងសាធារណការ និងដឹកជញ្ជូន ដើម្បីតាមដានវឌ្ឍនភាពការងារប្រចាំខែ ​និងលើកទិសដៅបន្ត​ ភ្នំពេញ៖ ថ្ងៃសុក្រ ៨រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៦ ខែធ្នូ ឆ្នាំ២០២២ លោកជំទាវ កុយ សុដានី សមាជិកយុវជនគណបក្សប្រជាជនកម្ពុជាថ្នាក់កណ្ដាល និងជាប្រធានក្រុមការងារយុវជនគណបក្សក្រសួងសាធារណការ និងដឹកជញ្ជូន បានដឹកនាំកិច្ចប្រជុំជីវភាពប្រចាំខែរបស់ក្រុមការងារយុវជនគណបក្សក្រសួង ដោយមានការចូលរួមពី ឯកឧត្តម លោកជំទាវ លោក លោកស្រី ជាអនុប្រធាន និងសមាជិកអចិន្ត្រៃយ៍ សរុបចំនួន ១៩រូប។ កិច្ចប្រជុំនេះផ្ដោតសំខាន់ទៅលើការផ្សព្វផ្សាយ ឯកសារជំនួយស្មារតី នៃសភាពការណ៍ទូទៅខែវិច្ឆិកា និងទិសដៅការងារឃោសនាអប់រំខែធ្នូ ការពិនិត្យ ពិភាក្សាលើពង្រាងរបាយការណ៍បូកសរុបប្រចាំឆ្នាំ២០២២​និងទិសដៅបន្ត​របស់ក្រុមការងារយុវជន​បក្សក្រសួង ការផ្សព្វផ្សាយផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី៧ នាឆ្នាំ២០២៣ខាងមុខ និងការប្រគល់ជូននូវលិខិតសរសើរដល់សមាជិក និងសមាជិកានៃក្រុមការងារយុវជន។ ថ្លែងក្នុងកិច្ចប្រជុំ លោកជំទាវ ប្រធានក្រុមការងារយុវជនគណបក្សក្រសួង បានពាំនាំនូវអនុសាសន៍ណែនាំរបស់ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស គឺត្រូវខិតខំឆ្លើយតប និងដោះស្រាយឱ្យបានទាន់ពេលវេលានូវរាល់តម្រូវការ និងបញ្ហាប្រឈមរបស់បងប្អូនប្រជាពលរដ្ឋនៅតាមមូលដ្ឋាន។ លោកជំទាវប្រធានក្រុមការងារ ក៏បានជំរុញដល់សមាជិក សមាជិកាទាំងអស់ ឱ្យបន្ដការយកចិត្តទុកដាក់ចំពោះសុខទុក្ខ របស់យុវជននៅក្រោមឱវាទនៃគណៈកម្មាធិការគណបក្សមូលដ្ឋាននីមួយៗ និងជម្រុញការផ្សព្វផ្សាយសកម្មភាពរបស់យុវជន តាមប្រព័ន្ធផ្សព្វផ្សាយសង្គមផងដែរ៕