[Phnom Penh Post] - លោក ស៊ុន ចាន់ថុល ផ្តល់បាឋកថាស្តីពី “រចនាសម្ព័ន្ធចាត់តាំង តួនាទី ភារកិច្ច” របស់ក្រសួងសាធារណការ ដល់សិក្ខាកាមចំនួន ៦១៩ នាក់
2022-12-16
Go to the website published Phnom Penh Post
កំពង់ស្ពឺៈ លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានផ្តល់បាឋកថាស្តីពី “រចនាសម្ព័ន្ធចាត់តាំង តួនាទី ភារកិច្ច” របស់ក្រសួងសាធារណការ ដល់សិក្ខាកាមចំនួន ៦១៩នាក់ នៃសាលានាយទាហានសកម្ម ដើម្បីចែករំលែកអំពីចក្ខុវិស័យស៊ីជម្រៅរបស់ក្រសួង សំដៅរួមចំណែកក្នុងការជួយជំរុញ និងពង្រឹងដំណើរការបណ្ដុះបណ្ដាលធនធានមនុស្ស ក៏ដូចជារឹតបន្តឹងចំណងទំនាក់ទំនងរវាងស្ថាប័នទាំង២ឱ្យកាន់តែជិតស្និទ្ធ។
បើតាមក្រសួងសាធារណការ នៅក្នុងពិធីដែលធ្វើឡើងកាលពីថ្ងៃទី១៥ធ្នូ លោកឧត្តមសេនីយ៍ឯក ប៊ុត សុភាព នាយកសាលានាយទាហានសកម្ម បានធ្វើរបាយការណ៍ស្វាគមន៍ ព្រមទាំងជម្រាបអំពីសាវតារ ដំណើរប្រព្រឹត្តទៅដោយសង្ខេប បច្ចុប្បន្នភាពនៃការបណ្តុះបណ្តាលរបស់សាលា ជូនដល់អង្គពិធីទាំងមូល និងសំណើសុំការពិនិត្យលទ្ធភាពក្នុងការឧបត្ថម្ភទៅលើតម្រូវការចាំបាច់មួយចំនួនរបស់សាលាផងដែរ។
លោកនាយកសាលា បានបញ្ជាក់ថា ចាប់ពីឆ្នាំ១៩៩៥ ដល់ឆ្នាំ២០២២ សាលាបានបណ្តុះបណ្តាលនាយទាហានសកម្មបានចំនួន ២២វគ្គ ដែលមាននាយទាហានសរុបចំនួន ២ ២៥៩នាក់ ក្នុងនោះមាននារីចំនួន ១៦៣នាក់។
បច្ចុប្បន្នសាលាបាន និងកំពុងបណ្តុះបណ្តាលនាយទាហានសកម្មចំនួន ២វគ្គ រួមមាន៖ វគ្គនាយទាហានសកម្មជំនាន់ទី២៣ មានចំនួន១៩២នាក់ (នារី៣២នាក់) និង វគ្គនាយទាហានសកម្មជំនាន់ទី២៤ មានចំនួន១៩៨នាក់ (នារី៣០នាក់)។
ក្រៅពីវគ្គបណ្តុះបណ្តាលនាយទាហានសកម្ម សាលាក៏មានវគ្គបំប៉នគរុកោសល្យយោធារចារ្យ ជំនាន់ទី៥ ដោយមានគរុសិស្សនាយទាហានចំនួន ៥០នាក់ (នារី៣នាក់) ដែលនឹងត្រូវបញ្ចប់វគ្គនៅបំណាច់ខែធ្នូ ឆ្នាំ២០២២។នៅក្នុងពិធីនេះ លោកស៊ុន ចាន់ថុល បានឡើងធ្វើបទបង្ហាញ ដោយលើកឡើងពីសមិទ្ធផលការងារជាច្រើនកើតចេញពីការខិតខំប្រឹងប្រែងរបស់រាជរដ្ឋាភិបាល ថ្នាក់ដឹកនាំក្រសួង និងមន្ត្រីគ្រប់ជាន់ថ្នាក់ ដែលសម្រេចបានដោយឆន្ទៈមនសិការការងារខ្ពស់ រួមមាន៖ វិស័យហេដ្ឋារចនាសម្ព័ន្ធផ្លូវ ស្ពាន កំពង់ផែ វិស័យដឹកជញ្ជូនផ្លូវគោក ផ្លូវទឹក ផ្លូវដែក វិស័យភ័ស្តុភារកម្ម ប្រព័ន្ធស្វ័យប្រវត្តិកម្ម ព្រមទាំងទំនើបកម្មប្រព័ន្ធបច្ចេកវិទ្យា និងជាពិសេសការផ្តល់សេវាសាធារណៈ ដែលកាន់តែនាំមកនូវភាពងាយស្រួលជូនដល់ប្រជាពលរដ្ឋ។
លោករដ្ឋមន្ត្រីក៏បានលើកឡើងអំពីគម្រោងជាច្រើនដែលក្រសួងកំពុងអនុវត្ត គម្រោងដែលគ្រោងនឹងបើកការដ្ឋានសាងសង់ គម្រោងដែលកំពុងសិក្សាសមិទ្ធិលទ្ធភាព និងគម្រោងដែលគ្រោងនឹងចុះកិច្ចព្រមព្រៀងជាមួយដៃគូអភិវឌ្ឍន៍នាពេលឆាប់ខាងមុខ ជូនដល់អង្គពិធីទាំងមូលឱ្យបានជ្រាប។
ទាំងនេះសបញ្ជាក់ឱ្យឃើញអំពីការយកចិត្តទុកដាក់ក្នុងការអភិវឌ្ឍវិស័យហេដ្ឋារចនាសម្ព័ន្ធ និងដឹកជញ្ជូនឥតឈប់ឈរក្នុងពេលដែលកម្ពុជាកំពុងស្ថិត«នៅក្រោមម្លប់សន្តិភាពយ៉ាងពេញលេញ»។
ដើម្បីចូលរួមក្នុងការអភិវឌ្ឍធនធានមនុស្សលើវិស័យសាធារណការ និងដឹកជញ្ជូន លោកទេសរដ្ឋមន្ត្រី បានផ្តួចផ្តើមគំនិតក្នុងការបង្កើតនូវស្ថាប័នសិក្សាអប់រំមួយ ដែលមានឈ្មោះថា “វិទ្យាស្ថានតេជោសែន សាធារណការ និងដឹកជញ្ជូន”។
ឆ្លៀតក្នុងឱកាសនោះដែរ លោកទេសរដ្ឋមន្ត្រី ក៏បានផ្តល់អនុសាសន៍ណែនាំឱ្យគណៈគ្រប់គ្រងសាលា និងគណៈគ្រប់គ្រងវិទ្យាស្ថាន សហការគ្នាក្នុងការចុះអនុស្សរណៈលើការយោគយល់ ដើម្បីជំរុញលើកទឹកចិត្តបញ្ជូននិស្សិតនាយទាហាន ឬ ផ្លាស់ប្តូរសាស្ត្រាចារ្យ ដើម្បីចែករំលែកចំណេះដឹងបន្ថែមរវាងគ្នា និងគ្នា។
លោកស៊ុន ចាន់ថុល បានចែករំលែកនូវបទពិសោធន៍ល្អៗជាច្រើន ដែលនាំឱ្យលោកទទួលបានជោគជ័យក្នុងភាពជាអ្នកដឹកនាំកន្លងមក ជូនដល់សិក្ខាកាមគ្រប់រូប ហើយនៅចុងបញ្ចប់នៃការធ្វើបាឋកថា លោកទេសរដ្ឋមន្ត្រី ក៏បានបកស្រាយនូវចម្ងល់ និងសំណួរពាក់ព័ន្ធនឹងវិស័យសាធារណការ និងដឹកជញ្ជូន ដែលសិក្ខាកាមបានធ្វើការចោទសួរផងដែរ។
ឆ្លើយតបទៅនឹងសំណើរបស់ លោកឧត្តមសេនីយ៍ឯក នាយកសាលានាយទាហានសកម្ម ដែលស្នើសុំការស្ថាបនាផ្លូវជុំវិញសាលា ដែលជាផ្លូវយុទ្ធសាស្ត្រមួយរបស់សាលាក្នុងការចល័តល្បាតការពារទីតាំង និងជាទីលានហ្វឹកហាត់កាយសិក្សារបស់និស្សិតនាយទាហានសកម្ម មានប្រវែងសរុបចំនួន ៤គីឡូម៉ែត្រនោះ លោកទេសរដ្ឋមន្ត្រី បានផ្តល់អនុសាសន៍ជូនទៅមន្ទីរសាធារណការ និងដឹកជញ្ជូនខេត្តកំពង់ស្ពឺ ក្នុងការចុះសិក្សាជាបន្ទាន់ និងលើកបញ្ជីប៉ាន់តម្លៃដាក់ជូនក្រសួង ដើម្បីធ្វើការពិនិត្យលទ្ធភាព៕
