[Thmey Thmey] - បញ្ហានៅផ្លូវ១០៥ នៃខ្សែរថភ្លើងស្ថានីយភ្នំពេញ-ព្រលានយន្តហោះ នឹងដោះស្រាយបានឆាប់ៗ
2018-04-29
Go to the website published Thmey Thmey
ភ្នំពេញ៖ បន្ទាប់ពីមានការត្អូញត្អែរអំពីសំឡេងរំខានចេញពីរថភ្លើង និងគ្រោះថ្នាក់លើចង្អូរផ្លូវដែក នៃផ្លូវ១០៥ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល អះអាងថា បញ្ហាទាំងនេះនឹងត្រូវដោះស្រាយបានឆាប់ៗ។ លោក ស៊ុន ចាន់ថុល លើកឡើងដូចនេះនាឱកាសលោកអញ្ជើញសម្ពោធខ្សែរថភ្លើងសិរីសោភ័ណ-បាត់ដំបង នៅថ្ងៃទី២៩ខែមេសានេះ។
លោក ស៊ុន ចាន់ថុល ថ្លែងថា ការចាក់បេតុងសងខាងផ្លូវដែកនៃផ្លូវ ១០៥ ប្រវែង ៥ម៉ែត្រសងខាង នឹងត្រូវបញ្ចប់ក្នុងរយៈពេល៨ថ្ងៃទៀត ដែលនឹងមិនពិបាកឲ្យអ្នកធ្វើដំណើរប្រជ្រៀតគ្នាលើផ្លូវដែកទៀត។ រីឯផលប៉ះពាល់ផ្នែកសំឡេង រដ្ឋមន្ត្រីក្រសួងសាធារណការរូបនេះ លើកឡើងថា រថភ្លើងថ្មីមានសំឡេងស្ងាត់ ដែលបញ្ជាទិញពីក្រៅប្រទេស នឹងនាំចូលក្នុងពេលឆាប់ៗខាងមុខ។
តែយ៉ាងណា លោក ស៊ុន ចាន់ថុល អំពាវនាវដល់ប្រជាពលរដ្ឋរស់នៅបណ្ដោយដងផ្លូវនៃខ្សែរថភ្លើងពីស្ថានីយអយស្ម័យយាន ទៅអាកាសយានដ្ឋានអន្តរជាតិភ្នំពេញ កុំចោលសំរាមឥតសណ្ដាប់ធ្នាប់ ដែលបង្កការអាម៉ាសរបស់ជាតិ ខណៈមានភ្ញៀវអន្តរជាតិជិះរថភ្លើងឆ្លងកាត់តំបន់នោះ៕
