[Angkor Post] - ស៊ុន ចាន់ថុល ៖ ប្រាប់ឱ្យប្រជាជនជិះប្រយ័ត្ន ៗសិន មុនដកបង្គោលភ្លើងចោល
2018-04-23
Go to the website published Angkor Post
លោក ស៊ុន ចាន់ថុល បានប្រកាសថានឹងដកបង្គោលភ្លើងកណ្ដាលផ្លូវ១០១៩ (នៅមុខស្ថានីយ៍ទូរទស្សន៍អាស៊ីអាគ្នេយ៍ និងសាកលវិទ្យាល័យកម្ពុជា) ប៉ុន្តែមិនទាន់អាចធ្វើទៅបានភ្លាមៗទេ ដូច្នេះប្រជាពលរដ្ឋត្រូវជិះឱ្យប្រយ័ត្នខ្លួនឯងសិន។ ផ្លូវ១០១៩ ដែលទើបតែពង្រីកហើយ គឺមានបង្គោលភ្លើងនៅចំកណ្ដាលផ្លូវតែម្ដង។ កត្តានេះបានបង្កឱ្យមានគ្រោះថ្នាក់ចរាចរណ៍ស្លាប់មនុស្ស និងរងរបួសជាច្រើននាក់មកហើយ។ ក្រោយពីដឹកដំណឹងនេះ លោក ស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន បានសម្តែងការសោកស្តាយ និងចូលរួមរំលែកទុក្ខចំពោះក្រុមគ្រួសារនៃជនរងគ្រោះ។ មួយវិញទៀត លោកកីបានបញ្ជាក់ថានឹងដកបង្គោលភ្លើងនោះចោលដែរ ប៉ុន្តែខាងអគ្គិសនីត្រូវការពេលសិន ទើបរៀបចំប្រព័ន្ធខ្សែភ្លើងនោះរួច។
លោក ស៊ុន ចាន់ថុល បន្ថែមថាក្រុមការងារមិនអាចដកបង្គោលភ្លើងភ្លាមៗនោះទេ ព្រោះថាចរន្តភ្លើង កំពុងដំណើរការ។ បើដកបង្គោលភ្លើង និងកាត់ខ្សែភ្លើងភ្លាមៗ ភ្លើងអគ្គិសនីក្នុងតំបន់នេះ ត្រូវដាច់អស់រលីងហើយ។ ដូច្នេះមានតែបងប្អូនប្រជាពលរដ្ឋ ត្រូវប្រុងប្រយ័ត្នខ្លួនឯងសិន ទើបមិនមានគ្រោះថ្នាក់បន្ដទៀត៕
