ការពិភាក្សាការងារលើការត្រៀមរៀបចំកម្មវិធីជំនួបជាមួយប្រតិភូអ្នកដឹកនាំវ័យក្មេងអាស៊ាន ក្រោមកម្មវិធី ASEAN Young Leaders Programme ឆ្នាំ២០២២ ដែលគ្រោងធ្វើនៅទីស្តីការក្រសួងនៅថ្ងៃទី ១៣ ខែតុលា ឆ្នាំ២០២២ ទីស្ដីការក្រសួង៖ ថ្ងៃអង្គារ ១រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែតុលា ឆ្នាំ២០២២ លោក ជា សុជាតិ នាយករងខុទ្ទកាល័យឯកឧត្តមទេសរដ្ឋមន្ត្រី បានអញ្ជើញដឹកនាំក្រុមការងារជួបជាមួយលោកស្រី Swati Mathur នាយិកាប្រតិបត្តិនៃអង្គការ Common Purpose Asia-Pacific Limited ដើម្បីពិភាក្សាការងារលើការត្រៀមរៀបចំកម្មវិធីជំនួបជាមួយប្រតិភូអ្នកដឹកនាំវ័យក្មេង អាស៊ាន ក្រោមកម្មវិធី ASEAN Young Leaders Programme ឆ្នាំ២០២២។ លោកនាយករង បានសម្តែងនូវការស្វាគមន៍យ៉ាងកក់ក្តៅចំពោះការអញ្ជើញមករបស់លោកស្រីនាយិកាប្រតិបត្តិ និងបានគូសបញ្ជាក់ថា៖ នេះជាលើកទីមួយ និងក៏ជាកិត្តិយសផងដែរដែលក្រសួងសាធារណការ និងដឹកជញ្ជូន បានសហការ និងធ្វើជាម្ចាស់ផ្ទះរៀបចំកម្មវិធីអ្នកដឹកនាំវ័យក្មេងអាស៊ានឆ្នាំ២០២២។ លោកនាយករង បានបន្ថែមថា៖ ក្រសួងនឹងសហការយ៉ាងពេញទំហឹងលើការរៀបចំកម្មវិធីជំនួបនេះ ជាពិសេសការរៀបចំជាកម្មវិធីចូលរួមស្តាប់បទបង្ហាញរបស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដើម្បីចែករំលែកចំណេះដឹង បទពិសោធន៍ និងការអនុវត្តល្អៗ នៃភាពជាអ្នកដឹកនាំក្នុងវិស័យឯកជន និងរដ្ឋ និងការរៀបចំឱ្យមានទស្សនកិច្ចស្វែងយល់នៅតាមទីតាំង ផ្តល់សេវាសាធារណៈផ្សេងៗក្នុងបរិវេណក្រសួងផងដែរ។ គួរកត់សម្គាល់ថា៖ កម្មវិធីអ្នកដឹកនាំវ័យក្មេងអាស៊ាន បានចាប់ផ្តើមឡើងនៅក្នុងឆ្នាំ២០១៨ នៅពេលដែលប្រទេសសិង្ហបុរី ធ្វើជាប្រធានអាស៊ាន។ កម្មវិធីនេះឧបត្ថម្ភឡើងដោយក្រុមប្រឹក្សាជាតិយុវជនរបស់សិង្ហបុរី ផ្តោតជាសំខាន់លើការអភិវឌ្ឍសមត្ថភាពភាពជាអ្នកដឹកនាំនៃយុវជនអាស៊ានដែលមានអាយុចាប់ពី១៨ឆ្នាំ ដល់ ២៥ឆ្នាំ ហើយយុវជនអាស៊ានអាចចូលរួមកម្មវិធីនេះបានដោយមិនតម្រូវឱ្យបង់ប្រាក់កម្រៃអ្វីឡើយ៕