[VAYO FM] - ផ្លូវជាតិលេខ៣កំពត-វាលរេញខូចខ្លាំង រដ្ឋមន្ត្រីសេដ្ឋកិច្ចឱ្យក្រុមហ៊ុនជួសជុលបណ្ដោះអាសន្នសិន
2022-10-09
Go to the website published VAYO FM
ក្នុងការចុះត្រួតពិនិត្យនេះ លោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានចាត់ឱ្យក្រុមការងារបច្ចេកទេសគម្រោង ធ្វើបទបង្ហាញដោយសង្កត់ធ្ងន់លើបច្ចេកទេសដោះស្រាយ ឆ្លើយតបចំពោះកំណាត់ផ្លូវ២០គីឡូម៉ែត្រដែលតែងតែខូចជាប្រចាំ ដើម្បីធានាថាផ្លូវនេះនឹងមានភាពគង់វង្សយូរអង្វែង បញ្ចៀសនូវការជួសជុលដដែលៗម្តងហើយម្តងទៀត។
ជាការកត់សម្គាល់ ផ្លូវប្រវែង២០គីឡូម៉ែត្រ ដែលមានបញ្ហានេះត្រូវបែងចែកជាពីរកំណាត់ ក្នុងនោះ៖ មួយកំណាត់ដែលមានប្រវែង៥គីឡូម៉ែត្រ មានដីស្អុយជម្រៅរហូតដល់១៨ម៉ែត្រនៅផ្នែកខាងក្រោម តម្រូវឱ្យវាយសសរគ្រឹះឱ្យដល់ជម្រៅ១៨ម៉ែត្រ ដើម្បីធ្វើឱ្យកំណាត់ផ្លូវនេះរឹងមាំ។
ដោយឡែកចំពោះផ្លូវមួយកំណាត់ទៀតដែលមានប្រវែង១៥គីឡូម៉ែត្រ អាចប្រើប្រាស់វិធីសាស្ត្រ២ផ្សេងទៀតទៅតាមកម្រិតជម្រៅដីស្អុយរួមមានវិធីទម្លាក់សេរីទម្ងន់២០០តោន និងវិធីកាយពង្រឹងគ្រឹះរួចចាក់បេតុង ទើបផ្លូវនេះអាចមានភាពរឹងមាំជាប់បានយូរ។
ជាមួយគ្នានោះ លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានណែនាំឱ្យក្រុមហ៊ុនទទួលបន្ទុកជួសជុលស្ថាបនាផ្លូវជាតិលេខ៣ ត្រង់កំណាត់ផ្លូវប្រវែង២០គីឡូម៉ែត្រដែលខូចខាតខ្លាំងនេះ ត្រូវធ្វើសកម្មភាពជួសជុលបណ្ដោះអាសន្នសិន មុនពេលទទួលបានថវិកាគម្រោងសាងសង់ធ្វើកំណាត់ផ្លូវនេះ ដើម្បីសម្រួលដល់ការធ្វើចរាចរណ៍ និងការដឹកជញ្ជូនរបស់ប្រជាពលរដ្ឋ។
សូមបញ្ជាក់ថា កំណាត់ផ្លូវជាតិលេខ៣ពីខេត្តកំពតទៅឃុំវាលរេញ ស្រុកព្រៃនប់ ខេត្តព្រះសីហនុ មានប្រវែងសរុប៥៤គីឡូម៉ែត្រ ក្នុងនោះ៣៤គីឡូម៉ែត្រមានសភាពល្អប្រសើរ ប៉ុន្តែ២០គីឡូម៉ែត្រទៀតតែងតែខូចជាប្រចាំ ជាពិសេសនៅរដូវវស្សាដែលមានភ្លៀងធ្លាក់ច្រើន។ នេះបើតាមការបញ្ជាក់របស់ លោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន៕
