ភ្នំពេញ៖ ផ្លូវក្នុងខេត្តបាត់ដំបងមួយចំនួន បានរងការខូចខាតជាច្រើនកន្លែង និងបានបង្កការលំបាកក្នុងការធ្វើដំណើរ។ ទាក់ទងនឹងបញ្ហានេះ លោក សុខ លូ អភិបាលខេត្តបាត់ដំបង បានថ្លែងប្រាប់សារព័ត៌មានThmeyThmey25 តាមទូរសព្ទថា ខេត្តនឹងជួសជុលផ្លូវទាំងនោះ នារដូវប្រាំង។ ប៉ុន្តែខេត្តក៏កំពុងជួសជុលផ្លូវមានជង្ហុកក្នុងក្រុង ដើម្បីសម្រួលការធ្វើដំណើរ។ ភ្នំពេញ៖ ផ្លូវក្នុងខេត្តបាត់ដំបងមួយចំនួន បានរងការខូចខាតជាច្រើនកន្លែង និងបានបង្កការលំបាកក្នុងការធ្វើដំណើរ។ ទាក់ទងនឹងបញ្ហានេះ លោក សុខ លូ អភិបាលខេត្តបាត់ដំបង បានថ្លែងប្រាប់សារព័ត៌មានThmeyThmey25 តាមទូរសព្ទថា ខេត្តនឹងជួសជុលផ្លូវទាំងនោះ នារដូវប្រាំង។ ប៉ុន្តែខេត្តក៏កំពុងជួសជុលផ្លូវមានជង្ហុកក្នុងក្រុង ដើម្បីសម្រួលការធ្វើដំណើរ។ មន្ទីរសាធារណការ និងដឹកជញ្ជូនខេត្តបាត់ដំបង បានជួសជុលផ្លូវជាបណ្តើរៗ នៅថ្ងៃគ្មានភ្លៀងធ្លាក់ ដ្បិតជំនន់ទឹកភ្លៀងបានស្រកចុះខ្លះ។ ផ្លូវមួយចំនួន នឹងធ្វើថ្មី បើសិនរដ្ឋបាលខេត្តមានលទ្ធភាព និងផុតរដូវភ្លៀងធ្លាក់។ ដោយឡែក ផ្លូវមួយចំនួនទៀតមិនទាន់អាចជួសជុល ឬធ្វើថ្មីបានឡើយ ដោយសារពាក់ព័ន្ធនឹងគម្រោងADB ដែលធ្វើប្រព័ន្ធលូរំដោះទឹកភ្លៀងនិងទឹកកខ្វក់។ លោក សុខ លូ ពន្យល់អំពីមូលហេតុ ដែលនាំឱ្យផ្លូវមួយចំនួនមានការខូចខាតដូច្នេះ៖ «និយាយជារួម ផ្លូវរបស់យើងមានការខូចខាតច្រើន។ ជាពិសេសផ្លូវបាត់ដំបងនេះ ជាផ្លូវដែលបានសាងសង់យូរហើយ។ ហើយផ្លូវមួយចំនួនខូចខាត ដោយសារអាយុកាលផ្លូវយូរហើយ វាចំណាស់។ ដោយសារភ្លៀងជោគជាំមួយរយៈនេះ ហើយដូចបានដឹងហើយ ឆ្នាំនេះអត់មានកូនរដូវប្រាំងទេ ភ្លៀងរហូត។ អ៊ីចឹងផ្លូវមួយចំនួន មានការខូចខាតកាន់តែច្រើន»។ គួររម្លឹកផងដែរថា កាលពីខែកញ្ញា ឆ្នាំ២០២២ ពលរដ្ឋមួយចំនួនបានត្អូញត្អែរ និងបានបង្ហោះរូបភាព ក៏ដូចជាវីដេអូស្ថានភាពផ្លូវ លើគណនីហ្វេសប៊ុករបស់ខ្លួន។ ពលរដ្ឋក៏បានសរសេររៀបរាប់ពីការលំបាកក្នុងការធ្វើដំណើរ រួមទាំងអំពាវនាវឱ្យមានការជួសជុលពីរដ្ឋបាលក្រុងផងដែរ។ ក្រោយឃើញការផ្សព្វផ្សាយរបស់ពលរដ្ឋ និងការបញ្ចេញមតិជាច្រើនលើបណ្តាញសង្គមហ្វេសប៊ុកអំពីបញ្ហាផ្លូវក្នុងខេត្តបាត់ដំបង លោក សុខ លូ ក៏បានឆ្លើយតបពីបញ្ហានេះទៅកាន់ពលរដ្ឋ លើទំព័រហ្វេសប៊ុកផ្លូវការរបស់លោកកាលពីថ្ងៃទី០២ ខែតុលានេះផងដែរ។ អភិបាលខេត្តបាត់ដំបងរូបនេះ បានសរសេររៀបរាប់ដូច្នេះ៖«ពេលនេះផ្លូវមួយចំនួនធំមានការខូចខាត។ ផ្លូវទាំងនោះសុទ្ធតែបានរងផលប៉ះពាល់ដោយទឹកជំនន់ច្រើនលើកច្រើនសារមកហើយ។ ពេលនេះរដូវភ្លៀងច្រើន យើងលុបសំបុកមាន់ក៏មិនជាប់ដែរ។ នៅពេលអស់ភ្លៀងខាងមុខនេះ ខេត្តនឹងចាប់ផ្តើមជួសជុលលុបសំបុកមាន់ ផ្លូវដែលអាចធ្វើបាន។ ផ្លូវមួយចំនួន នឹងធ្វើថ្មីទៅតាមទំហំថវិកា»។ ខេត្តចំនួន២២ក្នុងប្រទេសកម្ពុជា កំពុងរងជំនន់ទឹកភ្លៀង ដែលបានបំផ្លាញហេដ្ឋារចនាសម្ព័នជាច្រើន និងប៉ះពាល់ដល់ទ្រព្យសម្បត្តិប្រជាពលរដ្ឋជាច្រើន។ ភ្លៀង នឹងបន្តធ្លាក់ក្នុងកម្រិតពីតិចទៅច្រើន នៅតាមបណ្ដាខេត្តនានា ដែលនឹងបង្កឱ្យមានជំនន់ទឹកភ្លៀង។ ភ្លៀង នៅតែបន្តធ្លាក់ ដែលបង្កផលពិបាកក្នុងការជួសជុលផ្លូវ។ លោក សុខ លូ បានសុំការអធ្យាស្រ័យពីពលរដ្ឋដូច្នេះ៖ « សូមជម្រាបថាផ្លូវមួយចំនួន ខេត្តចង់ធ្វើថ្មី ក៏មិនអាចធ្វើកើតដែរ ដោយយើងទាក់នឹងគម្រោងADBធ្វើប្រព័ន្ធលូរំដោះទឹកភ្លៀង និងទឹកកខ្វក់ទាំងខាងកើតស្ទឹង និងខាងលិចស្ទឹង។ ដូច្នេះយើងត្រូវរង់ចាំមួយរយ:សិន កុំអោយពិបាកធ្វើពីរដង។ តែខេត្តនឹងលុបសំបុកមាន់ប្រើប្រាស់បណ្តោះអាសន្នសិន។ សូមបងប្អូនយោគយល់ និងអធ្យាស្រ័យ ។ សូមអរគុណ»៕