កំពង់ធំ៖ មន្ទីរសាធារណការនិង ដឹកជញ្ជូនខេត្តកំពង់ធំ និង​អាជ្ញាធរ​ពាក់​ព័ន្ធ​សម្រេច​ផ្អាក​ចរាចរណ៍​ទាំង​ស្រុងជាបណ្តោះអាសន្នចំពោះរថយន្តដឹកទំនិញធុនធ្ងន់នៅកំណាត់ផ្លូវជាតិលខ៦ ក្នុងស្រុកស្ទោង និងច្រកបេខ្សាច់ ទប់ស្កាត់ទឹកហូរច្រុះផ្លូវ។ នៅថ្ងៃទី២៧ ខែកញ្ញា ឆ្នាំ២០២២, មន្ទីរសាធារណការ និងដឹកជញ្ជូនខេត្តកំពង់ធំ និង​អាជ្ញាធរ​ពាក់​ព័ន្ធ កំពុងច្រកបេខ្សាច់ទប់ស្កាត់ការហូរច្រុះកំណត់ផ្លូវជាតិលេខ៦ ប្រវែងជាង២គីឡូម៉ែត្រ នៅ​ស្រុកស្ទោង ខេត្តកំពង់ធំ។ លោក ជូ កុល្លា មន្ទីរសាធារណការនិងដឹកជញ្ជូនខេត្តកំពង់ធំ បញ្ជាក់​ថា ការច្រក​បេខ្សាច់​ ដើម្បី​ទប់​ដី​នេះ ដោយសារបរិមាណធាទឹកភ្លៀងនៅតែបន្តហូរខ្លាំង ដែល​អាច​ធ្វើឲ្យ​ផ្លូវ​នេះ​រង​នូវ​សភាព​ខូចខាត ដែលពិបាកនឹងជួសជុសឡើងវិញ ចំណាយ​ថវិកា​ជាតិ​ច្រើន និង​អាច​ឈាន​ដល់​ការ​ធ្វើ​ដំណើរ​នៅពេលទឹកស្រកទៅវិញ។ កំណាត់ផ្លូវជាតិលេខ៦ ក្នុង​ខេត្ត​កំពង់ធំ បាន​ចាប់​ផ្តើម​លិច​ដោយ​សារ​ធារទឹកភ្លៀង រួមជាមួយប្រភពទឹក ស្ទឹងស្ទោង និង​ទឹក​ដែល​ហូរ​ចេញពី​ទំនប់​អាង​ស្ទាក់ទឹក ៣០ កញ្ញាផងដែរ, ក្នុងករណីទឹកនៅផ្នែកខាងលើ ទំនប់​អាង​ស្ទាក់​ទឹក​៣០ កញ្ញា នៅ​តែ​បន្ត​ជន់ឡើង, ទឹកស្ទឹងស្ទោងបន្តជន់ខ្លាំង នោះទឹក​នឹង​អាច​នៅ​តែ​បន្ត​លិច​ផ្លូវ​ផងដែរ។ លោក​បន្ត​ថា កំណាត់ផ្លូវជាតិលិចទាំងស្រុងនៅចន្លោះគីឡូម៉ែត្រលេខ២២០ ដល់លេខ២២៤ ជម្រៅ ០,២០ម៉ែត្រ ដល់់០,៤០ម៉ែត្រ បច្ចុប្បន្នមន្រ្តីជំនាញនៃមន្ទីរសាធារណការ និងដឹកជញ្ជូនខេត្ត វាយ​តម្លៃថា នៅចន្លោះគីឡូម៉ែត្រលេខ ២២២ ដល់លេខ២២៤ អាចរងផលប៉ះពាល់ខ្លាំង ដែល​តម្រូវ​មន្ទីរ និងអាជ្ញាធរពាក់ព័ន្ធជួយគ្នា ទប់បេខ្សាច់ ទប់ស្កាត់ការហូរច្រុះនៅផ្នែកខាងក្រោម។ ក្រៅ​ពីផ្លូវ​ជាតិ​លេខ ៦ មន្ទីរសាធារណការក៏បានផ្អាកផ្លូវពីរខ្សែផ្សេងទៀត គឺ៖ ផ្លូវខេត្តលេខ២៦៤D ស្ថិត​នៅ​ក្នុ​ង​ឃុំបន្ទាយស្ទោង ស្រុកស្ទោង និងផ្លូវខេត្តលេខ២៦៤G ស្ថិតនៅក្នុងភូមិតាទ្រាល ឃុំ​ប្រឡាយ ស្រុកស្ទោងផងដែរ។ យោងតាមរបាយការណ៍របស់មន្ទីរធនធានទឹក និងឧត្តុនិយមខេត្តកំពង់ធំ ស្ថានីយ៍វាស់កំពស់ទឹក នៅខេត្តកំពង់ធំ មានប្រាំស្ថានីយ៍ គឺ នៅស្ថានីយ៍ កំពង់ធំ នៅថ្ងៃទី២៧ ខែកញ្ញា មាន​កម្ពស់​ទឹក​ជន់​ឡើង ០,០២ម៉ែត្រ, កម្ពស់ទឹកថ្ងៃនេះ ១៣,៦៤ម៉ែត្រ លើសកំពស់ប្រុងប្រយ័ត្ន០,១៤ ម៉ែត្រ, នៅស្ថានីយ៍ សណ្តាន់ ទឹកឡើង ០,០៦ ម៉ែត្រ កម្ពស់ទឹក១៩,៤៤ម៉ែត្រ លើសកំពស់ប្រុងប្រយ័ត្ន ០,៩៤ម៉ែត្រ, ស្ថានីយ៍ អាងទឹកស្ទឹងជីនិត(១មករា) ទឹកនឹង មានកម្ពស់ទឹក ២,៩២ ម៉ែត្រ ទឹកនៅលើក្បាលបង្ហៀរ0,៤៦ម៉ែត្រ, ស្ថានីយ៍កំពង់ចិន(ទីរួមស្រុកស្ទោង) ទឹកនឹង មានកម្ពស់ ៥,៨០ម៉ែត្រ, ស្ថានីយ៍អាងទឹក ៣០ កញ្ញា ទឹកស្រកចុះ ០,១០ម៉ែត្រ កម្ពស់ទឹក ១៨,៧០ម៉ែត្រ កម្ពស់ទឹកហូរតាមសំណង់ទ្វារទឹកធំមាន៤,១៥ ម៉ែត្រ ទឹកហូរលើក្បាលបង្ហៀរ0,៤០ ម៉ែត្រ។