នៅរសៀលថ្ងៃទី១៤ខែកញ្ញាឆ្នាំ២០២២ ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណៈការនិងដឹកជញ្ជូន ព្រមទាំងមន្ត្រីជំនាញបច្ចេកទេសក្រោមឱវាទក្រសួង រួមជាមួយអាជ្ញាធរខេត្ត និង តំណាងកម្មវិធីអភិវឌ្ឍន៍អង្គការសហប្រជាជាតិ (UNDP)ប្រចាំកម្ពុជា បានអញ្ជើញកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការស្ថានីយបញ្ចូលថាមពលអគ្គិសនីរថយន្ដ មានទីតាំង ស្ថិតនៅសួនច្បារព្រះរាជដំណាក់ នាខេត្ដសៀមរាប ដើម្បីបញ្ជ្រាបការយល់ដឹងដល់ឱ្យកាន់តែទូលំទូលាយដល់សាធារណជនអំពីបច្ចេកវិទ្យា ឧបករណ៍ បរិក្ខារ និងអត្ថប្រយោជន៍នានា នៃយានយន្តអគ្គិសនី សំដៅលើកកម្ពស់ការប្រើប្រាស់ យានយន្តអគ្គិសនីនៅកម្ពុជាឱ្យកាន់តែសម្បូរបែប។ ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណៈការនិងដឹកជញ្ជូន មានប្រសាសន៍ថា ៖ការសម្ពោធដាក់ឱ្យប្រើប្រាស់ស្ថានីយបញ្ចូលថាមពល សម្រាប់យានយន្តអគ្គិសនីនេះ គឺជាការបើកឡើងនូវប្រវត្តិសាស្រ្ត ថ្មីមួយរបស់កម្ពុជា ក្នុងគោលបំណងបញ្ជ្រាបការយល់ដឹងដល់សាធារណជន អំពីបច្ចេកវិទ្យា ឧបករណ៍ បរិក្ខារនិងអត្ថប្រយោជន៍នានានៃយានយន្តអគ្គិសនី សំដៅលើកកម្ពស់ការប្រើប្រាស់យានយន្ត អគ្គិសនីនៅកម្ពុជាឱ្យកាន់តែ ទូលំទូលាយថែមទៀត។ ឯឧត្តម ទេសរដ្ឋមន្ត្រី បានបញ្ជាក់ទៀតថា នេះជាស្ថានីយ៍ទី៣ក្នុងចំណោមស្ថានីយ៍ចំនួន៤ទីតាំង ក្រោមការសហការចូលរួមឧបត្ថម្ភពីវិធីអភិវឌ្ឍន៍អង្គការសហប្រជាជាតិ (UNDP)ប្រចាំកម្ពុជា ក្នុងនោះ មាននៅរាជធានីភ្នំពេញ ក្រុងព្រះសីហនុ ខេត្តសៀមរាបនិងបាត់ដំបង ដើម្បីជាការផ្សព្វផ្សាយទៅប្រជាពរដ្ឋពីការប្រើប្រាស់រថយន្ត អគ្គិសនី និងដើម្បីផ្សព្វផ្សាយដល់អ្នកវិនិយោគ ឱ្យមកធ្វើការសាងសង់ស្ថានីយ៍ទាំងនេះនៅទូទាំងប្រទេសផងដែរ។ ឯកឧត្តម ស៊ុន ចាន់ថុល បានបន្ថែមថា យោងតាមប្រព័ន្ធគ្រប់គ្រងការចុះបញ្ជីយានយន្តរបស់ក្រសួងសាធារណការ និងដឹកជញ្ជូន ចំនួនយានយន្តអគ្គិសនី ដែលបានចុះបញ្ជីចំនួន៣០៥គ្រឿងគិតពីខែមករាដល់ខែកក្កដាឆ្នាំ២០២២ ខណៈចំនួន១៦គ្រឿងប៉ុណ្ណោះ គិតក្នុងរយៈពេលដូចគ្នានៅឆ្នាំ២០២១ គឺមានការកើនឡើងគួរឱ្យកត់សម្គាល់ ក្នុងឆ្នាំ២០២២នេះ នៃការចុះបញ្ជីយានយន្តអគ្គិសនី សរុបមកដល់ពេលនេះយានយន្តអគ្គិសនីមានចំនួនជិត១ពាន់គ្រឿងហើយនៅកម្ពុជា៕