AKP សៀមរាប ថ្ងៃទី១៣ ខែកញ្ញា ឆ្នាំ២០២២ -- ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងប្រាប់អ្នកសារព័ត៌មាននៅខេត្តសៀមរាប ក្នុងឱកាសចុះពិនិត្យមើលស្ថានភាពច្រាំង ស្ទឹងសៀមរាប និងបណ្តាញលូទឹកភ្លៀង លូទឹកកខ្វក់ នៅក្នុងក្រុងសៀមរាប នាព្រឹកថ្ងៃទី១៣ ខែកញ្ញា ឆ្នាំ២០២២នេះថា ម៉ាស៊ីនត្រួតពិនិត្យកាកសំណល់កខ្វក់ក្នុងលូដ៏ទំនើបនេះ អាចបញ្ជាបានប្រវែង២០០ម៉ែត្រចូលក្នុងលូ ដោយលូទឹកភ្លៀងដាក់កង់ធំ ហើយលូទឹកកខ្វក់ ប្រើកង់តូច។ ក្រោយពេលដាក់ម៉ាស៊ីនចូលក្នុងលូហើយ ម៉ាស៊ីននោះវាបានបង្ហាញ កាកសំណល់នៅក្នុងលូ ព្រមទាំងមើលឃើញកន្លែងអ្នកលួចចោះលូផងដែរ។ ដោយបង្ហាញឱ្យឃើញតាមរយៈនៅលើអេក្រង់អាយផេត។ឯកឧត្ដមបានបន្ដថា ឧបករណ៍ម៉ាស៊ីនទំនើបនេះ មានប្រើលើកដំបូងនៅ ក្នុងប្រទេសកម្ពុជា មានអត្ថប្រយោជន៍ជាច្រើនសម្រាប់ការពិនិត្យមើលក្នុងលូ ដែលបានជំនួស កម្លាំងមនុស្សចូលក្នុងលូ។ នៅពេលម៉ាស៊ីននេះបង្ហាញពីកាកសំណល់នៅក្នុងលូ ដែលធ្វើឱ្យមានការកកស្ទះ ហើយយើងក៏មានរថយន្ដបាញ់លាងកាកសំណល់ក្នុងលូ បានយ៉ាងល្អ ដោយប្រើទុយយោបូបទឹកចេញពីក្នុងលូផងដែរ។ឯកឧត្ដមបន្ថែមថា នៅក្នុងពេលសាកល្បងនេះ ឃើញថា នៅក្នុងលូនៅតាម ទីតាំង មួយចំនួនត្រូវបានប្រជាពលរដ្ឋចាក់កាកសំណល់ខ្លាញ់ចូល ការដាំសណ្តែកធ្លាក់ចូលលូ កន្លែងខ្លះក៏មានការលួចភ្ជាប់បណ្តាញលូដោយមិនមានការអនុញ្ញាតជាដើម។ ដែលទង្វើ បែបនេះ បានធ្វើឱ្យស្ទះដល់លំហូរទឹកពេលមានភ្លៀងធ្លាក់ម្តងៗ។ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានទទូចសុំដល់ប្រជាពលរដ្ឋទាំង អស់ឱ្យចូលរួមថែរក្សាសមិទ្ធផលប្រវត្តិសាស្រ្តនេះ និងជួយសម្អាតឱ្យបានស្អាតផង។ ឯកឧត្តមលើកឡើងថា មុខផ្ទះយើងបើយើងមិនសម្អាត តើឱ្យអ្នកណា មកសម្អាត?សូមបញ្ជាក់ថា កាលពីចុងឆ្នាំ២០២០ ប្រមុខរាជរដ្ឋាភិបាលកម្ពុជា សម្តេចអគ្គ សេនាបតីតេជោ ហ៊ុន សែន បានទម្លាក់កញ្ចប់ថវិកាជាតិប្រមាណ១៥០លានដុល្លារអាម៉េរិក ដើម្បីលើកកម្ពស់ហេដ្ឋារចនាសម្ព័ន្ធផ្លូវ៣៨ខ្សែ និងប្រព័ន្ធលូទឹកភ្លៀង ទឹកកខ្វក់ ក្នុងក្រុងសៀមរាប រួមជាមួយនឹងការកែលម្អសោភណភាពដង ស្ទឹងសៀមរាប ផងដែរ។៕